ޚާމަނާއީގެ އަނބިކަނބަލުން ވެސް އަވަހާރަ ވެއްޖެ

އެމެރިކާ އިން ދިން ހަމަލާތަކެއްގައި އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ވެފައިވާއިރު، އެ ހަމަލާ ތަކުގައި ލިބުނު އަނިޔާ ތަަކަށް ފަރުވާ ހޯއްދަވަމުން ގެންދަވަނިކޮށް، ޚާމަނާއީގެ އަނބިކަނބަލުން މަންސޫރޭ ޚުޖަސްތޭ ބާގިރުޒާދާ ވެސް އަވަހާރަ ވެއްޖެ އެވެ.

ޚާމަނާއީގެ އަނބިކަނބަލުން އަވަހާރަވެފައި ވަނީ ހޯމަ ދުވަހުގެ ވަގުތެއްގަ އެވެ. އީރާންގެ ދައުލަތުގެ މީޑިއާ އިން ރިޕޯޓު ކޮށްފައިވާ ގޮތުގައި އުމުރުފުޅުން 79 އަހަރުގެ މަންސޫރޭ އަވަހާރަވެފައި ވަނީ، ހޮނިހިރު ދުވަހު ލިބުނު ސީރިއަސް އަނިޔާ ތަކަށް ފަރުވާ ހޯއްދަވަމުން ގެންދަވަނިކޮށެވެ. އީރާންގެ ތަސްނީމް ނިއުސް އެޖެންސީ އިން ބުނި ގޮތުގައި، އެކަމަނާ އަވަހާރަ ވެފައި ވަނީ ހަމަލާއިން ލިބުނު ޒަޚަމްތަކަށް ފަރުވާ ހޯއްދެވުމުން ގެންދަވަނިކޮށް، ކޯމާގައި އޮންނަވަނިކޮށެވެ. 

އެމެރިކާ އާއި އިޒްރޭލް ގުޅިގެން ހޮނިހިރު ދުވަހު އީރާނަށް ދޭން ފެށި މި ހަމަލާ ތަކަކީ އެ ޤައުމުގެ ސިޔާސީ އަދި ދީނީ އިސްވެރިންނަށް އަމާޒުކޮށް މިހާތަނަށް ދީފައިވާ އެންމެ ވަރުގަދަ ހަމަލާ އެވެ. މި ހަމަލާ ތަކުގައި އީރާންގެ އެންމެ މަތީ ވެރިޔާ ޚާމަނާއީ އަވަހާރަވެފައިވާއިރު، ޚާމަނާއީގެ އާއިލާގެ ގިނަ ފަރާތް ތަކެއް ވެސް ވަނީ އަވަހާރަވެފަ އެވެ. މީގެ އިތުރުން އީރާންގެ ޑިފެންސް މިނިސްޓަރުގެ އިތުރުން، އަސްކަރިއްޔާގެ އިސް ކޮމާންޑަރުން ތަކެއް ވެސް ވަނީ އަވަހާރަވެފަ އެވެ. 

މަންސޫރޭ ޚުޖަސްތޭ ބާގިރުޒާދާ އަކީ 1964 ވަނަ އަހަރުން ފެށިގެން ޚާމަނާއީގެ އަނބިކަނބަލުންނެވެ. އެކަމަނާ އަވަހާރަވުމާ ގުޅިގެން އީރާންގެ ސަރުކާރުންނާއި، ސަޕޯޓަރުން ދަނީ އެކަމުގެ ހިތާމަ ފާޅު ކުރަމުންނެވެ. މި ހާދިސާއާ ގުޅިގެން މެދު އިރުމަތީގެ މަސްރަހު އިތުރަށް ގޯސްވެ، ބަދަލު ހިފުމުގެ ރޫހެއް އުފެދިދާނެ ކަމުގެ ބިރު ވެސް ވަނީ ބޮޑުވެފަ އެވެ.