ކުވައިތުގައި އެމެރިކާގެ ފައިޓަރ ޖެޓްތަކެއް ވެއްޓިއްޖެ
ކުވައިތުގެ އުތުރު ސަރަހައްދަށް އެމެރިކާގެ އަސްކަރީ ބޯޓުތަކެއް ވެއްޓުނު ހާދިސާގައި، އޭގައި ތިބި ހުރިހާ ފަޅުވެރިން ސަލާމަތްކޮށް ހޮސްޕިޓަލުގައި ފަރުވާދެމުންދާ ކަމަށް އެ ގައުމުގެ ޑިފެންސް މިނިސްޓްރީން ހާމަކޮށްފި. މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ކުވައިތުގެ ކަމާބެހޭ އިދާރާތަކުން އެމެރިކާގެ އަސްކަރިއްޔާއާ ގުޅިގެން މިހާރު ދަނީ ތަހުގީގު ކުރަމުން.
2001 ވަނަ އަހަރުގެ އޯގަސްޓް މަހުގެ 10 ވަނަ ދުވަހު ބޭއްވި "ލާޖް ފޯސް އެމްޕްލޯއިމަންޓް" ތަމްރީނުތަކުގެ ތެރެއިން، ކޮލޮރާޑޯގެ ހުޅަނގު ސަރަހައްދު މަތިން އެފް-16 ސީޖޭ މަރުކާގެ ހަނގުރާމަމަތީ ބޯޓެއް އުދުހެނީ. | ގެޓީ އިމޭޖަސް
ކުވައިތުގައި އެމެރިކާގެ އަސްކަރީ ބޯޓުތަކެއް ވެއްޓިފައިވާ ކަމަށް އެ ގައުމުގެ ޑިފެންސް މިނިސްޓްރީން ހޯމަ ދުވަހު ހާމަކޮށްފިއެވެ. އެ މިނިސްޓްރީން ބުނި ގޮތުގައި މި ހާދިސާ ހިނގިއިރު ބޯޓުތަކުގައި ތިބި ފަޅުވެރިން ވަނީ ސަލާމަތްވެފައެވެ.
ކުވައިތުގެ ރަސްމީ ނޫސް އެޖެންސީ "ކޫނާ" މެދުވެރިކޮށް ޑިފެންސް މިނިސްޓްރީގެ ތަރުޖަމާނު ނެރުއްވި ބަޔާނެއްގައި ވިދާޅުވީ، އެމެރިކާގެ އަސްކަރީ ބޯޓުތަކެއް ވެއްޓުނީ ހޯމަ ދުވަހުގެ ހެނދުނުގެ ވަގުތެއްގައި ކަމަށާއި، އެ ހުރިހާ ބޯޓެއްގެ ފަޅުވެރިން ސަލާމަތްވެފައިވާކަން ކަށަވަރުކޮށްދޭ ކަމަށެވެ.
މި ހާދިސާއާ ގުޅިގެން ކަމާބެހޭ އިދާރާތަކުން ވަގުތުން ސާޗް އެންޑް ރެސްކިއު އޮޕަރޭޝަނެއް ފަށައި، ބޯޓުތަކުގެ ފަޅުވެރިން ސަލާމަތްކޮށްގެން ސިއްހީ ފަރުވާއަށާއި އިތުރު ތަހުލީލުތަކަށް ހޮސްޕިޓަލަށް ގެންގޮސްފައިވާ ކަމަށް އެ ބަޔާނުގައިވެއެވެ. އަދި ހޮސްޕިޓަލުގައި ފަރުވާދެމުންދާ ފަޅުވެރިންގެ ހާލު މިހާރު ސްޓޭބަލް ނުވަތަ ރަނގަޅުވަމުން އަންނަ ކަމަށްވެސް މިނިސްޓްރީން ބުނެފައިވެއެވެ.
ތަރުޖަމާނު އިތުރަށް ވިދާޅުވީ، ބޯޓުތައް ވެއްޓެން މެދުވެރިވި ސަބަބު މިހާރު ތަހުގީގު ކުރަމުންދާ ކަމަށެވެ. އަދި މި ހާދިސާ ހިނގަން މެދުވެރިވި ހާލަތްތައް ދެނެގަތުމަށާއި، ފަންނީ ގޮތުން ފުރިހަމަކުރަންޖެހޭ އިޖުރާއަތްތައް ކުރިއަށް ގެންދިއުމުގައި އެމެރިކާގެ އަސްކަރިއްޔާއާ ގުޅިގެން ސީދާ މަސައްކަތްތަކެއް ކުރަމުންދާ ކަމަށްވެސް އޭނާ ވިދާޅުވިއެވެ.
ހޯމަ ދުވަހުގެ ކުރީކޮޅު ސޯޝަލް މީޑިއާގައި ދައުރުވި ވީޑިއޯތަކުން ފެންނަ ގޮތުގައި، އެމެރިކާގެ ފައިޓާ ޖެޓެއް ކުވައިތުގެ އުތުރު ސަރަހައްދަށް ވެއްޓޭ މަންޒަރު ފެނެއެވެ.
