އީރާންގެ ވެރިން ބޭނުން ވަނީ ޤާނޫނީ އުސޫލުން ވެރިކަން ކުރިއަށް ގެންދަން

އެމެރިކާ އިން ދިން ހަމަލާއެއްގައި އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަވެފައިވާއިރު، އީރާންގެ ވަގުތީ ކައުންސިލް އިން ބޭނުން ވަނީ ޤާނޫނީ އުސޫލުގެ ތެރެއިން ވެރިކަން ކުރިއަށް ގެންދަން ކަމަށް ބުނެފި އެވެ.

އަލް ޖަޒީރާ އަށް މައުލޫމާތު ދެމުން މަސްދަރަކުން ބުނެފައި ވަނީ، ޚާމަނާއީ އަވަހާރަ ވުމަށް ފަހު ވެސް، އީރާންގެ ވެރިން ބޭނުން ވަނީ ޤާނޫނީ މަގު އިޚްތިޔާރު ކުރުމަށެވެ. އަވަސް އަރުވާލައިގެން ކަންކަން ކުރުމުގެ ބަދަލުގައި، ޤާނޫނީ އުސޫލު ތަކުގެ ތެރެއިން ކަންކަން ކުރިއަށް ގެންދިޔުމަކީ މުހިންމު ކަމެއް ކަމަށް އެ ފަރާތް ތަކުން ވަނީ ފާހަގަ ކޮށްފަ އެވެ. 

އީރާންގެ މަސްދަރުން ބުނެފައި ވަނީ، އީރާންގެ ލީޑަރުން މަސައްކަތް ކުރަނީ އެމީހުންގެ ކޮންޓްރޯލްގެ ދަށުން ކަންކަން ކުރިއަށް ގެންދަން ކަަމަށެވެ. އެއްވެސް ވަރަކަށް ހާސްވެފައި ތިބެން އެ މީހުން ބޭނުން ނުވާ ކަމަށާއި، ޤާނޫނީ އުސޫލުތަކާ ޚިލާފަށް ކަމެއް ކުރަން އެ މީހުން ބޭނުން ނުވާ ކަމަށް ބުނެފައިވެ އެވެ. އެގޮތުން ކަންކަން އަވަސް ކުރުމަށް ވެސް، ޤާނޫނީ އުސޫލުތައް ދޫކޮށް ނުލާނެކަން އެ މީހުން ދައްކަމުން އަންނަ ކަމަށް ބުނެފައިވެ އެވެ. 

މިވަގުތު އީރާން ހަނގުރާމައިގެ ޙާލަތުގައި އޮތްއިރު، އެ ޤައުމުން ރޫހާނީ ލީޑަރަކު އިންތިޚާބު ކުރުމުގެ ބަދަލުގައި، ވަގުތީ ކައުންސިލް އިން ވެރިކަން ކުރިއަށް ގެންދާނީތޯ ވަނީ ސުވާލު އުފެދިފަ އެވެ. އެ ނިންމުން ފަސް ކުރުމަށް ފަހު، ދާއިމީ ގޮތެއްގައި އެ ކައުންސިލްގެ ބެލުމުގެ ދަށުން ވެރިކަން ކުރިއަށް ގެންދާނީތޯ ވެސް ސުވާލު އުފެދިފައިވެ އެވެ. 

މިހާތަނަށް ކަންކަން ވެފައިވާ ގޮތަށް ބަލާއިރު، އީރާންގެ ލީޑަރުން ބޭނުން ވަނީ އެ މީހުންގެ ފުރިހަމަ ބެލުމުގެ ދަށުން ކަންކަން ކުރިއަށް ގެންގޮސް، އެންމެ ރަނގަޅު މަގުގައި ނިންމުންތައް ނިންމަން ކަމަށް ވެސް އަލް ޖަޒީރާގައި ބުނެފައިވެ އެވެ. 

އީރާންގެ އެންމެ މަތީ ވެރިޔާ ޚާމާނައީ އަވަހާރަވި ފަހުން އެ ޤައުމުގެ ވެރިކަން ކުރިއަށް ގެންދިޔުމުގައި އެ ޤައުމުގެ ލީޑަރުން ތިބީ ވަރަށް ބޮޑަށް ސަމާލުވެގެންނެވެ. އެ މީހުން ސާބިތު ކޮށްދޭން ބޭނުން ވަނީ، މި ޙާލަތުގައި ވެސް އީރާންގެ ކަންކަން ކުރިއަށް ގެންދިޔުމުގައި އެއްވެސް ދަތި ކަމެއް ނެތް ކަމަށެވެ. 

ހަނގުރާމައިގެ ދަނޑިވަޅެއްގައި ވެރިކަން ކުރިއަށް ގެންދިޔުމަކީ އީރާން އަށް ވަރަށް ބޮޑު ގޮން ޖެހުމަކަށް ވާނެ ކަމަށް މަސްރަހު ދިރާސާ ކުރާ ފަރާތްތަކުން ބުނެ އެވެ. އެ ޤައުމުން ވަގުތީ ގޮތުން ވެރިކަން ހިންގާނެ ކައުންސިލެއް މިހާރު އެކުލަވާލާފައިވާއިރު، އެ ކައުންސިލް އިން ވެސް ކަންކަން ކުރިއަށް ގެންދާނީ ޤާނޫނީ އިމުގެ ތެރެއިން ކަމަށް ފާހަގަ ކޮށްފައިވެ އެވެ.