ދެ އަހަރުވީއިރު ވެސް، ފުޓްސަލް އާއި ނެޓުބޯޅަ ކޮމްޕްލެކްސްގެ މައްސަކަތް ނުފެށޭ

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ވައުދު ތަކުގެ ތެރޭގައި ހިމެނޭ، ފުޓުބޯޅަ އާއި ނެޓުބޯޅަ ކޮމްޕްލެކްސް ޤާއިމު ކުރުމުގެ މަސައްކަތް އެކަށީގެންވާ ދުވެއްޔެއްގައި ކުރިއަށް ނުގެންދާތީ ފާޑު ކިޔުން އަމާޒުވެއްޖެ އެވެ.

ރައީސް މުޢިއްޒުގެ ސަރުކާރުން ކަނޑައަޅާފައިވާ ހަފުތާ 14 ގައި ހިމަނާފައި ވަނީ ބައިނަލްއަޤުވާމީ މިންގަނޑާ އެއްގޮތަށް ފަރުމާ ކުރެވިފައިވާ ފުޓްސަލް ކޮމްޕްލެކްސްއެއް ހުޅުމާލޭ ފޭސް ދޭއްގައި ޤާއިމު ކުރުމަށެވެ. އަދި ބައިނަލްއަޤުވާމީ މިންގަނޑަށް ފަރުމާ ކުރެވިފައިވާ ނެޓުބޯޅަ ކޮމްޕްލެކްސް ޤާއިމު ކުރުމަށް ކަނޑައަޅާފައި ވަނީ ފޭސް އެކެކެވެ. 

އެގޮތުން 2024 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހު ވަނީ، ހުޅުމާލޭގައި ފުޓްސަލް އާއި ނެޓުބޯޅަ ކޮމްޕްލެކްސް ޤާއިމު ކުރުމަށް ބޭނުންވާ ބިން ހަވާލު ކޮށްފަ އެވެ. އެ ދުވަހުގެ ރަސްމިއްޔާތުގައި ކުޅިވަރާއި ހަށިހެޔޮކަމާ ބެހޭ ވުޒާރާ އާއި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ދެމެދު އެއްބަސްވުމުގައި ސޮއި ކޮށްފައިވާއިރު، ކުޅިވަރު ވުޒާރާގެ ފަރާތުން ސޮއި ކުރެެއްވީ ވަޒީރު ޢަބްދުﷲ ރާފިޢު އެވެ. އަދި އެޗްޑީސީގެ ފަރާތުން ސޮއި ކުރެއްވީ އެ ކުންފުނީގެ އޭރުގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު އެވެ. 

ފުޓްސަލް ކޮމްޕްލެކްސް ޤާއިމު ކުރުމަށް ހަމަޖެހިފައި ވަނީ ހުޅުމާލޭ ފޭސް ދޭއްގައި ހުންނަ ހިޔާ ޓަވަރުގެ ތެރެއިން، 16 ވަނަ ޓަވަރުގެ ކުރިމަތީގައި އޮންނަ ބިމުގަ އެވެ. ފުޓްސަލް ކޮމްޕްލެކްސް ޤާއިމު ކުރުމަށް ކަނޑައަޅާފައިވާ ބިމުގެ ބޮޑު މިނަކީ 54،992 އަކަ ފޫޓެވެ. އަދި ނެޓުބޯޅަ ކޮމްޕްލެކްސް ޤާއިމު ކުރުމަށް ހަމަޖެހިފައި ވަނީ ޣާޒީ ސްކޫލު ކުރިމަތީގައި އޮންނަ ބިމުގައި ކަމަށްވާއިރު، އެއީ 50،142 އަކަ ފޫޓު ބޮޑު މިނުގެ ބިމެކެވެ. 

ފުޓްސަލް ކޮމްޕްލެކްސް ޤާއިމު ކުރުމަށް ކަނޑައެޅި ސަަރަހައްދުގައި އެ ކޮމްޕްލެކްސް ޤާއިމު ކުރުމުގެ އެއްވެސް މަސައްކަތެއް ކުރިއަށް ނުދެ އެވެ. ނަމަވެސް، މައުލޫމާތު އިނގޭ އިސް ބޭފުޅަކު ވިދާޅުވީ ފުޓްސަލް ކޮމްޕްލެކްސްގެ މަސައްކަތް ފެށިފައި ނުވާތީ، އެ ސަރަހައްދުގައި އެޗްޑީސީ އިން މަސައްކަތް ތަކެއް ކުރަމުން ގެންދާ ކަމަަށެވެ.

ނެޓުބޯޅަ ކޮމްޕްލެކްސް ޤާއިމު ކުރުމަށް ކަނޑައަޅާފައިވާ ޣާޒީ ސްކޫލު ކުރިމަތީގައި އޮންނަ ބިމުގައި އެއްވެސް މަސައްކަތެއް ކުރިއަށް ނުދެ އެވެ. އެ ސަރަހައްދުގައި މިވަގުތު ވެސް ކާރުތަކާއި، ޕިކަޕުތައް ޕާކު ކޮށްފައި ހުރިއިރު، ނެޓުބޯޅަ ކޮމްޕްލެކްސް ޤާއިމު ކުރުމުގެ އެއްވެސް މަސައްކަތެއް އެ ސަރަހައްދުގައި ކުރިއަކަށް ނުދެ އެވެ.

ނެޓުބޯޅަ ކޮމްޕްލެކްސް ތަރައްޤީ ކުރުމަށް ހުޅުމާާލޭ ފޭސް އެކެއްގައި ހުންނަ ޣާޒީ ސްކޫލް ކުރިމަތިން ހަމަޖައްސާފައިވާ ބިން

ރައީސް މުޢިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ފުޓްސަލް އާއި ނެޓުބޯޅަ ކޮމްޕްލެކްސްގެ މަސައްކަތް ކުރިއަށް ނުދާ ސަަބަބެއް ސަރުކާރުން ހާމަ ކޮށްފައި ނުވެ އެވެ.