ހިޒްބުﷲ އާ ދެކޮޅަށް އިޒްރޭލް އިން އޮފެންސިވް ކެމްޕޭން އިއުލާން ކޮށްފި

ލުބުނާންގެ ހިޒްބުﷲ ޖަމާއަތާ ދެކޮޅަށް ވަރުގަދަ ހަމަލާ ތަކެއް ދިނުމަށް، އޮފެންސިވް ކެމްޕެއިނެއް، ނުވަަތަ އިސްވެ ހަމަލާ ދިނުމުގެ އަަސްކަރީ ޙަރަކާތް ތަކެއް ފަށާފައިވާ ކަމަށް އިޒްރޭލް އިން އިއުލާން ކޮށްފި އެވެ. 

އިޒްރޭލް އިން މިކަން އިއުލާން ކޮށްފައި ވަނީ ހިޒްބުﷲ އިން އިޒްރޭލް އަށް އަމާޒުކޮށް ރޮކެޓު ހަމަލާ ތަކެއް ފޮނުވާލުމާ ގުޅިގެން، އެ ޤައުމުގެ އަސްކަރިއްޔާގެ އިސްވެރިން ބޭއްވި މުހިންމު ބައްދަލުވުމަކަށް ފަހު އެވެ. 

އިޒްރޭލްގެ އަސްކަރިއްޔާގެ ޗީފް އޮފް ސްޓާމް އީޔަލް ޒާމިރު އެކަން ކަށަވަރު ކޮށްދެއްވަމުން ވިދާޅުވީ، ހިޒްބުﷲއާ ދެކޮޅަށް އިޒްރޭލް އިން މިހާރު ވަނީ ހަމަލާ ދިނުމުގެ އައު ކެމްޕެއިނެއް ފަށާފައިވާ ކަމަށެވެ. މި ނިންމުމަކީ ހިޒްބުﷲ އިން ދެމުންދާ ހަމަލާ ތަކަށް ރައްދު ދިނުމުގެ ގޮތުންނާއި، އެ ޖަމާއަތުގެ އަސްކަރީ ޤާބިލުކަން ކުޑަ ކުރުމަށް ނިންމި ނިންމުމެއް ކަމަށް ވެސް، އިޒްރޭލްގެ އަސްކަރިއްޔާ އިން މައުލޫމާތި ދީފައިވެ އެވެ. 

އިޒްރޭލް އިން ލުބުނާން އަށް ދެމުންދާ ވައިގެ ހަމަލާތަކާ ގުޅިގެން އެ ޤައުމުގެ މަސްރަހު ވަނީ ވަރަށް ބޮޑަށް ގޯސްވެފަ އެވެ. ލުބުނާންގެ ކަމާ ބެހޭ އިދާރާ ތަކުން ހާމަ ކޮށްފައިވާ އެންމެ ފަހުގެ ތަފާސް ހިސާބު ތަކަށް ބަލާއިރު، އިޒްރޭލްގެ މި ހަމަލާ ތަކުގައި މިހާތަނަށް މަދުވެގެން 31 މީހަކު ވަނީ ޝަހީދުވެފަ އެވެ. މީގެ އިތުރުން 149 އަށް ވުރެ ގިނަ މީހުންނަށް އެކި ވަރުގެ އަނިޔާތައް ލިބިފައިވާ ކަމަށް ވެސް ހާމަ ކޮށްފައިވެ އެވެ. 

މި ހަމަލާތައް ވަރުގަދަ ވެފައި ވަނީ ހިޒްބުﷲ އިން އިޒްރޭލްގެ އިތުރުގެ ސަރަހައްދު ތަަކަށް އަމާޒުކޮށް ގިނަ އަދަދެއްގެ ރޮކެޓު ހަމަލާ ތަކެއް ފޮނުވާލާފައިވާ ދަނޑިވަޅެއްގަ އެވެ. އިޒްރޭލް އިން ބުނަމުން ދަނީ އެ ޤައުމުގެ ރައްޔިތުންގެ ސަލާމަތާއި، ރައްކާތެރިކަން ކަށަވަރު ކުރުމަށްޓަކައި އަޅަން ޖެހޭ ކޮންމެ ފިޔަވަޅެއް ވެސް އަޅާނެ ކަމަށެވެ. ނަމަވެސް، އިޒްރޭލްގެ މި އޮޕަރޭޝަންގެ ސަބަބުން މުޅި ސަރަހައްދުގެ މަސްރަހު ވަނީ އިތުރަށް ހޫނުވެ، ބޮޑު ހަނގުރާމަ އަކަށް ބަދަލު ވެދާނެ ކަމުގެ ބިރު ބޮޑުވެފަ އެވެ. 

ލުބުނާާންގެ އެކި ސަރަހައްދު ތަކަށް އިޒްރޭލް އިން ދެމުންދާ ހަަމަލާ ތަކުގައި އާންމުން ދިރިއުޅޭ ސަރަހައްދު ތަަކަށް ބޮޑެތި ގެއްލުން ތަކެއް ލިބެމުން ދާއިރު، ބައިނަލްއަޤުވާމީ މުޖުތަމައުން ދަނީ މި ހަމަލާތައް ހުއްޓާލުމަށް ވެސް ގޮވާލަމުންނެވެ.