ލުބުނާން އިން ހިޒްބުاللهގެ ހަނގުރާމަވެރި ޙަރަކާތްތައް މަނާ ކުރަނީ

ހިޒްބުﷲ ޖަމާއަތުގެ ހަނގުރާމަވެރި ޙަރަކާތްތައް މަނާ ކުރަން ނިންމާފަައިވާ ކަމަށް، ލުބުނާންގެ ބޮޑު ވަޒީރު ނަވާފް ސަލާމް ވިދާޅުވެއްޖެ އެވެ.

އެމެރިިކާ އާއި އިޒްރޭލް އިން ދިން ހަމަލާ ތަކުގައި އީރާންގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ އަވަހާރަ ވެފައި ވަނިކޮށް، ހިޒްބުﷲ އިން ވަނީ އިޒްރޭލް އާއި އެ ޤައުމުގެ ސަރަހައްދު ތަކަށް ހަމަލާ ދޭން ފަށައިފަ އެވެ.

އެއާ އެކު ހިޒްބުﷲއާ ދެކޮޅަށް ވަރުގަދަ ޙަރަކާތެއް އިއުލާންކޮށް، އިޒްރޭލް އިން ގެންދަނީ ލުބުނާންގެ އެކި ސަރަހައްދު ތަކަށް ހަމަލާ ދެމުންނެވެ. އޭގެ ތެރޭގައި ބެއިރޫތުގެ އެކި ސަރަހައްދުތައް ހިމެނެ އެވެ.

ލުބުނާންގެ ބޮޑު ވަޒީރު ވިދާޅުވީ އެ ޤައުމުގެ ސަލާމަތާއި ރައްކާތެރިކަން ދެމެހެއްޓުމަށް ހިޒްބުﷲ މަނާ ކުރުމަކީ ކުރަން ޖެހޭ ކަމެއް ކަމަށެވެ. އެއީ މަޖުބޫރުވެފައިވާ ކަމެއް ކަމަށް ފާހަގަ ކުރައްވައި އޭނާ ވިދާޅުވީ، އެ ފިޔަވަޅުތައް އަޅާނީ ސަރުކާރަށް ލިބިގެންވާ ބާރު ތަކުގެ ތެރެއިން ކަމަށެވެ.

އިޒްރޭލް އިން ބުނެފައި ވަނީ، ހިޒްބުﷲ ޖަމާއަތުން ދިން ހަމަލާ ތަކުގެ ރައްދުގައި، ލުބުނާންގައި އެ ޖަމާއަތާ ގުޅުން ހުރި ތަންތަނަަށް ހަމަލާ ދީފައިވާ ކަމަށެވެ. އެގޮތުން އެ ޖަމާއަތުން ހަތިޔާރު ރައްކާ ކުރާ ތަންތަނާއި، ހަނގުރާމައިގެ ހަަރަކާތް ތަކަށް ބޭނުން ކުރާ ތަން ތަނަށް ހަމަލާ ދީފައިވާ ކަމަަށް ބުނެފައިވެ އެވެ.