ކުރިއަށް އޮތީ ބޮޑެތި ހަމަލާތަކެއް ކަމަށާއި، އީރާން އަށް އެއްގަމު ސިފައިން ފޮނުވުމުގެ ފުރުސަތު އޮތް ކަމަށް ޓްރަމްޕް ވިދާޅުވެއްޖެ

އީރާންއާ ދެކޮޅަށް އެމެރިކާ އިން ފަށާފައިވާ ހަނގުރާމައިގައި، އެމެރިކާގެ އެއްގަމު ސިފައިން އީރާން އަށް ފޮނުވުމުގެ ފުރުސަތު އޮތް ކަމަށް އެމެެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ހޯމަ ދުވަހު ޓްރަމްޕް ވަނީ އީރާން އަށް ދެމުން އަންނަ ހަމަލާތައް ވަރުގަދަކޮށް، ބޮޑު ރާޅެއްގެ ގޮތުގައި އެ ހަމަލާތައް ދޭނެ ކަމުގެ އިންޒާރު ވެސް ދެއްވައިފަ އެވެ. 

ޓްރަމްޕްގެ އަމުރުފުޅަށް އެމެރިކާ އިން ވަނީ އީރާންއާ ދެކޮޅަށް ހޮނިހިރު ދުވަހު ހަމަލާ ދޭން ފަށައިފަ އެވެ. މިހާތަނަށް ދެމުންދާ ހަމަލާތައް ބިނާ ވެފައި ވަނީ ވައިގެ މަގުންދޭ މިސައިލް އަދި ބޮމުގެ

ހަމަލާ ތަކަށެވެ. ނަމަވެސް، އެއްގަމު ސިފައިން ފޮނުވުމަކީ ކުރާނެ ކަމެއް ނޫން ކަމަށް ވިދާޅުވާން ޓްރަމްޕް ވަނީ އިންކާރު ކުރައްވައިފަ އެވެ. އެއްގަމު ސިފައިން ބޭނުން ކުރުމަކީ ގިނަ އަދަދެއްގެ ސިފައިން މަަރުވުމުގެ ފުރުސަތު ވެސް އޮތް ކަމެކެވެ.

އީރާން އަށް ސިފައިން ފޮނުވުމާ ގުޅޭ ގޮތުން ނިއުޔޯކް ޕޯސްޓަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އެއްގަމު ސިފައިން ބޭނުން ކުރުމާ މެދު އޭނާގެ އެއްވެސް ކަންބޮޑުވުމެއް ނެތް ކަމަށެވެ. ކޮންމެ ރައީސް އަކު ވެސް އެއްގަމު ސިފައިން ބޭނުން ނުކުރާނެ ކަމަށް ވިދާޅުވި ނަމަވެސް، އޭނާ އެފަދަ ވައުދެއް ނުވާނެ ކަމަށް ޓްރަމްޕް ވިދާޅުވި އެވެ. 

ހަމަ އެހެންމެ، މިވަގުތު ސިފައިން ބޭނުން ނުވެދާނެ ކަމަށް ބެލެވުނު ނަމަވެސް، ޒަރޫރީ ޙާލަތެއްގައި އެކަން ކުރައްވާނެ ކަމަަށް ވެސް ޓްރަމްޕް ވަނީ ފާހަގަ ކުރައްވައިފަ އެވެ.

މީގެ އިތުރުން ސީއެންއެން އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އީރާނަށް ދޭ ހަމަލާތައް ކުރިއަށް އޮތް ތަނުގައި އިތުރަށް ވަރުގަދަ ވެގެން ދާނެ ކަމަށެވެ. އީރާނަށް އަދި އެންމެ ވަރުގަދަ ހަމަލާތައް ދޭން ނުފަށާ ކަމަށާއި، އެންމެ ބޮޑު ހަމަލާތައް ވަރަށް އަވަހަށް ފެނިގެން ދާނެ ކަމަށް ވެސް ޓްރަމްޕް ވިދާޅުވެފައިވެ އެވެ. ނަމަވެސް އެ ހަމަލާ ތަކުގެ އިތުރު ތަފްސީލެއް އޭނާ ހާމަ ކުރައްވާފައި ނުވެ އެވެ.

އެމެރިކާ އާއި އިޒްރޭލް އެކުވެގެން އީރާނަށް ވަނީ މިހާތަނަށް ގިނަ ހަމަލާ ތަކެއް ދީފަ އެވެ. އޭގެ ތެރޭގައި އީރާންގެ މިސައިލް ސައިޓުތަކާއި، ކަނޑުގެ ސިފައިންގެ މަރުކަޒުގެ އިތުރުން، ކޮމާންޑް އެންޑް ކޮންޓްރޯލް ސެންޓަރުތައް ވެސް ހިމެނެ އެވެ. 

އެމެރިކާގެ ހަމަލާ ތަކުގެ ރައްދުގައި އީރާން އިން ވެސް ގެންދަނީ ހަމަލާ ދެމުންނެވެ. އެގޮތުން މެދު އިރުމަތީގައި ހުރި އެމެރިކާގެ ބޭސް ތަކަށް އީރާން އިން ހަމަލާ ދެމުން ގެންދެ އެވެ.