ދެ އިންތިޚާބު އެއްކޮށްލަނީ އެއްގޮތަކަށް ވެސް ޚަރަދު ކުޑަކުރާކަށް ނޫން، 2028 ގެ އިންތިޚާބު ހޯދަން: ފައިސަލް
އިންތިޚާބުތައް އެއްކޮށްލުމަކީ ޚަރަދު ކުޑަކުރުމުގެ ބަދަލުގައި ސިޔާސީ މަންފާއެއް ހޯދުމަށް ކުރާ ކަމެއް ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ. ޤާނޫނުއަސާސީއަށް ބަދަލު ގެންނަންވާނީ ހުރިހާ ޕާޓީތަކެއްގެ މަޝްވަރާއާއެކު ކަމަށާއި، ސަރުކާރުގެ ސިޔާސީ މަގާމުތަކާއި ޚަރަދުތައް ކުޑަކޮށްގެން ދައުލަތަށް ބޮޑު ސަލާމަތެއް ހޯދޭނެ ކަމަށް އެމަނިކުފާނު ފާހަގަކުރެއްވި. ވަކި ބަޔަކަށް ފަސޭހަވާނެހެން ނިޒާމު ބަދަލުކުރުމަކީ ޤައުމުގެ މުސްތަޤުބަލަށް އޮތް ނުރައްކަލެއް ކަމަށްވެސް ފައިސަލް ވިދާޅުވި.
ކުރީގެ ނައިބު ރައީސް ފައިސަލް ނަސީމް. | ރާއްޖެ އެމްވީ
ހަރަދު ކުޑަކުރުމުގެ ނަމުގައި ރައީސް ޑރ. މުހައްމަދު މުއިއްޒުގެ ސަރުކާރުން ދެ އިންތިހާބު އެއްކޮށްލަނީ 2028 ވަނަ އަހަރުގެ ރިޔާސީ އިންތިހާބު ދިފާއުކުރުމަށްޓަކައި ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ނައިބު ރައީސް ފައިސަލް ވިދާޅުވީ ޤާނޫނުއަސާސީ އިޞްލާޙުކުރާ ކަމަށްވަންޏާ މިހާރު މި އޮތް ގޮތުން އެއީ ޕާޓީތަކުގެ މެދުގައި ވާހަކަދައްކައިގެން އެއްބަސްވެވޭ ގޮތެއް އެއްބަސްވެވޭން އެބަޖެހޭ ކަމަށެވެ. ނަމަވެސް ސުޕަރ މެޖޯރިޓީ އޮތީތީވެ ވެރިކަން ހިނގާ ޕާޓީއަށް ރަނގަޅުވާނެހާ ގޮތްތަކަށް ބަދަލުތައް ގެންނަމުން ދަނީ ކަމަށް ފައިސަލް ވިދާޅުވި އެވެ.
ފައިސަލް ވިދާޅުވީ ހަރަދު ކުޑަކުރުމުގެ ނަމުގައި އެކަން ކުރިއަސް ދެ ވޯޓު އެއްކޮށްލަނީ ހަމަ ސީދާ 2028 ގައި ރިޔާސީ އިންތިހާބު ދިފާއުކުރުމަށްޓަކައި ކަމަށާއި މަގު ކުރުކޮށްލައިގެން ފަސޭހައިން އެކަން ކުރެވޭނެތީ ކަމަށެވެ. އެއްގޮތަކަށް ވެސް ހަރަދު ކުޑަކުރާކަށް ނޫން ކަމަށާއި ހަރަދުގެ ވާހަކަ ދައްކާ ކަމަށްވަންޏާ ވަރަށް ބައިވަރު ވާހަކަ ދެއްކިދާނެ ކަމަށް ފައިސަލް ވިދާޅުވިއެވެ.
