ޚާމަނާއީ އަވަހާރަ ކޮށްލުން ކުށްވެރި ކުރައްވަން ކެރިވަޑައިގަންނަވާ ކަމަށް ތަކުރާރުކޮށް ވިދާޅުވެ، އެކަން ކުރައްވަން ރައީސް މުޢިއްޒު އަށް ކެރިވަޑައި ނުގެންނެވި
ރާއްޖެ ޓީވީ އިން ސުވާލު ކުރުމުން ވެސް، ޚާމަނާއީ އަވަހާރަ ކޮށްލަން ދިން ހަމަލާ އާއި، އެމެރިކާ އިން ޚާމަނާއީ އަވަހާރަ ކޮށްލުން ކުށްވެރި ކުރަން ރައީސް މުޢިއްޒު އަށް ކެރިވަޑައި ނުގެންނެވި. އޭގެ ބަދަލުގައި ރައީސް މުޢިއްޒު ވިދާޅުވެފައި ވަނީ، ހަނގުރާމައިގެ ހަމަލާ ތަކުގައި އެއްވެސް މީހަކު މަރުވުމަކީ ކަންބޮޑުވާ ކަމެއް ކަމަށް.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް ޑޮކްޓަރު މުޙައްމަދު މުޢިއްޒު | 02.03.2026 | ރައީސް އޮފީސް
އެމެރިކާ އިން ދިން ހަމަލާގައި އީރާންގެ އެންމެ މަތީ ވެރިޔާ، އަދި އެ ޤައުމުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލާފައިވާއިރު، އެކަން ކުށްވެރި ކުރަން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް ކެރިވަޑައި ނުގެންނެވި އެވެ.
އެމެރިކާގެ ހަމަލާ ތަކުގައި ޚާމަނާއީ އަވަހާރަ ވެފައި ވަނީ ހޮނިހިރު ދުވަހުގެ ހެނދުނު އެވެ. ނަމަވެސް، ދިވެހި ސަރުކާރުން އަދި ރައީސް މުޢިއްޒު ވެސް އީރާން އަށް ތައުޒިޔާ ފޮނުވާފައި ނެތުމާއި، އެމެރިކާގެ ހަމަލާތައް ކުށްވެރި ކޮށްފައި ނެތުމުން ގިނަ ބައެއްގެ ފާޑު ކިޔުން އަމާޒުވި އެވެ. އެގޮތުން 24 ގަޑިއިރަށް ވުރެ ގިނަ އިރު ވެގެން ދިޔައިރު ވެސް، ރާއްޖެ އިން ބަހެއް ބުނެފައި ނުވާތީ އެތައް ބައެއްގެ ފާޑު ކިޔުން އަމާޒުވެފައިވެ އެވެ.
ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރާއްޖެ ޓީވީ އިން ސުވާލު ކުރުމުން ވެސް، ޚާމަނާއީ އަވަހާރަ ކޮށްލަން ދިން ހަމަލާ އާއި، އެމެރިކާ އިން ޚާމަނާއީ އަވަހާރަ ކޮށްލުން ކުށްވެރި ކުރަން ރައީސް މުޢިއްޒު އަށް ކެރިވަޑައި ނުގެންނެވި އެވެ. އޭގެ ބަދަލުގައި ރައީސް މުޢިއްޒު ވިދާޅުވެފައި ވަނީ، ހަނގުރާމައިގެ ހަމަލާ ތަކުގައި އެއްވެސް މީހަކު މަރުވުމަކީ ކަންބޮޑުވާ ކަމެއް ކަމަށެވެ.
ރައީސް މުޢިއްޒު އަކީ ޤައުމު ތަކުގެ ވެރިން އަވަހާރަވުމާ ގުޅިގެން އާންމު ގޮތެއްގައި ސޯޝަލް މީޑިއާގައި ވެސް ޕޯސްޓު ކުރައްވާ ބޭފުޅެކެވެ. އެގޮތުން 2024 ވަނަ އަހަރުގެ މެއި މަހުގެ ތެރޭގައި އީރާންގެ އޭރުގެ ރައީސް އިބްރާހީމް ރައިސީ އަވަހާރަވުމާ ގުޅިގެން ވެސް ރައީސް މުޢިއްޒު އެކްސްގައި ޕޯސްޓު ކުރެއްވި އެވެ. އޭގެ އިތުރުން ރާއްޖެ އިން އީރާން އަށް ތައުޒިޔާ ފޮނުވައި، ހިތާމަ ފާޅު ކުރުމުގައި ވެސް ބައިވެރިވެފައިވެ އެވެ.
އެ ނޫސްވެރިންގެ ބައްދަލުވުމުގައި އެންމެ ފުރަތަމަ ރައީސް މުޢިއްޒު ވިދާޅުވެފައި ވަނީ، އީރާން އިން ޢަރަބި އަދި އިސްލާމީ ޤައުމު ތަަކަށް ދެމުން އަންނަ ހަމަލާތައް ކުށްވެރި ކުރައްވާ ކަމަށާއި، އެ ޤައުމު ތަކުގެ ވެރިންނަށް ގުޅުއްވައި ތައުޒިޔަ ފޮނުވަމުންދާ ކަމަށެވެ. ނަމަވެސް، ފަހުން ނޫސްވެރިން ސުވާލު ކުރުމުން ވަނީ އީރާންގެ އިތުރުން، އެމެރިކާ އާއި އިޒްރޭލް އިން ދެމުން އަންނަ ހަމަލާތައް ކުށްވެރި ކުރައްވާ ކަމަށް ވިދާޅުވެފަ އެވެ.
