ކުޅުދުއްފުށީގައި ސަރުކާރު ހައުސިންގ މަޝްރޫޢުތައް ހުއްޓިފައި، ސިޓީ ކައުންސިލުގެ ހައުސިންގ މަޝްރޫޢުއަށް ސަރުކާރުން ހުއްދަނުދީ ހިފަހައްޓާފައިވާތާ 1 އަހަރު!
ކުޅުދުއްފުށީގެ ބޯހިޔާވަހިކަމުގެ މައްސަލައަށް ހައްލެއް ހޯދުމަށް އެ ސިޓީގެ ކައުންސިލުން އިސްނަގައިގެން 150 ހައުސިންގ ޔުނިޓު އެޅުމަށް ހުށަހެޅި މަޝްރޫޢުއަށް މައި ސަރުކާރުން ހުއްދަ ނުދިންތާ މިއަދަށް ބަރާބަރު އެއް އަހަރުވެއްޖެ
ކުޅުދުއްފުށީ ބޯހިޔާވަހިކަމުގެ މަސައްކަތް ސަރުކާރުން ހުއްޓުވުން | އޭއައި
ކުޅުދުއްފުށި ސިޓީއަށް ކުރިމަތިވެފައިވާ ބޯހިޔާވަހިކަމުގެ ބޮޑު މައްސަލައަށް ހައްލެއް ހޯދުމަށް އެ ސިޓީގެ ކައުންސިލުން އިސްނަގައިގެން ކުރިއަށްގެންދަން ނިންމި މަޝްރޫޢަށް، މައި ސަރުކާރުން ހުއްދަ ނުދީ ހިފަހައްޓާފައިވާތާ މިއަދަށް އެއް އަހަރު ފުރިއްޖެއެވެ.
މިހާރު ހިނގަމުންދާ ރައީސް ޑރ. މުޙައްމަދު މުޢިއްޒުގެ ސަރުކާރުން ކުޅުދުއްފުށީގެ ރައްޔިތުންނަށް ބޯހިޔާވަހިކަން ފޯރުކޮށްދިނުމުގައި ނުކުޅެދިފައިވާތީ، ކުޅުދުއްފުށި ސިޓީ ކައުންސިލުން އެކި ފަރާތްތަކާ މަޝްވަރާކުރުމަށްފަހު ނިންމާފައިވަނީ ކޮންޓްރެކްޓަރ ފައިނެންސް އުޞޫލުން 150 ހައުސިންގ ޔުނިޓުގެ ރިއަލް އެސްޓޭޓް މަޝްރޫޢެއް އެ ސިޓީގައި ހިންގުމަށެވެ. މި މަޝްރޫޢަކީ ރާއްޖޭގެ އެކި އިންވެސްޓަރުންނާ ވާހަކަދައްކައި، އެފަރާތްތަކުގެ ޝައުޤުވެރިކަން ހުރިކަން ކަށަވަރުކުރުމަށްފަހު، ރައްޔިތުންގެ ބޯހިޔާވަހިކަމުގެ ބޭނުންތައް ފުއްދުމަށް ކުޅުދުއްފުށި ސިޓީ ކައުންސިލުން ފާސްކުރި މުހިންމު މަޝްރޫޢުއެކެވެ.
މިގޮތުން މި މަޝްރޫޢުއާއި ގުޅޭގޮތުން މިދިޔަ ބުރާސްފަތި ދުވަހުގެ ރޭ ބޭއްވި ރައްޔިތުންގެ ބައްދަލުވުމުގައި ކުޅުދުއްފުށި ސިޓީގެ މޭޔަރ, މުޙައްމަދު ޢާޠިފް ވިދާޅުވީ، ސަރުކާރުން ބޯހިޔާވަހިކަމުގެ އެއްވެސް މަޝްރޫޢުއެއް ކުރިއަށް ނުގެންދާތީ، ކުޅުދުއްފުށި ސިޓީ ކައުންސިލުން މި މަޝްރޫޢު ހިންގުމަށް ނިންމައި، މާލިއްޔަތު ގަވާއިދުގައި އޮތް ގޮތުގެ މަތިން, ލޯކަލް ގަވަރމަންޓް އޮތޯރިޓީ (އެލްޖީއޭ) އާއި މާލީ ވުޒާރާގެ ހުއްދައަށް އެދުނީ 27 ފެބުރުއަރީ 2025 ގައި ކަމަށެވެ.
