އެމެރިކާ އިން ޚާމަނާއީ އަވަހާރަ ކޮށްލުން، ރައީސް މައުމޫން ކުށްވެރި ކުރައްވައިފި
ހޯމަ ދުވަހުގެ ރޭ އެކްސްގައި ކުރެއްވި ޕޯސްޓެއްގައި ރައީސް މައުމޫން ވިދާޅުވެފައި ވަނީ، ޚާމަނާއީ އަވަހާރަ ކޮށްލުން، މުސްލިމެއްގެ ޙައިސިއްޔަތުން އެމަނިކުފާނު ކުށްވެރި ކުރައްވާ ކަމަށް. އެ ޕޯސްޓުގައި ރައީސް މައުމޫން ވަނީ ޚާމަނައީގެ ފުރާނަފުޅަށް ހެޔޮ ރަޙުމަތް ލައްވައި، ޚާމަނާއީގެ އާއިލާ އަދި އީރާންގެ ރައްޔިތުންނަށް ކެތްތެރިކަން ދެއްވުން އެދިވަޑައިގެންފައި.
ކުރީގެ ރައީސް މައުމޫން ޢަބްދުލް ޤައްޔޫމް | ސޯޝަލް މީޑިއާ
އެމެރިކާ އިން ދިން ހަމަލާއެއްގައި އީރާންގެ އެންމެ މަތީ ވެރިޔާ، އަދި ރޫހާނީ ލީޑަރު އާޔަތުﷲ އަލީ ޚާމަނައީ އަވަހާރަކޮށްލި ކޮށްލުން ، ރާއްޖޭގެ ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމް އެކަން ކުށްވެރި ކުރައްވައިފި އެވެ.
އެމެރިކާ އާއި އިޒްރޭލް އެކުވެގެން އީރާން އަށް ހަމަލާ ދޭން ފެށީ ހޮނިހިރު ދުވަހު އެވެ. ކުއްލި ގޮތަކަށް ދޭން ފެށި ހަމަލާ ތަކުގައި ޚާމަނާއީ އަވަހާރަވެފައިވާކަން ކަށަވަރު ވެފައި ވަނީ އާދީއްތަ ދުވަހުގެ ފަތިހު އެވެ. އީރާން އިން ވަނީ ޚާމަނާއީ އަވަހާރަ ވުމުގެ ހިތާމަ ފާޅު ކުރަން ރަސްމީ 40 ދުވަސް ކަނޑައަޅައި، ހަތް ދުވަހަށް ސަރުކާރު ބަންދު ކުރަން ނިންމައިފަ އެވެ.
ހޯމަ ދުވަހުގެ ރޭ އެކްސްގައި ކުރެއްވި ޕޯސްޓެއްގައި ރައީސް މައުމޫން ވިދާޅުވެފައި ވަނީ، ޚާމަނާއީ އަވަހާރަ ކޮށްލުން، މުސްލިމެއްގެ ޙައިސިއްޔަތުން އެމަނިކުފާނު ކުށްވެރި ކުރައްވާ ކަމަށެވެ. އެ ޕޯސްޓުގައި ރައީސް މައުމޫން ވަނީ ޚާމަނައީގެ ފުރާނަފުޅަށް ހެޔޮ ރަޙުމަތް ލައްވައި، ޚާމަނާއީގެ އާއިލާ އަދި އީރާންގެ ރައްޔިތުންނަށް ކެތްތެރިކަން ދެއްވުން އެދިވަޑައިގެންފަ އެވެ.
އެމެރިކާގެ ހަމަލާއެއްގައި އީރާންގެ އެންމެ މަތީވެރިޔާ ޚާމަނާއީ އަވަހާރަ ކޮށްލާފައިވާއިރު، ރާއްޖޭގެ ސަރުކާރުން އެކަން ކުށްވެރި ކޮށްފައި ނުވާތީ ގިނަ ބަޔަކު އަންނަނީ އެކަމަށް ފާޑު ކިޔަމުންނެވެ. މީގެ އިތުރުން، ރާއްޖެ އިން އީރާން އަށް ތައުޒިޔާ ފޮނުވާފައި ނުވާއިރު، ހިތާމަ ފާޅު ކުރުމުގެ ގޮތުން ރާއްޖޭގެ ޤައުމީ ދިދަ ބައި ދަނޑި އަށް ވެސް ތިރި ކޮށްފައި ނުވެ އެވެ. ޚާމަނާއީ އަވަހާރަ ކޮށްލިތާ ދެ ދުވަސްވީއިރު، ރާއްޖޭގެ ރައީސް ޑޮކްޓަރު މުޙައްމަދު މުޢިއްޒު ވެސް އެކަން ކުށްވެރި ކުރައްވާފައި ނުވެ އެވެ.
ދުނިޔޭގެ ގިނަ ޤައުމުތަކާއި، ގިނަ ލީޑަރުން ތަކެއް އަންނަނީ އެމެރިކާ އިން ޚާމަނާއީ އަވަހާރަ ކޮށްލުން ކުށްވެރި ކުރަމުންނެވެ. އޭގެ ތެރޭގައި އިސްލާމީ ޤައުމު ތަކުގެ އިތުރުން، އިސްލާމް ނޫން ޤައުމުތައް ވެސް ހިމެނެ އެވެ. އެގޮތުން ރަޝިޔާ އާއި، ޗައިނާ އިން ވެސް ވަނީ އެކަން ކުށްވެރި ކޮށްފަ އެވެ.
