އީރާނުގެ ސިޔާދަތު ރައްކާތެރި ކުރުމުގެ މަސައްކަތަށް ޗައިނާ އިން ތާއީދު ކުރާނެ

އިޒްރޭލް އާއި އެމެރިކާ އިން އީރާން އަށް ދެމުން އަންނަ ހަމަލާތަކާ ގުޅިގެން، އީރާންގެ ސިޔާދަތާއި މިނިވަންކަން ދިފާއު ކުރުމަށް ކުރާ މަސައްކަތް ތަކަށް ފުރިހަމަ އަށް ތާއީދު ކުރާނެ ކަމަށް ޗައިނާ އިން ބުނެފި އެވެ.

ޗައިނާގެ ފޮރިން މިނިސްޓަރު ވަންގް ޔީ މިހެން ވިދާޅުވީ އީރާންގެ ފޮރިން މިނިސްޓަރު އައްބާސް އަރާގްޗީއާ ފޯނުން ގުޅުއްވައި ދެއްކެވި ވާހަކައިގަ އެވެ. 

މިދިޔަ ހޮނިހިރު ދުވަހުން ފެށިގެން އެމެރިކާ އާއި އިޒްރޭލް އިން އީރާންގެ އެކި ސަރަަހައްދު ތަކަށް ދެމުންދާ ވަރުގަދަ ހަމަލާ ތަކުގައި މިހާތަނަށް އެ ޤައުމުގެ އެތައް ސަތޭކަ ބަޔަކު މަރުވެފައިވާ ކަމަށް ރިޕޯޓު ކޮށްފައިވެ އެވެ. މި ހަމަލާ ތަކަށް ރައްދު ދިނުމުގެ ގޮތުން އީރާނުން ގެންދަނީ އިޒްރޭލަށާއި، ގަލްފު ސަރަހައްދުގެ ޤައުމުތަކުގައި ހުންނަ އެމެރިކާގެ މިލްޓްރީ ބޭސްތަކުގެ އިތުރުން، ސައިޕްރަސްގައި ހުންނަ އިނގިރޭސިވިލާތުގެ އަސްކަރީ މަރުކަޒު ތަކަށް އަމާޒުކޮށް ގިނަ އަދަދެއްގެ ހަމަލާތައް ދެމުންނެވެ. 

ޗައިނާގެ ދައުލަތުގެ މީޑިއާ، ސީސީޓީވީ އިން ރިޕޯޓު ކޮށްފައިވާ ގޮތުގައި ވަންގް ޔީ ވަނީ ޗައިނާ އާއި އީރާންއާ ދެމެދު އޮންނަ ޒަމާންވީ އެކުވެރި ކަމަށް ޗައިނާ އިން ފުރިހަމަ އަށް އިހުތިރާމް ކުރާނެ ކަމަށް ވިދާޅުވެފަ އެވެ. އަދި އީރާންގެ ސިޔާދަތާއި، ސަލާމަތް އަދި ސަރަހައްދީ ނަޒާހަތްތެރި ކަމުގެ އިތުރުން ޤައުމީ ކަރާާމާތް ދިފާއު ކުރުމަށް ކުރާ މަސައްކަތްތަކަށް ޗައިނާ އިން އެއްބާރުލުން ދޭނެ ކަމުގެ ޔަގީންކަން ވެސް ފޮރިން މިނިސްޓަރު ވަނީ ދެއްވައިފަ އެވެ. މީގެ އިތުރުން، އެމެރިކާ އާއި އިޒްރޭލް އިން ކުރިއަށް ގެންދާ އަސްކަރީ ޙަރަކާތްތައް ވަގުތުން ހުއްޓާލުމަށާއި، މެދު އިރުމަތީގެ މަސްރަހު އިތުރަށް ގޯސްވިޔަ ނުދިނުމަށް ޗައިނާ އިން ވަނީ ގޮވާލައިފަ އެވެ. 

އޭގެ އިތުރުން އޮމާންގެ ފޮރިން މިނިސްޓަރު ބަދުރު އަލް ބުސައިދީއާ ފޯނުން ގުޅުއްވައި ދެއްކެވި ވާހަކައިގައި ވަންގް ޔީ ވަނީ، އެމެރިކާ އާއި އިޒްރޭލުން އީރާންއާ ދެކޮޅަށް ގަސްދުގައި ހަނގުރާމައެއް ފަށާފައިވާ ކަމަށް ތުހުމަތު ކުރައްވައިފަ އެވެ. އަދި މިއީ އދ.ގެ އުސޫލުތަކާ ޚިލާފު އަމަލެއް ކަމަށާއި، އދ.ގެ ސަލާމަތީ މަޖިލީހުގެ ތެރެއިން އިންސާފު ޤާއިމުކޮށް، ހަނގުރާމަ ހުއްޓުވައި އަދި ސުލްޙަ ޤާއިމު ކުރުމަށް ޗައިނާ އިން ބިނާ ކުރުވަނިވި ދައުރެއް އަދާ ކުރާނެ ކަމަަށް ވެސް ވަނީ ވިދާޅުވެފަ އެވެ.

ހަމަ އެހެންމެ، ފްރާންސްގެ ފޮރިން މިނިސްޓަރު ޖީން ނޮއެލް ބަރޮޓްއާ ވާހަކަ ދައްކަވަނުން ވަންގް ޔީ ވަނީ، ދުނިޔޭގެ ބޮޑެތި ބާރު ތަކުން އެމީހުންގެ އަސްކަރީ ކުރިއެރުމުގެ ބޭނުން ހިފައިގެން އެހެން ޤައުމު ތަކަށް ހަަމަލާ ދިނުމަކީ ބަލައި ގަނެވޭނެ ކަމެއް ނޫން ކަމަށް ވިދާޅުވެފަ އެވެ. އަދި އީރާނުގެ ނިއުކްލިއާ ޕްރޮގްރާމްގެ މައްސަލަ އަށް ސިޔާސީ އަދި ޑިޕްލޮމެޓިކް ޙައްލެއް ހޯދަން ޖެހޭ ކަމަށް ވެސް އޭނާ ވިދާޅުވެފައިވެ އެވެ، 

މި ހަނގުރާމައިގައި މިހާތަނަށް އެމެރިކާގެ އަސްކަރިއްޔާގެ ހަތަރު މީހަކު މަރުވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާން އާއެކު ކުރިއަށްދާ މި ހަނގުރާމަ އެތައް ހަފުތާ ތަކަށް ދެމިގެން ހިނގައިދާނެ ކަމުގެ އިންޒާރު ވެސް ދެއްވައިފަ އެވެ.