އިންތިޚާބު އެއްކުރަން ނޫނެކޭ ކެމްޕެއިން: "ބެނާތަކާއި އެކު އެމްޑީޕީ އިން މި ނުކުތީ ގަދަ ރޫހެއްގައި ކެމްޕެއިން އަށް"
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ ގުޅޭގޮތުން ނަގާ ފެންނަ ނުފެންނަ ވޯޓުގައި "ނޫނެކޭ" ބުނުމަށް ގޮވާލައި އެމްޑީޕީން މާލޭގައި ބެނާ ދެމުމުގެ ހަރަކާތެއް ފަށައިފި. މިކަމާ ދެކޮޅަށް މާޗު މަހުގެ 21 ގައި ބޮޑު މުޒާހަރާއެއް ބޭއްވުމަށް ނިންމާފައިވާ އިރު، އިންތިޚާބުތައް އެއްކޮށްލުމަށް ރައީސުލްޖުމްހޫރިއްޔާ ނެރުއްވި ގަރާރު ބާތިލުކުރުމަށް ވަނީ ކޯޓަށް ވެސް އެމައްސަލަ ހުށައަޅާފައި.
އިންތިޚާބު އެއްކުރަން ނޫނެކޭ ކެމްޕެއިން ބެނާ ދެމުން | ރާއްޖެ އެމްވީ
އިންތިޚާބު އެއްކުރުމަށް ނޫނެކޭ ބުނުމަށް ގޮވާލައި އެމްޑީޕީ އިން ބެނާތަކާއި އެކު ނުކުތީ ފޯރިއާއި އެކުގައި ގަދަ ރޫހެއްގައި ކަމަށާއި ރައްޔިތުންގެ ބާރުވެރިކަން ނިގުޅައިގަންނަތަން ބަލަން އެމްޑީޕީ އިން ނުތިބޭނެ ކަމަށް އެމްޑީޕީގެ ވަގުތީ ޗެއަރޕަރސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ ވިދާޅުވެއްޖެ އެވެ.
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާއި މެދު ނެގުމަށް ނިންމާފައިވާ ރައްޔިތުންގެ ފެންނަ ނުފެންނަ ވޯޓުގައި ނޫނެކޭ ބުނުމަށް އެމްޑީޕީ އިން ފަށާފައިވާ ކެމްޕެއިންގެ ތެރެއިން ހޮނިހިރު ދުވަހުގެ ރޭ އެ ޕާޓީ އިން ވަނީ މާލޭގެ އެކި ސަރަހައްދުތަކުގައި ބެނާ ދެމުމުގެ މަސައްކަތް ކޮށްފަ އެވެ.
އެ ހަރަކާތުގެ ތެރެއިން ރާއްޖެ އެމްވީ އަށް މައުލޫމާތުދެއްވަމުން، ޣަފޫރު ވިދާޅުވީ ދެ އިންތިޚާބު އެއްކޮށްލުން ހުއްޓުވުމަށްޓަކައި އެމްޑީޕީ އިން ގިނަ މަސައްކަތް ތަކެއް ކުރަމުން ގެންދާނެ ކަމަށެވެ. އެގޮތުން މުޅި ރާއްޖޭގައި ކެމްޕެއިން ކުރިއަށް ގެންދިޔުމަށް ނިންމާފައިވާ ކަމަށާއި އިންތިޚާބުތައް އެއްކޮށްލާ ހަގީގީ ބޭނުން ރައްޔިތުންނަށް ބުނެދޭން ޖެހޭ ކަމަށް ޣަފޫރު ވިދާޅުވި އެވެ. ޣަފޫރު ވިދާލުވީ މާޗު މަހުގެ 21 ވަނަ ދުވަހު އެކަމާ ދެކޮޅަށް ބޮޑު މުޒާހަރާއެއް ކުރުމަށް ނިންމާފައިވާ ކަމަށެވެ.
"އިންތިޚާބު އެއްކޮށްލުން މިއީ ހެޔޮވާވަރުގެ ކަމެއް ނޫން. 5 އަަހަރު ތެރޭގައި 3 ފަހަރު ރައްޔިތުން ކައިރި އަށް ދާން ޖެހޭ. 1 ފަހަރު އޭގެ ބަދަލުގައި ރައްޔިތުން ކައިރި އަށް ގޮސް، އިންތިޚާބަށް ދާ ދިއުން ބަލަ އެއް ނުގަނެވޭ. ރައްޔިތުންގެ ބާރުވެރިކަން ނިގުޅައިގަންނަ ކޮންމެ ފަހަރަކު އެމްޑީޕީ ތެދުވާނެ." އޭނާ ވިދާޅުވި އެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ތާރީޚެއްގައި ބޭއްވުމާ މެދު ގޮތެއް ނިންމުމަށް ރެފަރެންޑަމް ވޯޓެއް ނެގުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ނެރުއްވި ޤަރާރު ބާތިލު ކުރުމަށް، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ވަނީ ކޯޓަށް މައްސަލަ ހުށައަޅައިފައެވެ.
ދެ އިންތިޚާބު އެއްކޮލުމަށް ނަގާ ރެފަރަންޑަމްއާ ގުޅޭ ޤަރާރު ރައީސް މުޢިއްޒު ނެރުއްވާފައި ވަނީ، ފެބްވަރުވަރީ މަހުގެ 16 ވީ ހޯމަ ދުވަހު އެވެ.
