އޮރެންޖުގެ އަގު ބޮޑުވީ ސަރަހައްދީ ޕޯޓްތަކާއި ސަޕްލަޔަރުންގެ ސަބަބުން: ސައީދު
ސަރުކާރުން އަސާސީ ކާބޯތަކެތީގެ ގޮތުގައި 23 ބާވަތެއް ކަނޑައަޅައި، އެ ތަކެތި ހެޔޮ އަގުގައި ފޯރުކޮށްދިނުމަށް މަސައްކަތް ކުރަމުންދާކަން ވަޒީރު ފާހަގަކުރެއްވި. އޮރެންޖުގެ އަގު ބޮޑުވުމުގެ މައްސަލައަށް ހައްލެއް ހޯދުމަށް މަސައްކަތް ކޮށްފައިވޭނެ ކަމަށް ވެސް މިނިސްޓަރު ވިދާޅުވި.
މާލޭގެ ލޯކަލް މާރުކޭޓުގައި ހުރި އޮރެންޖްތަކެއް | ރާއްޖެއެމްވީ
އޮރެންޖުގެ އަގު ބޮޑުވީ ސަރަހައްދީ ޕޯޓްތަކާއި ސަޕްލަޔަރުންގެ ސަބަބުން ކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެ އެވެ.
ސައީދު އެފަދައިން ވިދާޅުވީ އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގަ އެވެ.
މި ހިނގާ ރަމަޟާން މަސް ފެށުނު އިރު އޮރެންޖު ލިބުން އިންތިހާ އަށް ދަތިވި އެވެ. އޮރެންޖް ހިމެނޭހެން އަސާސީ ކާބޯތަކެތީގެ 26 ބާވަތެއް އެސްޓީއޯގެ އައުޓްލެޓްތަކުން މި ރަމަޟާންމަހު ހެޔޮއަގުގައި ލިބޭނެ ކަމަށް ސަރުކާރުން ވަނީ މީގެ ކުރިން ހާމަކޮށްފަ އެވެ. އެހެންކަމުން އަސާސީ ކާބޯތަކެތި ކަނޑައަޅަނީ ކިހިނެތްތޯ އާއި އެ ތަކެތީގެ އަގު މަތި ވެގެންދާ ސަބަބާއި މެދު ރާއްޖެ އެމްވީ އިން ވަނީ ސުވާލުކޮށްފަ އެވެ.
ސައީދު ވިދާޅުވީ ހަމައެކަނި ހަނޑޫ، ހަކުރު، ފުށް ލިބުމުން ސަރުކާރުގެ ޒިންމާ ނިމުނީ ކަމަށް އޮތް އޮތުން ބަދަލުކުރުމަށް މަސައްކަތް ކުރައްވާފައިވާނެ ކަަމަށެވެ. އެގޮތުން 10 ބާވާތެއްގެ މޭވާ އާއި ތަރުކާރީ އަދި އެންމެ ބޮޑަށް ބޭނުން ކުރާ 3 ބާވަތުގެ ކާނާ އަސާސީ ކާބޯތަކެތީގެ ގޮތުގައި ހިމަނަން ނިންމީ ކަމަށް ވަޒީރު ވިދާޅުވި އެވެ. އަސާސީ ކާބޯތަކެތީގެ ގޮތުގައި 23 ބާވަތެއް ވަނީ ހިމަނާފަ އެވެ.
މި 23 ބާވަތް ރާއްޖެ އަށް އެއިރެއްގައި ބާޒާރުގައި ލިބޭ އެންމެ ހެޔޮ އަގުގައި ފޯރުކޮށްދިނުމަށް އިންތިޒާމްތައް ހަމަޖައްސާ ކަމަށާއި އޮރެންޖުގެ އަގު އުފުލުމުން އެކަމަށް ހައްލު ގެނައުމަށް ވެސް މަސައްކަތް ކޮށްފައިވާނެ ކަމަށް ސައީދު ވިދާޅުވި އެވެ.
"ދިމާވި މައްސަލަ އަކީ ސަރަހައްދުގައި އޮރެންޖް ސަޕްލައި ކުރާ ބައެއް ޕޯޓުތަކަށް އުފެދިފައި ހުރި ޑިމާންޑްގައި މި މުދާ ފޯރުކޮށްދިނުމަށް ހުރި ކްލޮގްތަކެއް. ސޯސް ކުރާ މާކެޓުގައި ވެސް ހުރި ބައެއް ޗެލެންޖުތައް. މި ފަހަރު އޮރެންޖަށް އެކަން ދިމާވީ ޕްރައިވެޓް ސެލަރސްގައި ތަފާތު އަގުތަކެއް ހުރެދާނެ." ސައީދު ވިދާޅުވި އެވެ.
އާއްމު ގޮތެއްގައި އޮރެންޖެއްގެ އަގު އުޅެނީ، 3 ރުފިޔާ ނުވަތަ 6 ރުފިޔާ ދޭތެރޭގަ އެވެ. އެހެންނަމަވެސް ރަމަޟާން މަސް އައުމުގެ 3 ހަފްތާ ކުރިން އޮރެންޖްގެ އަގު ވަނީ މައްޗަށް ދާން ފަށާފަ އެވެ. އަދި ރަމަޟާން މަަސް ފެށުނު އިރު އޮރެންޖެއް ވިއްކަމުންދަނީ 12 ރުފިޔާ އާއި 16 ރުފިއާ ދެމެދުގެ އަގެއްގަ އެވެ.
