އެމްޑީޕީގެ ބޮޑު އެއްވުމެއް މާޗު 21 ގައި، މިއީ ރައީސް މުއިއްޒަށް ނޫނެކޭ ބުނަން ލިބޭ ރަނުގެ ފުރުސަތެއް: މެންބަރު މައުރޫފް
ރިޔާސީ ދައުރު ދަންމާލުމަށް ސަރުކާރުން ރާވާފައިވާ ކަމަށް ބުނާ ފެންނަ ނުފެންނަ ވޯޓާ ދެކޮޅަށް އެމްޑީޕީން ގިނަ ހަރަކާތްތަކެއް ހިންގުމަށް ވަނީ ނިންމާފަ. މިގޮތުން އަންނަ މާޗު މަހުގެ 21 ވަނަ ދުވަހު މާލޭގައި ބާއްވާ ބޮޑު އިހުތިޖާޖަކީ ޚުދުމުހުތާރު ވެރިކަމަކަށް ނޫނެކޭ ބުނަން ލިބޭ ފުރުސަތެއް ކަމަށް އެ ޕާޓީން ބުނޭ. އިންތިޚާބުތައް ބޭއްވުމަކީ ޚަރަދު ބޮޑުވެގެން ހުއްޓާލަންޖެހޭ ކަމެއް ނޫން ކަމަށާއި، ޑިމޮކްރަސީގެ ހަމަތައް ގަޑުބަޑު ކުރުމަށް ފުރުސަތު ނުދޭނެ ކަމަށް ވެސް އެމްޑީޕީން ވަނީ ބުނެފަ.
އާދިއްތަ ދުވަހު އެމްޑީޕީ އިން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވާހަކަދައްކަވަނީ | ރާއްޖެއެމްވީ
އަންނަ މާޗު މަހުގެ 21 ވަނަ ދުވަހު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން މާލޭގައި ބޭއްވުމަށް ހަމަޖެހިފައިވާ ބޮޑު އެއްވުމުގައި ބައިވެރި ވުމަކީ ރައީސް ޑރ. މުހައްމަދު މުއިއްޒަށް ނޫނެކޭ ބުނަން ލިބޭ ރަނުގެ ފުރުސަތެއް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
އާދިއްތަ ދުވަހު އެމްޑީޕީ އިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މައުރޫފް ވިދާޅުވީ މި ސަރުކާރުން ރިޔާސީ ދައުރު ދަންމާލުމުގެ ހީލަތްތެރި ރޭވުމުގެ ތެރެއިން ބާއްވާ ފެންނަ ނުފެންނަ ވޯޓު ގައި ނޫނެކޭ ބުނުމަށްޓަކައި އެމްޑީޕީ އިން ގިނަ ހަރަކާތްތަކެއް ކުރިއަށް ގެންދާ ކަމަށެވެ.
އެގޮތުން އަންނަ މަހުގެ 21 ވަނަ ދުވަހު ބޮޑު އެއްވުމެއް ބާއްވާނެ ކަމަށާ މިއީ ހުރިހާ ރައްޔިތުން ރައީސް މުއިއްޒަށް ނޫނެކޭ ބުނުމަށްޓަކައި ލިބޭ ރަނުގެ ފުރުސަތެއް ކަމަށް މައުރޫފް ވިދާޅުވި އެވެ. އަދި މި ފުރުސަތުގެ ބޭނުން ހިފުމަށްޓަކައި އެއްވުމުގައި ބައިވެރުވުމަށް މާލެ އައުމަށް އެދޭ ކަމަށް މެންބަރު ވިދާޅުވި އެވެ.
މައުރޫފް ވިދާޅުވީ އެ ދުވަހު މާލެ އަރައި، ޚުދުމުހުތާރު ވެރިކަމާ ދިވެހިންގެ މިނިވަން ކަމުގެ ހައްގުގައި އެމްޑީޕީ އާއެކު ބައިވެރިވެ މި އިހުތިޖާޖު ކުރިއަށް ގެންދިއުމަށް ވެސް އެދޭ ކަމަށެވެ. މި އިހުތިޖާޖުތައް ކުރިއަށް ދާނީ ގާނޫނުތަކާ ގަވާއިދުތަކާ އެއްގޮތަށް ކަމަށް ވެސް މެންބަރު ވިދާޅުވި އެވެ.