އެއްގޮތަކަށްވެސް ޚަރަދުކުޑަކުރާކަށް ނޫން. ޚަރަދުގެ ވާހަކަ ދައްކާކަމަށް ވަންޏާ ވަރަށް ބައިވަރު. ވާހަކަ އަޅުގަނޑުމެންނަށް ދެއްކިދާނެ. އެއީ، މުޅިން އެހެން ކަމެއް ޚަރަދު ކުޑަކުރުމަށްޓަކައި ކުރެވޭނީ. ވަރަށް ބައިވަރު މަސައްކަތްތައް އެބަހުރި ޚަރަދު ކުޑަ ސަރުކާރެއްގެ ގޮތުގައި ހިންގަން ފުރަތަމަވެސް ވިދާޅުވި ދެއްތޯ. އެގޮތަށް ވަޢުދުވީ ވެސް. އެކަމަކު ޚަރަދު އޮތީ، ރައްޔިތުންގެ މަޖިލީހުގެ މެންބަރުންގެ އަދަދާއި، ސްޓޭޓް މިނިސްޓަރުންގެ އަދަދާއި، ޑެޕިއުޓީ މިނިސްޓަރުންގެ އަދަދު އެއްކޮށްލީމަ ވެސް ގާތްގަނޑަކަށް މި ފަސް އަހަރުގެ ތެރޭގައި އެބަދޭ ބިލިއަނަކަށްވުރެ ބޮޑަށް. ބިލިއަނަކަށްވުރެ ބޮޑަށް. އެހެންވީމާ، ޚަރަދު ކުޑަކުރާ ކަމަށް ވަންޏާ ކުރެވޭނެ ވަރަށް ގިނަ ކަންތައްތައް އެބަހުރި އިނގޭތޯ.ކުރީގެ ނައިބު ރައީސް ފައިސަލް ނަސީމް
ފައިސަލް ވިދާޅުވީ 2019 ވަނަ އަހަރު 23 ބިލިއަނުގައި އޮތް ސަރުކާރުގެ އާމްދަނީ 2020 ގައި ކޮވިޑުގައި 15 ބިލިއަނަށް ދަށްވެގެންދިޔަ ކަމަށާއި މިހާރު 2024 ގައި އެ އަދަދު އިތުރުވެފައިވާ ކަމަށެވެ. އެހެންވީމާ ހަރަދު ކުޑަކުރަން ކުރާ ކަމަށްވަންޏާ ހަމަ ފަސޭހައިން ކުރެވޭނެ ކަންތައްތަކެއް އެބަހުރި ކަމަށް އެމަނިކުފާނު ވިދާޅުވި އެވެ.
އެމަނިކުފާނު ވިދާޅުވީ ރައްޔިތުން ވަކިން ހާއްސަކޮށް ވޯޓުގެ ކަންތައްތަކުގައި ފުންކޮށް ވިސްނާލަން އެބަޖެހޭ ކަމަށެވެ. ވަކި ޕާޓީއެއްގައި ތިބީތީ ކުރަން ހެޔޮވާވަރުގެ ކަމެއް ނޫން ކަމަށާއި މިއީ ސީދާ ޤައުމުގެ މުސްތަޤުބަލާ ގުޅިފައި އޮތް ކަމެއް ކަމަށް އެމަނިކުފާނު ވިދާޅުވި އެވެ.
ފައިސަލް ވިދާޅުވީ ކޮންމެ ބަޔަކު ވެރިކަމުގައި ތިއްބަސް އެހާ ފަސޭހަކަމާއެކު ބޭނުންހާ ގޮތަކަށް ކަންތައްތައް ކޮށްލެވޭނެ ނިޒާމެއް ރޭވިފައި އޮތުމަކީ ރައްޔިތުންނަށް ގެއްލުންވާނެ ކަމެއް ކަމަށެވެ. ފަހަރެއްގައި ވަގުތަކު ވެރިކަން ކުރާ ފަރާތަށް ދެން އަންނަނީ އެހެން ބައެއް ކަމަށްވަންޏާ ފަސޭހަ ގޮތްތަކަށް ޤާނޫނު އޮތް ކަމަށްވަންޏާ އެ ބަޔަކަށް ފަސޭހަވެދާނެ ކަމަށާއި އެއިން ރައްޔިތުންނަށް ފައިދާ ނުކުރާނެކަން ވަރަށް ސާފު ކަމަށް ފައިސަލް ވިދާޅުވި އެވެ.
