ދެ އިންތިޚާބު އެއްކޮށްލުމަށް ވޯޓު ނަގަން ސަރުކާރާ ދެކޮޅު ފަރާތްތަކުން އިދިކޮޅު ހަދަމުންދަނީ، އިންތިޚާބަށް ކަޑަޖެހުމަށް އާދަވެފައި ތިބުމުން: ރައީސް މުއިއްޒު

ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ވޯޓު ނަގަން ސަރުކާރާ ދެކޮޅު ފަރާތްތަކުން އިދިކޮޅު ހަދަމުންދަނީ، އިންތިޚާބަށް ކަޑަޖެހުމަށް އާދަވެފައި ތިބުމުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. 

ބުރާސްފަތި ދުވަހުގެ ރޭ ސަރުކާރު ހިންގާ ޕާޓީ ޕީއެންސީ އިން ބޭއްވި ތަރާވީހުގައި ރައީސް މުއިއްޒު ވިދާޅުވީ ދެ އިންތިޚާބު އެއްކޮށްލާ ވޯޓު ނަގާ ދުވަހެއް ކަނޑައެޅުމުގެ ކުރިން އިދިކޮޅު ބައެއް ބޭފުޅުން ރިޔާސީ އިންތިޚާބާއި، މަޖިލިސް އިންތިޚާބު އެއްކޮށްލާ ވޯޓު އެއް ދުވަހެއްގައި ބޭއްވުން ރަނގަޅު ކަމަށް ވިދާޅުވެފައިވާ ކަމަށެވެ. ނަމަވެސް މިހާރު އެގޮތް ބަދަލުވެފައިވާތީ އެކަމާއި، އިދިކޮޅުން ދެކޮޅު ހަދަމުން އަންނާތީ ވަރަށް ގިނަ ގޮތް ގޮތުން ވިސްނަވާފައިވާ ކަމަށް އެމަނިކުފާނު ވިދާޅުވި އެވެ.

ރައީސް މުއިއްޒު ވިދާޅުވީ އެކަމަށް ދެކޮޅު ހަދަމުން ދަނީ އިންތިޚާބަށް ކަޑަޖެހުމަށް އާދަވެފައި ތިބުމުން ކަމަށެވެ. 

އެގޮތުން އިންތިޚާބަށް ކައިރިވުމުން ކެންޑިޑޭޓުން ރަށްތަކަށް ދަތުރުކޮށް، ކަޑަ ނުވަތަ ބިންގާ އަޅާ ކަމަށާއި، އޭގެފަހުން އެ މީހުން ނުފެސް ފެންނާނެ ކަމަށާއި ދެން ފެންނާނީ އާ ކަޑައެއް ޖަހަން ނުވަތަ އެހެން އިންތިޚާބެއް އައުމުން ކަމަށް ރައީސް މުއިއްޒު ވިދާޅުވި އެވެ.

ވިސްނަން ޖެހުނު ސަބަބަކީ ކުރީގައި އަޅުގަނޑުމެން މިކަމަށް ރަސްމީކޮށް ގޮތެއް ނިންމުމުގެ ކުރީގައި އިދިކޮޅު ބައެއް އިސްބޭފުޅުން ވިދާޅުވަމުން ގޮސްފައިވަނީ ވެސް ރިޔާސީ އިންތިޚާބާއި މަޖިލިސް އިންތިޚާބު އެއްދުވަހެއްގައި ބޭއްވުމޭ އެންމެ ރަނގަޅު ގޮތަކީ. އެހެން ނަމަވެސް މިހާރު ވާހަކަ ބަދަލުވީ ކީއްވެ ތޯ އަޅުގަނޑު ވިސްނާލީ. ވިސްނާލީމަ އަޅުގަނޑަށް ވިސްނުނީ ކުރީ ޒަމާނުގައި މިއޮންނަ ގޮތަކީ އިންތިޚާބަށް ކަޑަ ޖެހުމުގެ އުސޫލު. މިއީ އިހައްދުވަހުގެ ކަމެއް ނޫން. އެންމެ ކުރީ ޒަމާނުއްސުރެ އިންތިޚާބު ގާތްވީމަ ރަށަށް ދާނެ. ކެންޑިޑޭޓުންނާ އެކި ބޭފުޅުން. ގޮސްފައި ކޮންމެވެސް މަޝްރޫއެއްގެ ކަޑަ ޖަހާނެ. ބިންގާ އަޅާނެ. ދެން އެހިސާބުން ބަހަބަރު. ނުވެސް ފެންނާނެ. އަނެއްކާވެސް އަނެއް އިންތިޚާބު އަންނަނީ. އަނެއްކާ ދާންވީ އެ ކަޑަ އާ ކުރަން. ނޫނިއްޔާ އާ ކަޑައެއް ޖަހަން. ނޫނީ އެހެން ކަމެއް ކުރަން. އެހެން ކަޑައެއް ޖަހަން. ދެން އަނެއްކާ ވެސް ގެއްލުނީ. މިއުސޫލު ކުރިއަށް ގެންދިއުމުގެ އާދަ އަށަގެންފައިވާ ފަރާތްތަކުން އެކަން ކުރަން ބޭނުންވާތީ މިއުޅެނީ އަނެއްކާ ވެސް މިކަމާ ކުރިން އެއްބަސް ކިޔާފައި ދެކޮޅު ހަދައިގެން.

