އީރާނަށް މިނިވަން ކަމުގެ ވަގުތު އައިސް ޖެހިއްޖެ، މަރުން ސަލާމަތެއް ނުވާނެ: ޓްރަމްޕް

އީރާންއާ ދެކޮޅަށް ހަމަލާ ތަކެއް ދިނުން އިއުލާން ކުރައްވައި، އެ ޤައުމުގެ ނޭވީ އާއި މިސައިލް ތަންތަން ހުސް ކުރުމުގެ ވައުދުވެ ވަޑައިގަންނަވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އިޒްރޭލް އާއި އެމެރިކާ އިން އީރާނަށް ހަމަލާ ދިން ފަހުން، ޓްރަމްޕް ދެއްވި ވީޑިއޯ މެސެޖެއްގައި އޭނާ ވިދާޅުވީ، އީރާން އަށް މިނިވަން ކަމުގެ ވަގުތު އައިސް ޖެހިފައިވާ ކަމަށާއި، އީރާންގެ ރައްޔިތުންނަށް މިނިވަންކަން ލިބޭނެ ކަމަށެވެ. 

ޓްރަމްޕްގެ ބަޔާނުގައި ވިދާޅުވީ، މި ހަމަލާގެ ލަނޑު ދަނޑިތައް ވަރަށް ބޮޑު ކަމަށާއި، 1979 ވަަނަ އަހަރުގެ އީރާންގެ އިންޤިލާބުން ފެށިގެން ވެރިކަމުގައި ތިބި އިސްލާމީ ޖުމްހޫރިއްޔާ ވެރިކަމުން ވައްޓާލުމުގެ ނިޔަތް އޮތް ކަމަށް ޓްރަމްޕް ވިދާޅުވެފައިވެ އެވެ. 

ސޯޝަލް މީޑިއާގައި ޓްރަމްޕް އާންމު ކޮށްފައިވާ ބަޔާނުގައި އޭނާ ވިދާޅުވީ، އީރާންގެ މިސައިލްތައް ނައްތާލައި، މިސައިލް އުފައްދާ ތަންތަން ބިމާ ހަމަހަމަ ކުރާނެ ކަމަށެވެ. އެއީ ފުރިހަމަ އަށް ނައްތާލާނެ ކަމެއް ކަމަށާއި، އީރާންގެ ބާރުވެރިކަން އެއްކޮށް ނެތި ކޮށްލާނެ ކަމުގެ އިންޒާރު ޓްރަމްޕް ދެއްވާފައިވެ އެވެ.

އީރާންގެ ރައްޔިތުންނަކީ ފަޚުރުވެރި ބައެއް ކަމަށް އިޝާރާތް ކުރައްވައި ޓްރަމްޕް ވިދާޅުވީ، އެ ޤައުމުގެ ރައްޔިތުންނަށް މިހާރު މިނިވަން ކަމުގެ ވަގުތު އައިސް ޖެހިފައިވާ ކަމަށެވެ. ރައްޔިތުން ގޭގައި ރައްކާތެރި ކަމާ އެކު ތިބުމަށް އިލްތިމާސް ކުރައްވައި ޓްރަމްޕް ވަނީ، ބޭރަށް ނުނިކުތުމަށް ވެސް އިލްތިމާސް ކުރައްވާ ކަމަށެވެ. 

އީރާންގެ ބޭރުގައި ވަރަށް ބޮޑު ނުރައްކާތެރި ކަމެއް އޮތް ކަމަށާއި، ހުރިހާ ސަރަަހައްދަކާއި ދިމާލެއްގައި ހަމަލާތައް ދޭނެ ކަމަށް ޓްރަމްޕް ވިދާޅުވި އެވެ. އަދި ހަމަލާތައް ނިމުމުން، ރައްޔިތުން ނިކުމެ އީރާންގެ ސަރުކާރު ހިފުމާއި، ރައްޔިތުންގެ ބާރުގެ ދަށަށް ގެނައުމަށް ޓްރަމްޕް ވަނީ ގޮވާލައްވައިފަ އެވެ. 

އެއާ އެކު، އީރާންގެ ސިފައިންނަށް ޓްރަމްޕް ގޮވާލައްވާފައި ވަނީ ހަތިޔާރު ބެހެއްޓުމަށެވެ. އީރާންގެ ހުރިހާ ބާރު ތަކަށް އެހެން ގޮވާލައްވައި ޓްރަމްޕް ވިދާޅުވީ، ހަތިޔާރު ބަހައްޓައިފި ނަަމަ އިސްލާމީ އިންޤިލާބުގެ މެމްބަރުންނާއި، ސިފައިން އަދި ފުލުހުންނަށް ރައްކާތެރިކަން ލިބޭނެ ކަމަށެވެ. އެހެން ނޫން ނަމަ، އެ މީހުން ވެސް މަރުން ސަލާމަތް ނުވާނެ ކަމަށް ޓްރަމްޕް ވިދާޅުވި އެވެ.