އީރާާންގެ އިންޒާރުތަކާ ދެކޮޅަށް، ޓްރަމްޕް ވަރުގަދަ އިންޒާރެއް ދެއްވައިފި

އެމެރިކާ އަށް ވަރުގަދަ ހަމަލާ ތަކެއް ދޭނެ ކަމަށް ބުނެ އީރާާނުން އިންޒާރު ދެމުން އަންނައިރު، އެކަމާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ވަރުގަދަ އިންޒާރެއް ދެއްވައިފި އެވެ. 

އެގޮތުން ޓްރަމްޕް އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މިއަދުގެ ވަގުތެއްގައި އީރާނުން އެމެރިކާ އަށް ހަމަލާ ތަކެއް ދޭން އުޅޭ ކަމަށެެވެ. އަދި އެއީ މީގެ ކުރިން ދުވަހަކު ވެސް ދީފައި ނުވާ ފަދަ ވަރުގަދަ ހަމަލާ ތަކެއް ކަމަށް އީރާން އިން ބުނަމުންދާ ކަމަށް ޓްރަމްޕް ފާހަގަ ކުރެއްވި އެވެ. 

އެއާ އެކު ޓްރަމްޕް އީރާނަށް ގޮވާލައްވާފައި ވަނީ އެފަދަ ފިޔަވަޅެއް ނޭޅުމަށެވެ. އެގޮތުން އީރާނުން އެމެރިކާ އަށް ހަމަލާ ދީފި ނަމަ، އެމެރިކާ އިން ދޭ ހަމަލާ މާ ވަރުގަދަ ވާނެ ކަމުގެ އިންޒާރު ވެސް ޓްރަމްޕް ވަނީ ދެއްވައިފަ އެވެ. އެމެރިކާ އިން ދެން ހަމަލާ ދޭނީ މީގެ ކުރިން ދުވަހަކު ވެސް ދެކިފައި ނުވާ ފަދަ ވަރުގަދަ ބާރަކާ އެކު ކަމަށް ޓްރަމްޕް ވަނީ ވިދާޅުވެފަ އެވެ. 

މެދު އިރުމަތީގެ މަސްރަހު ވަރަށް ބޮޑަށް ނުތަނަވަސްވެފައިވާ މި ދަނޑިވަޅުގައި، ޓްރަމްޕްގެ މި ވާހަކަ ތަކަކީ އީރާނުން ދީފާނެ ހަމަލާ އަކަށް ފާރަވެރިވެ، އެމެރިކާގެ އަސްކަރީ ޤާބިލުކަން ދެއްކުމުގެ ގޮތުން ދެއްވި އިންޒާރެއް ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ. ޓްރަމްޕް މިހެން ވިދާޅުވެފައިވާއިރު، އީރާނާ ދެކޮޅަށް ހަމަލާ ދޭން ފެށީ ވެސް އެމެރިކާ އާއި އިޒްރޭލް އެކުވެގެންނެވެ.

އެމެރިކާ އިން ދިން ހަަމަލާ ތަކުގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލާފައިވާއިރު، އީރާނުން ވަނީ އެކަމުގެ ބަދަލު ހިފާނެ ކަމުގެ އިންޒާރު ވެސް ދީފަ އެވެ. އެގޮތުން އީރާނުގެ ރައީސް މަސްއޫދު ޕެޒެޝްކިއާން ނެރުއްވި ބަޔާނެއްގައި ވަނީ، އީރާން އިން ދޫ ނުދޭނެ ކަަމަށް ވިދާޅުވެ، ހަމަލާ ދޭނެ ކަމުގެ އިންޒާރު ދެއްވައިފަ އެވެ.