"މިއަދު މިއީ 2026 ވަނަ އަހަރުގެ ފެބުރުއަރީ މަހުގެ 26. އަހަރެއް ވީ އިރު މައި ސަރުކާރަށް އެ ހުއްދަ ނުދެވުން. އަޅުގަނޑަކަށް ނޭނގެ އެ ހުއްދަ ނުދެވުނީކަމެއް، ސަރުކާރަށް ހައުސިންގ ނޭޅި އަޅުގަނޑުމެން އަޅާތީ ހުއްދަ ދޭން ނުކެރުނީކަމެއް،"މޭޔަރު މުޙައްމަދު ޢާޠިފް ވިދާޅުވިއެވެ.
މޭޔަރ ޢާޠިފް އިތުރަށް ވިދާޅުވީ ދައުލަތެއް އޮންނަނީ ރައްޔިތުންނަށް ޚިދުމަތް ކުރުމަށް ކަމަށާއި، ކައުންސިލުން ކުރި ނަމަވެސް އަދި ސަރުކާރުން ކުރި ނަމަވެސް އެއީ ރައްޔިތުންގެ މުހުތާދުތައް ފުއްދުމަށް ކުރާ މަސައްކަތެއް ކަމަށެވެ. ނަމަވެސް އަހަރެއް ވީ އިރުވެސް މާލީ ވުޒާރާއިން މި ހުއްދަ ދީފައި ނުވުމަކީ ކަންބޮޑުވާންޖެހޭ މައްސަލައެއްކަން މޭޔަރު ފާހަގަކުރެއްވިއެވެ.
ކުޅުދުއްފުށީގެ ބޯހިޔާވަހިކަމުގެ ހާލަތަށް ބަލާއިރު، މި ސަރުކާރުން ވަނީ އެ ރަށުގައި ކުރިއަށްދިޔަ 400 ހައުސިންގ ޔުނިޓުގެ މަސައްކަތްވެސް ހުއްޓުވާލާފައެވެ. މީގެ އިތުރުން، ސަރުކާރުން ކުޅުދުއްފުއްޓަށް ވީ 2000 ހައުސިންގ ޔުނިޓުގެ ވައުދުގެ އެއްވެސް މަސައްކަތެއް ފެށިފައި ނުވާއިރު، ކުރީ ސަރުކާރުން އެމެރިކާގެ ސްޓްރަކްޗަރސް އަންލިމިޓެޑާއެކު ސޮއިކުރި 1000 ހައުސިންގ ޔުނިޓުގެ މަޝްރޫޢުވެސް ކުރިއަކަށް ނުދެއެވެ.
ކުޅުދުއްފުށި ސިޓީގެ ތަރައްޤީއަށް ސަރުކާރުން އަމަލީ ގޮތުން އެއްވެސް މަސައްކަތެއް ނުކުރާތާ، ސިޓީ ކައުންސިލުން ރައްޔިތުންގެ ލާބައަށް ކުރަން އުޅޭ ކަންކަމަށްވެސް މި ސަރުކާރުން މިވަނީ ހުރަސްއަޅާފައެވެ. ސަރުކާރުން ބޯހިޔާވަހިކަމުގެ މަޝްރޫޢުތައް އިނދަޖައްސާލުމަށްފަހު، ކައުންސިލުގެ ހައުސިންގ މަޝްރޫޢަށް ހުއްދަ ނުދީ އަހަރެއް ވަންދެން ބީރު ކަންފަތެއް ދީފައި އޮތުމަކީ ކުޅުދުއްފުށީގެ ރައްޔިތުންނަށް ދެވޭ ވަރަށް ބޮޑު އަނިޔާއެއް ކަމަށް ޤަބޫލުކުރެވެއެވެ.
