ނަތަންޔާހޫގެ އޮފީހަށް އަމާޒުކޮށް އީރާން އިން ހަމަލާ ދީފި

އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫގެ އޮފީހާއި، އެ ޤައުމުގެ އެއާ ފޯސް ކޮމާންޑަރުގެ މައި މަރުކަޒަށް އަމާޒުކޮށް މިސައިލް ހަމަލާ ތަކެއް ދީފައި ވާނެ ކަމަަށް، އީރާންގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ.

ހޯމަ ދުވަހު އޭއެފްޕީ އިން ބުނެފައި ވަނީ، އީރާނުން އިޒްރޭލަށް އަމާޒުކޮށް އައު މިސައިލް ހަމަލާތަކެއް ފޮނުވާލާފައިވާ ކަމަަށް އިޒްރޭލްގެ އަސްކަރިއްޔާ އިން ކަށަވަރު ކޮށްދީފައިވާއިރު، ގުދުސްގެ މަތިން ބާރުގަދަ ގޮވުން ތަކެއްގެ އަޑު އިވިފައިވާ ކަމަަށެވެ. 

އައިއާރުޖީސީ އިން ނެރުނު ބަޔާނެއްގައި ބުނެފައި ވަނީ، އިޒްރޭލްގެ ވެރި ރަށް ތެލް އަވީވްގައި ހުންނަ އެ ޤައުމުގެ ސަރުކާރުގެ މަރުކަޒު ތަކުގެ އިތުރުން، ހައިފާގައި ހުރި ސަލާމަތީ އަދި އަސްކަރީ މަރުކަޒު ތަކަކަށް އަމާޒުކޮށް ހަމަލާ ދީފައިވާ ކަމަށެވެ. މި ހަމަލާ ތަކަކީ އިޒްރޭލްގެ މުހިންމު މަރުކަޒު ތަކަަށް އަމާޒުކޮށް ދީފައިވާ ވަރުގަދަ ހަމަލާ ތަކެއް ކަމަށް އީރާން އިން ސިފަ ކޮށްފައިވެ އެވެ.

މި ކުރިމަތިލުންތަކާ ގުޅިގެން އިޒްރޭލްގެ އަސްކަރިއްޔާ އިން ވަނީ އެ ޤައުމުގެ ސަލާމަތީ ފިޔަވަޅުތައް ވަރުގަދަ ކޮށްފަ އެވެ. އެގޮތުން ތައުލީމީ މަރުކަޒު ތަކާއި، މަސައްކަތް ކުރާ ތަންތަން ބަންދު ކޮށްފައި އޮތް އޮތުން ވަނީ ދިގު ދަންމާލައިފަ އެވެ. އެގޮތުން ބުދަ ދުވަހުގެ ރެޔާ ހަމައަށް އެކަން ދަންމާލާފައިވާއިރު، އިޒްރޭލް އިން ގެންދަނީ ރައްޔިތުންނަށް ސަލާމަތީ ފިޔަވަޅު އެޅުމަށް ވެސް އަންގަމުންނެވެ.