ޑްރޯން ހަމަލާ ތަކެއް އަމާޒުވެ، ސައުދީގެ ރަސް ތަނޫރާ ތެޔޮ މަރުކަޒުގެ މަސައްކަތް ހުއްޓުމަކަށް

ސައުދީ އަރަބިއްޔާގެ އިރުމަތީގައި އޮންނަ ރަސް ތަނޫރާ ސިޓީގައި ހުންނަ ތެޔޮ ރައްކާ ކުރާ މަރުކަޒަކުން ބޮޑެތި ދުން ގަނޑު ތަކެއް އަރަން ފަށާފައިވާއިރު، އެ ތަނުގެ މަސައްކަތް ހުއްޓުމަކަށް އަތުވެއްޖެ އެވެ. 

އަލް ޖަޒީރާ އިން ކަށަވަރު ކޮށްފައިވާ މި ވީޑިއޯ ފުޓޭޖު ތަކުން ފެންނަ ގޮތުގައި، އެ ސިޓީގައި ހުންނަ ތެޔޮ ފެސެލިޓީ އިން ކަޅު ދުން ތަކެއް އަރަމުން ދާ މަންޒަރު ފެނެ އެވެ. މި ހާދިސާ ހިނގާފައި ވަނީ ސައުދީގެ އިރުމަތީ ސަރަހައްދުގައި ކަމަށްވާއިރު، މިއީ އެ ޤައުމުގެ ތެލުގެ ސިނާއަތުގައި މުހިންމު ދައުރެއް އަދާ ކުރާ ސަރަހައްދެކެވެ. 

އެކަމާ ގުޅިގެން ސައުދީ އިން ބުނެފައި ވަނީ ތެޔޮ ސާފު ކުރާ ކާރުޚާނާ އަކަށް ހަމަލާ ދޭން މަސައްކަތް ކޮށްފައިވާ ކަމަށާއި، އެ ޑްރޯންތައް ހުއްޓުވާފައިވާ ކަމަށެވެ. އަދި އެ ޑްރޯންގެ ބައި ތަކެއް ވެއްޓުމުގެ ތެރޭގައި ކޮންމެ ވެސް ވަރެއްގެ ގެއްލުން ތަކެއްވެ، އަލިފާނުގެ ހާދިސާއެއް ހިނގާފައިވާ ކަމަށް ބުނެފައިވެ އެވެ. 

ނަމަވެސް، މި ހާދިސާގައި އެއްވެސް އާންމު މީހަކަށް ގެއްލުމެއް ލިބިފައި ނުވާ ކަމަށް ސައުދީ އިން ބުނެފައިވެ އެވެ.

ރަސް ތަނޫރާ އަކީ ދުނިޔޭގެ އެންމެ ބޮޑު ތެޔޮ ކުންފުނި ކަމަށްވާ، ސައުދީ އަރަމްކޯގެ މުހިންމު އޮޕަރޭޝަން ތަކެއް ހިންގާ ސަރަހައްދަކެވެ. މީގެ ކުރިން ވެސް ސައުދީގެ ތެޔޮ ފެސިލިޓީ ތަކަށް އަމާޒުކޮށް އެކި ފަހަރު މަތިން ހަމަލާތައް ދީފައިވާކަން ފާހަގަ ކުރެވެ އެވެ. 

މި ހާދިސާއާ ގުޅޭ އިތުރު މައުލޫމާތު ހޯދުމަށް ބައިނަލްއަޤުވާމީ މީޑިއާ ތަކުން ދަނީ މަސައްކަތް ކުރަމުންނެވެ. އަދި މިކަމުގެ ސަބަބުން ތެޔތޮ އުފެއްދުމުގެ މަސައްކަތަށް އެއްވެސް ބުރޫއެއް އަރާފައިވޭތޯ ބެލުމަށް ވެސް ގިނަ ބަޔަކު އަންނަނީ މަސައްކަތް ކުރަމުންނެވެ.