ކައުންސިލްތަކާ ހެދި 57 ރަށެއްގައި ޕްރޮޖެކްޓުތައް ނުފެށި އެބައޮތް ކަމަށް ރައީސް މުއިއްޒު ވިދާޅުވި ނަމަވެސް ލާމަރުކަޒީ ގާނޫނަށް ގެނެސްފައިވާ އިސްލާހުގެ ސަބަބުން އެއީ ދޮގެއްކަން ސާބިތުވޭ

ސަރުކާރުގެ ވިސްނުމާ ދެކޮޅު ލޯކަލް ކައުންސިލްތަކާ ހެދި 57 ރަށެއްގައި ޕްރޮޖެކްޓުތައް ނުފެށި އެބައޮތް ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް މިފަހުން ލާމަރުކަޒީ ގާނޫނަށް ގެނެސްފައިވާ އިސްލާހުގެ ސަބަބުން އެއީ ދޮގެއްކަން ސާބިތުވާ ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ސަރުކާރު ހިންގާ ޕާޓީ ޕީއެންސީން ބޭއްވި ތަރާވީހުގައި ރައީސް މުއިއްޒު ވިދާޅުވީ ސިޔާސީ ގޮތުން އިދިކީލި ވިސްނުމުގެ ކައުންސިލްތަކުން އެކި އުޒުރުތައް ދައްކައި ބިން ހަވާލު ނުކުރުމުގެ ސަބަބުން 57 ރަށެއްގައި މަޝްރޫއު ކުރިއަށް ނުގެންދެވޭ ކަމަށެވެ. އަދި ވިދާޅުވީ، ކައުންސިލްތަކުން ހުރަސް އެޅުމުގެ ސަބަބުން އެމަނިކުފާނު ވެވަޑައިގެންނެވި ވައުދުތައް ބާރު ސްޕީޑްގައި ކުރިއަށް ގެންދިއުމަށް ވެސް ހުރަސް އެޅިފައިވާ ކަަމަށެވެ.

ރައީސް މުއިއްޒު މިމޭރުމުން ވާހަކަފުޅު ދެއްކެވުމާއި ގުޅިގެން އެކްސްގައި ރައްދު ދެއްވައި، ވެލިދޫ ދާއިރާގެ މެންބަރު އައްބާސް ވިދާޅުވީ، މިއީ ކަނޑައެޅިގެން ބޮޑު ދޮގެއް ކަމަށާއި، ބަރަކާތް ތެރި ރަމަޟާން މަހުވެސް ދޮގު ހެއްދެވުމުގައި ހައްދުފަހަނައަޅާފައިވާ ކަމަށެވެ.

ވެރިކަމަށް ރައީސް މުއިއްޒު ވަޑައިގެންނެވީ ހުސްގޮޑިއެއް ރައްޔިތުންނަށް ދައްކައި، ބޮޑެތި ދޮގުތަކެއް ހައްދަވައިގެންކަން ފާހަގަކުރައްވައި މެންބަރު އައްބާސް ވިދާޅުވީ، އޭގެފަހުން ރައްޔިތުންގެ މަޖިލީހުގެ އިންތިޚާބު ކާމިޔާބު ކުރުމަށް  ވެސް ރައްޔިތުންގެ ކުރިމަތީގައި ދޮގު ހުވާތަކެއް ކުރެއްވި ކަމަށާއި، ބުހުތާނު ދޮގު ވައުދުތަކެއް ވެވަޑައިގެންނެވި ކަމަށެވެ. އަދި މިއަދުވެސް ފެނިގެން މިދަނީ ކައުންސިލު އިންތިޚާބު ކާމިޔާބު ކުރުމަށް ރައީސް މުއިއްޒު އިސްވެ ހުންނަވައި، ރަށު ކައުންސިލުތަށް ބަދުނާމުކޮށް، އެކިއެކި ބޭފުޅުންގެ ބޮލުގައި ދޮގު އިލްޒާމުތައް އަޅުވާ މަންޒަރު ކަމަށް ވެސް މެންބަރު އައްބާސް ވިދާޅުވި އެވެ.

ބަރަކާތްތެރި ރަމަޟާން މަހު ވެސް ރައީސް މުއިއްޒު ހައްދަވަނީ އިތުރުފުޅުކަން ފާހަގަކުރައްވައި މެންބަރު އައްބާސް ވިދާޅުވީ، މިވަރުގެ މަކަރުވެރި، ދޮގުވެރި، ހީލަތްތެރި ރައީސްއަކު އަދި މިގައުމު ދެކިފައި ނުވާ ކަމަށެވެ. އަދި އެވަރަށް ދޮގު ނުހެއްދެވުމަށާއި، އެހެން މީހުންގެ ހައްގުތަކުގެ މަތިން ހަދުމަކޮށް މާތްﷲ އަށް ތައުބާވުމަށް މެންބަރު އައްބާސް ވަނީ ނަސޭހަތްތެރިވެ ވަޑައިގެންފަ އެވެ.

މީގެ އިތުރުން މެންބަރު އައްބާސް ވަނީ މިފަހުން ލާމަރުކަޒީ ގާނޫނަށް ގެނެސްފައިވާ އިސްލާހު ވެސް އެކްސްގައި ހިއްސާ ކުރައްވާފަ އެވެ. އަދި ވިދާޅުވީ އެ އިސްލާހުގެ ސަބަބުން ރައީސް މުއިއްޒު ހައްދަވަނީ ދޮގެއްކަން ސާބިތުވާ ކަމަށެވެ.

ރައީސް މުއިއްޒުގެ ވެރިކަމުގައި ގެނެސްފައިވާ މި އިސްލާހުގައިވާ ގޮތުން، އިދާރީ ދާއިރާތަކުގައި ސަރުކާރުން ހިންގާ ތަރައްގީގެ މަޝްރޫއުތަކާއި ހަރަކާތްތައް ހިންގުމަށް ކައުންސިލްތަކުން ހޯދަން ޖެހޭ ހުއްދަތައް ހޯދުމަށް ހުށަހަޅައި އެކަށީގެންވާ މުއްދަތެއްގެ ތެރޭގައި އެ ހުއްދައެއް ކައުންސިލުން ދީފައިނުވާނަމަ ލޯކަލް ގަވަރމަންޓް އޮތޯރިޓީގެ ހުއްދައާއެކު، އެ މަޝްރޫއެއް ނުވަތަ ހަރަކާތެއްގެ މަސައްކަތްތައް އިދާރީ ދާއިރާތަކުގައި ކުރިއަށް ގެންދިޔުމުގެ އިހުތިޔާރު ސަރުކާރަށް ލިބިގެންވެ އެވެ.