މެދު އިރުމަތީގައި ތިބި އިނގިރޭސިވިލާތުގެ ތިން ލައްކަ ރައްޔިތުން އަނބުރާ ގެންނަނީ

މެދު އިރުމަތީގެ މަސްރަހު ވަރަށް ބޮޑަށް ގޯސްވަމުން ދާތީ، އެ ސަރަހައްދުގައި ތިބި އިނގިރޭސިވިލާތުގެ ރައްޔިތުން އެ ޤައުމު ތަކުން ބޭރު ކުރުމަށްޓަކައި ކުރަން ޖެހޭ މަސައްކަތާއި، ވާން ޖެހޭ ތައްޔާރީތައް ވުމަށް އިނގިރޭސި ސަރުކާރުން ފަށައިފި އެވެ.

އިނގިރޭސިވިލާތުގެ ހޯމް ސެކްރެޓަރީ އިވެޓް ކޫޕަރ ވިދާޅުވީ، މެދު އިރުމަތީގެ އެކި ޤައުމު ތަކުގައި ތިބި އިނގިރޭސިވިލާތުގެ ރައްޔިތުންގެ ތެރެއިން ގާތް ގަނޑަކަށް 300،000 (ތިން ލައްކަ) މީހުން މިހާތަނަށް ވެސް ރަޖިސްޓްރީ ވެފައިވާ ކަމަށެވެ. 

ސްކައި ނޫހަށް ދެއްވި ބަސްދީގަތުމެއްގައި ކޫޕަރ ވިދާޅުވީ، ރައްޔިތުން ރައްކާތެރިކަމާ އެކު އެ ޤައުމު ތަކުން ބޭރު ކުރުމަށްޓަކައި ތަފާތު ގިނަ ގޮތް ތަކެއް ބަލަމުން އަންނަ ކަމަށެވެ. މިގޮތުން ދަތުރުފަތުގެ ސިނާއަތުގައި މަސައްކަތް ކުރާ ފަރާތްތަކާ ގުޅިގެން މަސައްކަތް ކުރަމުންދާ ކަމަށާއި، މަސްރަހު އިތުރަށް ގޯސްވެއްޖެ  ޙާލަތެއްގައި ސަރުކާރުގެ ފަރާތުން ޚާއްސަ އޮޕަރޭޝަނެއް ހިންގައިގެން މީހުން އެ ސަރަހައްދުން ބޭރު ކުރުމަށް ވެސް ތައްޔާރަށް އޮތް ކަމަށް އޭނާ ވިދާޅުވި އެވެ. 

މީގެ އިތުރުން މެދު އިރުމަތީގެ ބައެއް ޤައުމު ތަކުގެ ވައިގެ ސަރަހައްދު ބަންދު ކޮށްފައި އޮތުމުން، އެ ސަރަހައްދުތައް އަލުން ހުޅުވާލުމަށް އިނގިރޭސިވިލާތުގެ ސަރުކާރުން ބޭނުންވާ ކަމަށް ވެސް ކޫޕަރ ވިދާޅުވި އެވެ. އަދި މި އޮޕަރޭޝަން އަށް އެހީތެރިވުމުގެ ގޮތުން އިނގިރޭސިވިލާތުގެ ރެޕިޑް ޑިޕްލޯއިމަންޓް ޓީމުތައް މިހާރު މެދު އިރުމައްވަށް ފޮނުވަމުން ދާ ކަމަށް ވެސް ކޫޕަރ ވަނީ ހާމަ ކުރައްވައިފަ އެވެ. 

މި ޓީމު ތަކުން ދަތުރު ފަތުރުގެ ސިނާއަތުގެ ކުންފުނިތަކާ ގުޅިގެން، ރައްޔިތުން އަނބުރާ ޤައުމަށް ގެންދިޔުމުގެ މަސައްކަތްތައް ވިލަރެސް ކުރާނެ ކަމަށް ވެސް ހާމަ ކޮށްފައިވެ އެވެ. މެދު އިރުމަތީގައި ހަނގުރާމައިގެ ޙާލަތު ބޮޑު ވަމުން އަންނައިރު، އެކި ޤައުމު ތަކުން އަންނަނީ އެ ސަރަހައްދުގައި އުޅޭ އެ ޤައުމު ތަކުގެ ރައްޔިތުން ސަލާމަތްތެރިކަން ހޯދުމަށް އިލްތިމާސް ކުރަމުންނެވެ.