ޓްރަމްޕްގެ ކަރުގައި ރަތް ކުލައިގެ ފިތް ގަނޑެއް!

އެމެރިކާގެ ރައީސް ޑޮނަލްޑް ޓްރަމްޕްގެ ކަރުގައި ރަތް ކުލައި ފިތް ގަނޑެއް ހުއްޓާ ފެނުމުން، ގިނަ ބައެއްގެ ސަމާލުކަން އެކަމަށް ލިބިއްޖެ އެވެ.

ޓްރަމްޕްގެ ޞިއްޙީ ޙާލުކޮޅާ ގުޅޭ ގޮތުން މީގެ ކުރިން ވެސް ސުވާލު އުފެދިފައިވާއިރު، އޭނާގެ އަތް ތިލައިގައި ލޭ ގަނޑުވެފައިވާ ހުރި ކަމުގެ ނިޝާން ތަކެއް ވެސް ފެނިފައިވެ އެވެ. މީގެ އިތުރުން ޓްރަމްޕްގެ ފައި ދުޅަވެ، ޞިއްޙީ ޙާލަތާ މެދު ސުވާލު ތަކެއް އުފެދި، ގިނަ ބަހުސް ތަކެއް ކުރެވުނެވެ. 

އޭގެ ފަހުން ހޯމަ ދުވަހު ޓްރަމްޕްގެ ކަރުގައި ރަތް ކުލައިގެ ފިތް ގަނޑެއް ފާހަގަވާން ހުރުމުން، ގިނަ ބަޔަކު އަނެއްކާ ވެސް އޭނާގެ ޞިއްޙީ ޙާލު ކޮޅާ ގުޅޭ ގޮތުން ސުވާލު އުފެއްދި އެވެ. ނަމަވެސް، ޓްރަމްޕްގެ ޑޮކްޓަރު، ޑޮކްޓަރު ސޯން ބަރްބަބެލާ ނެރުއްވި ބަޔާނެއްގައި ވިދާޅުވެފައި ވަނީ،  ޓްރަމްޕްގެ ކަރުގެ ކަނާއަތް ފަރާތުން ފެންނަން ހުރި ފިތް ގަނޑަކީ، އޭނާ ބޭނުން ކުރާ ކްރީމެއްގެ ސަބަބުން ނަގާފައިވާ ފިތް ގަނޑެއް ކަމަށެވެ. އަދި އެއީ ހަމުގެ ބަލި ތަކުން ރައްކާތެރި ވުމަށް ޓްރަމްޕް ބޭނުން ކުރައްވާ ކްރީމެއް ކަމަށް ހާމަ ކޮށްފައިވެ އެވެ. 

އިތުރަށް ޑޮކްޓަރު ވިދާޅުވީ، ޓްރަމްޕްގެ މި ފަރުވާ ހަފުތާއެއްގެ މުއްދަތަށް ކުރިއަށް ގެންދާނެ ކަމަށެވެ. ނަމަވެސް، އެ ކްރީމްގެ ސަބަބުން ހަންގަނޑުގައި ފެންނަން ހުންނަ ރަތްކަން، ކުރިއަށް އޮތް ތަނުގައި ނުހުންނާނެ ކަަމަށް ވެސް ޑޮކްޓަރު ވަނީ ލަފާ ކޮށްފަ އެވެ. ޓްރަމްޕްގެ ޑޮކްޓަރު ނެރުއްވި ބަޔާނުގައި، މިފަރުވާ ޓްރަމްޕް ހޯއްދަވަން ޖެހުނު ސަބަބެއް ބުނެދީފައި ނުވެ އެވެ. އަދި ޓްރަމްޕްގެ ޞިއްޙީ ޙާލު ކޮޅާ ގުޅޭ ގޮތުން ކުރެވޭ ސުވާލު ތަކަށް، މި ފަހުން ރިޔާސީ ގަނޑުވަރު ވައިޓް ހައުސް އިން އެއްޗެއް ބުނެފައި ނުވެ އެވެ. 

ޓްރަމްޕްގެ ކަރުގައި ހުރި ރަތް ކުލައިގެ މި ފިތް ގަނޑު އެންމެ ފުރަތަމަ ފާހަގަވީ، ހޯމަ ދުވަހު އޮތް "މެޑަލް އޮފް އޮނާ" އެރުވުމުގެ ރަސްމިއްޔާތުގެ ތެރެއިންނެވެ. އުމުރުފުޅުން 79 އަހަރުގެ ޓްރަމްޕް އަކީ، އެމެރިކާގެ ރައީސް ކަމުގެ ހުވާ ކުރެއްވި އެންމެ ދުވަސްވީ ރައީސް އެވެ. ޓްރަމްޕްގެ ޞިއްޙީ ޙާލު ކޮޅާ ގުޅޭ ގޮތުން މީގެ ކުރިން ވެސް ގިނަ ސުވާާލު ތަކެއް އޮތީ އުފެދިފަ އެވެ. 

ޓްރަމްޕްގެ ޞިއްޙީ ޙާލު ކޮޅާ ގުޅޭ ގޮތުން ސުވާލު އުފެދިފައި އޮތްއިރު، މީގެ ކުރިން ވެސް ޓްރަމްޕް ވަނީ ޞިއްޙީ ޓެސްޓު ތަކެއް ހައްދަވައިފަ އެވެ.