ރިފަރަންޑަމް ވޯޓުގެ މަސައްކަތް ހުއްޓުވުމަށް އެމްޑީޕީ އިން ވަގުތީ އަމުރަކަށް އެދިއްޖެ

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ތާރީޚެއްގައި ބޭއްވުމާ މެދު ގޮތެއް ނިންމުމަށް ރެފަރެންޑަމް ވޯޓެއް ނެގުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ނެރުއްވި ޤަރާރު ބާތިލު ކުރުމަށް ކޯޓަށް މައްސަލަ ހުށަހެޅުމަށް ފަހު، އެ ވޯޓުގެ ކަންކަން މަޑު ޖައްސައިލުމުގެ ވަގުތީ އަމުރަކަށް އެމްޑީޕީ އިން އެދިއްޖެ އެވެ.

ވަގުތީ އަމުރަކަށް އެދި އެމްޑީޕީ އިން ވަނީ ހަތަރު ނުކުތާއެއް ހިމަނައިފަ އެވެ.

އެމްޑީޕީ އިން ބުނެފައި ވަނީ ޤާނޫނު ނަންވަރު 2025/15 (ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ޤާނޫނު) ގެ 26 ވަނަ މާއްދާގެ (ށ) ގައި ބަޔާން ކުރާ ފަދަ ކެމްޕެއިން ކުރުމުގެ ފުރުސަތު އެ ޕާޓީ އަށް ނުލިބޭ ކަމަށެވެ. އަދި، ޤާނޫނު ނަންބަރު 2013/4 (ސިޔާސީ ޕާޓީގެ ޤާނޫނު) ގެ 3 ވަނަ މާއްދާގައި ސިޔާސީ ޕާޓީ ތަކުގެ ބޭނުން ބަޔާންކޮށްފައިވާއިރު އެ މާއްދާގެ (ހ) ގެ (2) ވަނަ ނަންބަރުގައި ވާ ގޮތަށް، ރައްޔިތުންގެ ޚިޔާލާއި ފިކުރު މިނިވަން ކަމާ އެކު ބައްޓަން ކުރުމަށް ޖާގަ ދިނުމަށް އެ ޕާޓީ އިން ކުރަން ޖެހޭ މަސައްކަތް އެކަށީގެންވާ ގޮތުގައި ކުރެވޭނެ ގޮތެއް ނެތް ކަަމަށް ފާހަގަ ކޮށްފައިވެ އެވެ.

މީގެ އިތުރުން ދައުވާކުރާ ފަރާތަށް ސިޔާސީ ގޮތުން ބޮޑު ގެއްލުމެއް ލިބި، އަދި އެ ޤަރާރު ބާތިލު ކަމަށް ކޯޓުން ކަނޑައަޅާ ހާލަތުގައި، އެ މައްސަލައިގެ ވޯޓާ ގުޅޭ ކެމްޕެއިނަށް ކުރާ ހަރަދު ތަކުގެ ސަބަބުން އިއާދަ ނުކުރެވޭ ވަރުގެ މާލީ ގެއްލުމެއް ލިބިދާނެ ކަމަށް އެމްޑީޕީ އިން ވަނީ ބުނެފަ އެވެ. 

ވަގުތީ އަމުރު ނެރެދިނުމަށް އެމްޑީޕީ އިން އެދިފައި ވަނީ މައްސަލަ ރައްދުވާ، ބަންޑާރަ ނައިބުގެ އޮފީހުގެ ޣައިރު ހާޟިރުގައި ނިންމުމަށެވެ. އަދި އަވަސް މައްސަލައެއްގެ ގޮތުގައި ވަގުތީ އަމުރު ނެރެދިނުމަށް ވެސް އެ ޕާޓީ އިން ވަނީ އެދިފަ އެވެ.