އީރާނުން ކުވެއިތުގައި ހުންނަ އެމެރިކާގެ އެމްބަސީ އަށް ހަމަލާ ދީފި

އިރާނަށް ޒަޔަނިސްޓް އިޒްރޭލާއި ގުޅިގެން އެމެރިކާ އިން ދިން ޣައިރު ގާނޫނީ ހަމަލާ އާ ގުޅިގެން ބަދަލު ހިފުމުގެ ގޮތުން މެދުއިރުމަތީގައި ހުރި އެމެރިކާ އާއި އިޒްރޭލާ ގުޅުން ހުރި ތަންތަނަށް އީރާނުން ދެމުންދާ ހަމަލާތައް ތިންވަނަ ދުވަހަކަށް ކުރިއަށްދަނިކޮށް، ކުވެއިތުގައި ހުންނަ އެމެރިކާގެ އެމްބަސީން ބޯދުން އަރަމުންދަނިކޮށް އޭއެފްޕީގެ ނޫސްވެރިންނަށް ހޯމަ ދުވަހު ފެނިއްޖެއެވެ. މި ހާދިސާއާ ގުޅިގެން، އެމްބަސީ ހުންނަ ސަރަހައްދަށް އެއްވެސް މީހަކު ނުދިއުމަށް އެމެރިކާގެ ޑިޕްލޮމެޓިކް މިޝަނުން ވަނީ އަންގާފައެވެ.

އިރާނުގެ އެންމެ މަތީ ވެރިޔާއާއި އެހެނިހެން އިސް އޮފިޝަލުން އަވަހާރަކޮށްލުމަށް އެމެރިކާއާއި އިޒްރޭލުން ދިން ހަމަލާތަކުގެ ބަދަލުހިފުމުގެ ގޮތުން، އިރާނުން ފޮނުވާލި މި ހަމަލާތަކާއެކު ކުވެއިތު ސިޓީގެ އެކި ސަރަހައްދުތަކުގައި ވަނީ ނުރައްކަލުގެ ސައިރަންގެ އަޑު އިވިފައެވެ.

އެމެރިކާ އެމްބަސީއަށް ހަމަލާއެއް އަމާޒުވިކަން އެ އިދާރާއިން ރަސްމީކޮށް ހާމަކޮށްފައި ނުވި ނަމަވެސް، ސަލާމަތީ ފިޔަވަޅެއްގެ ގޮތުން އެ ސަރަހައްދާ ދުރަށް ދިއުމަށް ވަނީ އިލްތިމާސްކޮށްފައެވެ.

އެމްބަސީން ނެރުނު ބަޔާނެއްގައި ބުނެފައިވަނީ، ކުވެއިތަށް މިސައިލާއި ޑްރޯން (ޔޫއޭވީ) ހަމަލާތައް އައުމުގެ ނުރައްކާ އަދިވެސް އެބައޮތް ކަމަށާއި، އެހެންކަމުން އެމްބަސީއަށް އެއްވެސް މީހަކު ނުދިއުމަށް އެދޭ ކަމަށެވެ.

މީގެ އިތުރުން، އެމެރިކާ އެމްބަސީގެ މުވައްޒަފުން ތިބީ ރައްކާތެރި ތަންތަނަށް ވަދެ (ޝެލްޓަރިން އިން ޕްލޭސް) ކަމަށްވެސް އެ ބަޔާނުގައި ބުނެފައިވެއެވެ.

ކުވެއިތުގެ ދާޚިލީ ވުޒާރާއިން ބުނި ގޮތުގައި، ހޯމަ ދުވަހުގެ ފަތިހުގެ ވަގުތެއްގައި އެ ގައުމަށް އަމާޒުކޮށް ފޮނުވާލި ގިނަ އަދަދެއްގެ ޑްރޯންތަކެއް ވަނީ ވައިގެ ތެރޭގައި ހުއްޓުވާފައެވެ.

ކަމާބެހޭ ފަރާތްތަކުން މައުލޫމާތު ދޭ ގޮތުގައި، އިރާނުން ގަލްފުގެ ގައުމުތަކުގައި ހުރި އެމެރިކާގެ މަސްލަހަތުތަކަކަށް ދެމުންދާ ހަމަލާތަކުގައި މިހާތަނަށް ފަސް މީހަކު ވަނީ މަރުވެފައެވެ. މީގެ ތެރޭގައި ކުވެއިތުން މަރުވި މީހަކުވެސް ހިމެނެއެވެ.

ހޯމަ ދުވަހުގެ ކުރީކޮޅު، ގަލްފުގެ ސިޓީތައް ކަމަށްވާ އަބޫދާބީ، ދުބާއީ، ދޯހާ، މަނާމާ އަދި ކުވެއިތުގެ އެކި ސަރަހައްދުތަކުން ބާރުގަދަ ގޮވުންތަކުގެ އަޑު އިވިފައިވާ ކަމަށް އޭއެފްޕީގެ ކޮރެސްޕޮންޑެންޓުންނާއި އެ ސިޓީތަކުގެ ރައްޔިތުން ވަނީ ރިޕޯޓުކޮށްފައެވެ.