ރައީސް ޑރ. މުހައްމަދު މުއިއްޒު 

ސަރުކާރުން މަސައްކަތް ކުރަނީ މައި ދެ އިންތިޚާބާ ދެމެދު ހަ މަސް ދުވަހުގެ މުއްދަތެއް އޮންނާތީ، އިންތިޚާބުތައް އެއް ދުވަހަކަށް ހަދަންކަން ފާހަގަކުރައްވައި ރައީސް މުއިއްޒު ވިދާޅުވީ، އެކަމުގެ ސަބަބުން ފައިދާ ވާނީ ގައުމަށް ކަމަށެވެ. އަދި ވިދާޅުވީ މިކަމުގައި ރައްޔިތުންގެ ބައިވެރިވުން އިތުރުވާނެ ކަމަށާއި، 2008 ވަނަ އަހަރުގެ ފަހުން ބޭއްވި ހުރިހާ ރިޔާސީ އިންތިޚާބެއްގައި ރައްޔިތުން ވޯޓު ލާން ނުކުމެފައިވާ އަދަދު ވަރަށް ބޮޑަށް އިތުރު ކަމަށެވެ. 

އަޅުގަނޑުމެން މިއުޅެނީ ދެ އިންތިޚާބު އެއް އިންތިޚާބަކަށް ހަދާކަށް ނޫން. މިއުޅެނީ ދެ އިންތިޚާބު ހަ މަސް ދުވަހުގެ ގެޕެއް އޮވެގެން އެ ދާދިއުން ބަދަލުކޮށް ދެ އިންތިޚާބު އޮންނަ ދުވަސް އެއް ދުވަހަކަށް ހަދަންވެގެން. މިހެން ހެދުމުގެ ސަބަބުން ވާ އެތައް ފައިދާތަކެއްވޭ. ރައްޔިތުންގެ ބައިވެރިވުން އިތުރު ކުރުމަށް ލިބޭ މަގުފަހިކަމެއް. އެހެން މި ދަންނަވާ ސަބަބަކީ ރިޔާސީ އިންތިޚާބަށް ތާރީހުން ފެންނަ ގޮތުގައި އެންމެ ގިނަ ރައްޔިތުން ވޯޓުލާން ނުކުމެފައި ވަނީ.

 ރައީސް މުއިއްޒު މިމޭރުން ވާހަކަފުޅު ދެއްކެވި ނަމަވެސް އެންމެފަހުން ބޭއްވި ރައްޔިތުންގެ މަޖިލީހުގެ އިންތިޚާބުގެ ކެންޕޭން ދުވަސްވަރާއި، ލޯކަލް ކައުންސިލް އިންތިޚާބުގެ ކެންޕޭންއާ ގުޅުވައި ގިނަ ރަށްރަށުގައި މަޝްރޫއުތައް ފެށުމަށް ސަރުކާރުން ބިންގާ އަޅާފައިވެ އެވެ. އަދި މަޖިލިސް އިންތިޚާބު ނިމުމާއެކު، ފަށަންއުޅު މަޝްރޫޢުތައް، ގިނަ ރަށްރަށުގެ މަޝްރޫއުތައް ހުއްޓިފައިވާ ކަމަށާއި، މިދުވަސްވަރު ބައެއް ރަށްރަށުގެ މަޝްރޫއުތައް އަނެއްކާ ފަށައި، އަނެއް ބައި ރަށްރަށުގެ މަޝްރޫއުތައް ފެށުމަށް ތައްޔާރުވަމުންދާ ކަމަށް އެ ރަށްރަށުގެ ރައްޔިތުން ބުނަމުން ގެންދެ އެވެ. މިއީ އިންތިޚާބުތަކާ ދިމާކޮށް ރައްޔިތުންނަށް އޮޅުވާލުމަށް ސަރުކާރުން ކުރަމުންދާ ކަމެއް ކަމަށް ގިނަ ރައްޔިތުން ތުހުމަތު ކުރެ އެވެ.

މީގެ އިތުރުން ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްކޮށްލުމާ ގުޅޭ ގޮތުން ނަގާ ޚިޔާލު ހޯދުމުގެ ވޯޓު ގާނޫނާ ޚިލާފު ކަމަށް ތަޖުރިބާކާރު ގާނޫނީ ދާއިރާގެ ގިނަ ބޭފުޅުން ވިދާޅުވެފައިވެ އެވެ. އެހެންކަމުން އެކަން ހުއްޓުވައި ދިނުމަށް ވަގުތީ އަމުރެއް ނެރެދިނުމަށް އެދި އެމްޑީޕީ އިން ވަނީ ކޯޓަށް މައްސަލަ ހުށަހަޅާފަ އެވެ.