ގޮވުމެއްގެ އަޑާ އެކު، ސައުދީގައި ހުންނަ އެމެރިކާގެ އެމްބަސީ އިން ކަޅު ދުން ގަނޑެއް

ސައުދީ އަރަބިއްޔާގެ ވެރި ރަށް ރިޔާޟްގައި ހުންނަ އެމެރިކާގެ އެމްބަސީ ހުންނަ ސަރަހައްދުން ބާރުގަދަ ގޮވުމެއްގެ އަޑު އިވި، އެ ސަރަހައްދުގައި އަލިފާނުގެ ހާދިސާއެއް ހިނގާފައިވާ ކަމަށް ރިޕޯޓު ކޮށްފި އެވެ.

އަންގާރަ ދުވަހުގެ ފަތިހުގެ ވަގުތެއްގައި ހިނގި މި ހާދިސާގެ މައުލޫމާތު ތިން މީހަކު ވަނީ ރޮއިޓާސް އަަށް ކަށަވަރު ކޮށްދީފަ އެވެ. މި ހާދިސާގައި އަލިފާން ގަނޑެއް ރޯވެފައިވާ ކަމަށް ބުނެފައިވެ އެވެ.

މި ހާދިސާ ހިނގަން މެދުވެރިވި ސަބަބާއި، އެކަމުގެ ތަފްސީލު މިހާތަނަށް ކަށަވަރު ކުރެވިފައި ނުވެ އެވެ. އަދި މިކަމާ ގުޅޭ ގޮތުން އެމެރިކާގެ އެމްބަސީގެ ތަރުޖަމާނު ވެސް ވަގުތުން ޖަވާބެއް ދެއްްވާފައި ނުވެ އެވެ.

ނަމަވެސް ސައުދީގެ ޑިފެންސް މިނިސްޓްރީގެ ތަރުޖަމާނާ ހަވާލާދީ ބުނެފައި ވަނީ، އެމެރިކާގެ އެމްބަސީ އަަށް ދެ ޑްރޯން ހަމަލާ އަމާޒުވެފައިވާ ކަމަށެވެ.

މި ހާދިސާގައި އެއްވެސް މީހަކަށް އަނިޔާވި ކަމެއް، ނުވަތަ އެމްބަސީގެ އިމާރާތަށް ބޮޑު ގެއްލުމެއް ލިބުނު ކަމެއް ވެސް ސާފެއް ނުވެ އެވެ. ކަމާ ބެހޭ ފަރާތްތަކުން މިހާރު ގެންދަނީ މި ހާދިސާ ތަހުގީގު ކުރަމުން ކަމަށް ރިޕޯޓުތައް ބުނެ އެވެ. 

އެމެރިކާގެ އެމްބަސީ ހިމެނޭ ސަރަހައްދުން ބާރު ގަދަ ގޮވުމެއްގެ އަޑު އިވުމާ އެކު، މިހާރު އެ ސަރަހައްދުގެ ސަލާމަތީ ކަންކަން ވެސް ވަނީ އިތުރަށް ވަރުގަދަ ކޮށްފަ އެވެ.

ގއ