އެއްވުންތައް އަޅުގަނޑުމެން ކުރިއަށް ގެންދާނީ ގާނޫނުތަކާ ގަވައިދުތަކުގައި ހަމަތަކާ އިންތަކުގެ ތެރެއިން. ސަރުކާރުން ހީކޮށްގެން ނުވާނެ އަޅުގަނޑުމެންގެ ބައެއް މެންބަރުން ނުވަތަ އަޅުގަނޑުގެ މައްޗަށް ދައުވާ އެއް ކޮށްގެން އަޅުގަނޑުމެން ފަހަތަށް ޖެއްސިދާނެ ކަމަށް.ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
މައުރޫފް ވިދާޅުވީ އޭޕްރީލް މަހުގެ 4 ވަނަ ދުވަހު ނަގާ ފެންނަ ނުފެންނަ ވޯޓުގައި ރައްޔިތުން މިއަށް އާނއެކޭ ބުނަން ޖެހޭނީ އޭގެ ސަބަބުން ޚަރަދު ކުޑަވެ، ރައްޔިތުންނަށް ފަސޭހަ ވެގެންދާނެތީ ކަމަށް މި ސަރުކާރުން ބުނާ ކަމަށެވެ. ނަމަވެސް ވޯޓު ލުން މިއީ އުނދަގޫ ކަމަކަށް ވެގެން ދިވެހި ރައްޔިތުން ނޫޅޭ ކަމަށް ވެސް މައުރޫފް ވިދާޅުވި އެވެ.
ދިވެހި ރައްޔިތުން ނޫޅޭ ދިވެހި ރައްޔިތުންގެ ހައްގުގައި ބަސް ބުނަން ލިބޭ ފުރުސުތަތަކުގެ ތެރެއިން މި އިންތިޚާބުތައް ބޭއްވުން މިއީ ޚަރަދު ބޮޑުވެގެން ނުކުރާން ޖެހޭ ކަމެެއް ކަމަށް. އަދި ޑިމޮކްރަސީ ތަންފީޒު ކުރުމަކީ ޚަރަދު ބޮޑުވެގެން ނުކުރެވޭ ކަމެއް ކަމަށް، ކުރާން ނުޖެހޭ ކަމެއް ކަމަށް ދިވެހި ރައްޔިތުން ގަބޫލެއް ނުކުރޭ. އެހެންވީމަ އަޅުގަނޑުމެން މި ކެމްޕެއިން ގަ ރާއްޖޭގެ ރަށްރަށަށް މި ކުރަމުންދާ ދަތުރުތަކުގައި ލޯކަލް ކައުންސިލް އިންތިޚާބާ އެކީގައި އަޅުގަނޑުމެން މިދަނީ މިކަން ވަރަށް ރަނގަޅަށް ކިޔައިދެމުން. އަދި ރައްޔިތުންނަށް ވެސް އަޅުގަނޑުމެން މި ދައްކާ ވާހަކަ ފަހުމް ވޭ. ރައްޔިތުން އެބަ ގަބޫލު ކުރޭ ހަމަ އެއްގޮތަކަށް ވެސް ކޮށްގެން ވާނެ ކަމެއް ނޫން ކަން އިންތިޚާބުތައް ގަޑުބަޑު ކުރުމަކީ. ރިޔާސީ ދައުރު ދަންމާލުމަކީ،ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
މައުރޫފް ވިދާޅުވީ އެމްޑީޕީގެ މި ކެމްޕެއިން އިތުރަށް ފޯރި ގަދަ ކުރުމަށްޓަކައި ޕިކަޕް ޖަލްސާތަކާއި ސައިކަލް ބުރުގެ އިތުރުން ހަރުގެ ޖަލްސާ ބާއްވަމުން ދާއިރު ކުރިއަށް އޮތް ތަނުގައި ވެސް މި ހަރަކާތްތައް ފޯރި ގަދަ ކަމާއެކު ކުރިއަށް ދާނެ ކަމަށެވެ. މިކަންކަމަށް ރައްޔިތުންގެ ފަރާތުން ލިބެމުންދާ ތަރުހީބު ބޮޑު ކަމަށް ވެސް މައުރޫފް ވިދާޅުވި އެވެ.
