ޚާމަނާއި އަވަހާރަވި ވާހަކަ ދޮގު ކޮށްފި، އެކަމަކު ދަރިކަނބަލުންނާއި ކާފަ ދަރިކަލުން އަވަހާރަ ވެއްޖެ

އީރާންގެ ރޫހާނީ ލީޑަރު އާޔަތު الله އަލީ ޚާމަނާއީ އަވަހާރަ ވެއްޖެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ކުރެއްވި އިއުލާން އީރާނުން ދޮގު ކޮށްފި އެވެ.

އެގޮތުން އީރާންގެ އިސްވެރިންނާއި، އެ ޤައުމުގެ ރަސްމީ މީޑިޔާ ތަކުން އެ ވާހަކަ ދޮގު ކޮށްފައިވާ ކަމަށް އަލް ޖަޒީރާގައި ބުނެފައިވެ އެވެ. 

އެއާ އެކު، މިކަމުގައި އެމެރިކާ އިން ހާމަ ކުރަމުންދާ މައުލޫމާތާއި، އީރާން އިން ދެމުން ގެންދާ މައުލޫމާތު ތަކުގައު ތަފާތު ތަކެއް ހުރިކަން ފާހަގަވެފައިވެ އެވެ. 

އީރާންގެ ފޮރިން މިނިސްޓަރު އައްބާސް އަރާގްޗީ ވަނީ ކުރިން ވެސް ޚާމަނާއީ ސަލާމަތުން ހުންނެވި ކަމަށް ވިދާޅުވެފަ އެވެ. ނަމަވެސް އޭގެ ފަހުން ޓްރަމްޕް ވަނީ ޚާމަނާއީ އަވަހާރަވެފައިވާ ކަމަށް އިއުލާން ކުރައްވައިފަ އެވެ.

އީރާންގެ އެންމެ އިސްވެރިޔާގެ އޮފީހުގެ ޕަބްލިކް ރިލޭޝަންސްގެ ވެރިޔާ ވިދާޅުވެފައި ވަނީ، އެއީ އީރާންއާ ދެކޮޅަށް ދުޝްމަނުން ހިންގާ ނަފްސާނީ ކެމްޕެއިނެއް ނުވަތަ ހަނގުރާމައެއް ކަމަށެވެ.

އީރާންގެ ސަރުކާރާ ގުޅިފައިވާ ނޫސް ތަކުން ވެސް ވަނީ އެ ވާހަކަ ދޮގު ކޮށްފަ އެވެ. އެގޮތުން އެ ނޫސް ތަކުން ބުނެފައި ވަނީ، ޚާމަނާއީ ހުންނެވީ ވަރަަށް ވަރުގަދަ ޢަޒުމެއްގައި ކަމަށާއި، އޭނާ ހުންނެވީ ވެރިކަމުގައި ކަމަށެވެ. މީގެ އިތުރުން އީރާންގެ ޤާނޫނު ހަދާ މަޖިލީހުގެ ދެ މެމްބަރަކު ވެސް ވަނީ އެކަން ދޮގު ކޮށްފަ އެވެ. 

މިވަގުތު އީރާންގެ އެންމެ ބޮޑު ސްޓޭންޑަކީ އެމެރިކާ އިން ފަތުރާ މި ޚަބަރުތައް ވަރުގަދަ ގޮތެއްގައި ދޮގު ކުރުމެވެ. 

ނަމަވެސް، ހޮނިހިރު ދުވަހުގެ ހަމަލާ ތަކުގައި ޕާސްޗާ ސަރަހައްދު ކައިރީގައި ވަރަށް ބޮޑެތި އަދި ގިނަ ގޮވުން ތަކެއްގެ އަޑު އިވިފައިވެ އެވެ. އެއީ އީރާންގެ އެންމެ އިސްވެރިޔާގެ އިތުރުން، އެ ޤައުމުގެ ރައީސްގެ އޮފީސް ހުންނަ ސަރަހައްދެވެ. އަދި ސިފައިންގެ ބައެއް މަރުކަޒު ތަކާއި، ޔުނިވާސިޓީތައް ވެސް ހުންނަ ސަރަހައްދެވެ.

އެހެންކަމުން މިއީ ކަށަވަރު ނުވާ އަދި ބަދަލު ވަމުން އަންނަ ޙާލަތެއް ކަމަށް މާހިރުން ބުނެ އެވެ. އެމެރިކާގެ އިއުލާން އަށް ބާރު ލިބޭ، އަދި އެއީ ތެދެެއް ކަމަށް ބުނާ އެއްވެސް މައުލޫމާތެއް އީރާން އިން ލިބިފައި ނުވެ އެވެ. 

ނަމަވެސް އީރާންގެ އައިއާރުޖީސީއާ ގުޅުން އޮންނަ ނިއުސް އެޖެންސީ އިން ބުނެފައި ވަނީ ޚާމަނާއީގެ ދަރިކަނބަލުން އަދި ކާފަ ދަރިފުޅު އަވަހާރަ ކޮށްލާފައިވާ ކަމަށެވެ. އެކަން ރިޕޯޓު ކޮށްފައި ވަނީ އަލް ޖަޒީރާގަ އެވެ.