އިންޑޯ ފުޓްސަލް ކޮމްޕްލެކްސް އަޅަން ބިން ހަވާލު ކުރިތާ ދެ އަހަރު، ވަޒީރު ވިދާޅުވީ މާޗު މަހު މަސައްކަތް ފެށޭނެ ކަމަށް
ވަޒީރު މިހެން ވިދާޅުވެފައިވާއިރު، މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި އިއްވެވި ރިޔާސީ ބަޔާނުގައި ރައީސް މުޢިއްޒު ވިދާޅުވެފައި ވަނީ، ބައިނަލްއަޤުވާމީ ފެންވަރުގައި މެޗުތައް ކުޅެވޭނެ އިންޑޯ ފުޓްސަލް ކޮމްޕްލެކްސްގެ މަސައްކަތް މިއަހަރުގެ އޭޕްރީލް މަހުގެ ތެރޭގައި ފެށޭނެ ކަމަށް.
ޕްރެޒިޑެންޓްސް ކަޕްގެ ފައިނަލް މެޗުގައި ރައީސް މުޢިއްޒުގެ އަރިހުގައި ކުޅިވަރު ވަޒީރު ރާފިޢު | ރައީސް އޮފީސް
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ވައުދު ތަކުގެ ތެރޭގައި ހިމެނޭ، ފުޓުބޯޅަ އާއި ނެޓުބޯޅަ ކޮމްޕްލެކްސް ޤާއިމު ކުރުމަށް ބޭނުންވާ ބިން ހަވާލު ކުރިތާ ދެ އަހަރު ދުވަސް ފަހުން، މި ހިނގާ މާޗު މަހުގެ ތެރޭގައި އިންޑޯ ފުޓްސަލް ކޮމްޕްލެކްސްގެ އަމަލީ މަސައްކަތް ފެށޭނެ ކަމަށް ކުޅިވަރު ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.
ރައީސް މުޢިއްޒުގެ ސަރުކާރުން ކަނޑައަޅާފައިވާ ހަފުތާ 14 ގައި ހިމަނާފައި ވަނީ ބައިނަލްއަޤުވާމީ މިންގަނޑާ އެއްގޮތަށް ފަރުމާ ކުރެވިފައިވާ ފުޓްސަލް ކޮމްޕްލެކްސްއެއް ހުޅުމާލޭ ފޭސް ދޭއްގައި ޤާއިމު ކުރުމަށެވެ. އަދި ބައިނަލްއަޤުވާމީ މިންގަނޑަށް ފަރުމާ ކުރެވިފައިވާ ނެޓުބޯޅަ ކޮމްޕްލެކްސް ޤާއިމު ކުރުމަށް ކަނޑައަޅާފައި ވަނީ ފޭސް އެކެކެވެ.
އެގޮތުން 2024 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހު ވަނީ، ހުޅުމާލޭގައި ފުޓްސަލް އާއި ނެޓުބޯޅަ ކޮމްޕްލެކްސް ޤާއިމު ކުރުމަށް ބޭނުންވާ ބިން ހަވާލު ކޮށްފަ އެވެ. އެ ދުވަހުގެ ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވުޒާރާ އާއި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ދެމެދު އެއްބަސްވުމުގައި ސޮއި ކޮށްފައިވާއިރު، ކުޅިވަރު ވުޒާރާގެ ފަރާތުން ސޮއި ކުރެެއްވީ ވަޒީރު ޢަބްދުﷲ ރާފިޢު އެވެ. އަދި އެޗްޑީސީގެ ފަރާތުން ސޮއި ކުރެއްވީ އެ ކުންފުނީގެ އޭރުގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު އެވެ.
ދެ އަހަރުވީއިރު ވެސް، ފުޓްސަލް އާއި ނެޓުބޯޅަ ކޮމްޕްލެކްސްގެ މައްސަކަތް ނުފެށޭ
ބިން ހަވާލު ކުރިތާ ދެ އަހަރު ދުވަސްވީއިރު އެ މަޝްރޫއުގެ އަމަލީ އެއްވެސް މަސައްކަތެއް ކުރިއަށް ނުދާއިރު، ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވަޒީރު ރާފިޢު ވިދާޅުވީ، ފޭސް ދޭއްގައި ޤާއިމު ކުރާ ފުޓްސަލް އިންޑޯ ކޮމްޕްލެކްސްގެ މަސައްކަތް ވަރަށް އަވަހަށް ފެށޭނެ ކަމަށެވެ. އަމަލީ މަސައްކަތް ފެށުމަށް ބޭނުންވާ ހުރިހާ ކަމެއް މިހާރު ނިމިފައިވާ ކަމަށް ވަޒީރު ވިދާޅުވި އެވެ. މަސައްކަތް ކުރެވޭނެ ފަރާތެއް ވެސް ހަމަ ޖެހިފައިވާ ކަމަށާއި، މާޗު މަހުގެ ތެރޭގައި މަސައްކަތް ފެށޭނެ ކަމަށް ވަޒީރު ވަނީ ވިދާޅުވެފަ އެވެ.
ވަޒީރު މިހެން ވިދާޅުވެފައިވާއިރު، މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި އިއްވެވި ރިޔާސީ ބަޔާނުގައި ރައީސް މުޢިއްޒު ވިދާޅުވެފައި ވަނީ، ބައިނަލްއަޤުވާމީ ފެންވަރުގައި މެޗުތައް ކުޅެވޭނެ އިންޑޯ ފުޓްސަލް ކޮމްޕްލެކްސްގެ މަސައްކަތް މިއަހަރުގެ އޭޕްރީލް މަހުގެ ތެރޭގައި ފެށޭނެ ކަމަށެވެ. އެހެންކަމުން، މަޝްރޫއުގެ އަމަލީ މަސައްކަތް ފެށުމަށް ރައީސް ދެއްވި ތާރީޚު، އަދި ވަޒީރު ވިދާޅުވި ތާރީޚު ވެސް ދިމާ ނުވެ އެވެ.
ދެ އަަހަރު ދުވަސް ވެގެން ދިޔައިރު ވެސް، މި މަޝްރޫއުގެ އަމަލީ މަސައްކަތް ފެށިފައި ނުވާތީ ސަރުކާރަށް ގިނަ ބައެއްގެ ފާޑު ކިޔުން ވެސް އަމާޒުވެފައިވެ އެވެ.
