ދެ އިންތިހާބު އެއްކޮށްލުމުގެ މައްސަލައިގައި އެމްޑީޕީގެ ގައުމީ މަޖިލީހުގެ ބައްދަލުވުމެއް މިރޭ
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ގާނޫނުއަސާސީއަށް ގެނައި އިސާލާހާ ގުޅޭގޮތުން އެމްޑީޕީން ގޮތެއް ނިންމުމަށް ބުރާސްފަތި ދުވަހުގެ ރޭ ހާއްސަ ބައްދަލުވުމެއް ބޭއްވުމަށް ވަނީ ހަމަޖެހިފަ. މި އިސްލާހު ތަސްދީގުކުރުމުގެ ކުރިން ރައްޔިތުންގެ ހިޔާލު ހޯދުމުގެ ވޯޓެއް ނެގުމަށް ސަރުކާރުން ނިންމާފައިވާއިރު، މި ވޯޓު އޮންނާނީ 2026 ވަނަ އަހަރުގެ އޭޕްރީލް މަހު ބާއްވާ ލޯކަލް ކައުންސިލް އިންތިހާބާ ދިމާކޮށް ކަމަށް ރައީސް އޮފީހުން ވަނީ ހާމަކޮށްފައި. އިލެކްޝަންސް ކޮމިޝަނުން މިހާރު ވަނީ މި ވޯޓަށް ރީ-ރަޖިސްޓްރީވުމުގެ ފުރުސަތު ވެސް ހުޅުވާލާފަ.
އެމްޑީޕީ ގައުމީ މަޖިލީހުގެ ބައްދަލުވުމެއްގެ ތެރެއިން - ފައިލް | އެމްޑީޕީ
ދެ އިންތިހާބު އެއްކޮށްލުމުގެ މައްސަލައިގައި އެމްޑީޕީ އިން އަމަލުކުރާނެ ގޮތެއް ކަނޑައެޅުމަށް ގައުމީ މަޖިލީހުގެ ބައްދަލުވުމެއް ބުރާސްފަތި ދުވަހުގެރޭ ބޭއްވުމަށް ނިންމައިފި އެވެ.
އެމްޑީޕީ އިން ބުނީ އެމްޑީޕީ ގައުމީ މަޖިލީހުގެ 4 ވަނަ ދައުރުގެ 32 ވަނަ ޖަލްސާ ބުރާސްފަތި ދުވަހުގެ ރޭ 10.00 ގައި ފަންކްޝަން 5 ގަ އޮންނާނެ ކަމަށެވެ. މި ބައްދަލުވުމުގައި ދެ އިންތިހާބު އެއްކޮށްލުމާއި ގުޅޭގޮތުން ގައުމީ މަޖިލީހުގެ މެންބަރުންގެ ހިޔާލާއި މަޝްވަރާ ހޯދުމަށް ވަނީ ނިންމާފަ އެވެ. އަދި ދެ އިންތިހާބު އެއްކޮށްލުމާއި ގުޅޭ ގޮތުން އަމަލުކުރާނެ ގޮތަކާއި މެދު ގޮތެއް ނިންމާނެ އެވެ.
މިއީ ދެ އިންތިހާބު އެއްކޮށްލާ، 21 ވަނަ މަޖިލީހުގެ ދައުރު ކުރުކުރުމަށް ގާނޫނު އަސާސީއަށް ގެނައި އިސްލާހާއި ގުޅިގެން އެމްޑީޕީ އިން ބާއްވާ ފުރަތަމަ ބައްދަލުވުމެވެ. މީގެ ކުރިން މި މައްސަލަ މަޖިލީހުގެ މިނިވަން މުއައްސަސާތަކުގެ ކޮމިޓީ އިން ދިރާސާކުރި އިރު ހުރިހާ ސިޔާސީ ޕާޓީއަކަށް ދައުވަތު ދިން ނަމަވެސް، ބިލު ދިރާސާ ކުރުމަށް އެކަށީގެންވާ ވަގުތު ދީފައި ނުވާތީ އާއި ޕާޓީ ތެރޭގައި މަޝްވަރާކޮށް ގޮތެއް ނިންމުމަށް ވަގުތު ނުދީ ކުއްލިއަކަށް ކޮމިޓީއަށް ކިޔާފައިވާތީ ކޮމިޓީ ބައްދަލުވުން ދޫކޮށް ނުކުމެފަ އެވެ.
ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް ޤާނޫނުއަސާސީއަށް 8 ވަނަ އިޞްލާޙު ގެނައުމުގެ ބިލު އަވަށް އަރުވާލައިގެން މަޖިލީހުން ފާސްކުރީ ފެބުރުވަރީ މަހުގެ 10 ވަނަ ދުވަހު ބޭއްވެވި ރައްޔިތުންގެ މަޖިލީހުގެ 2026 ވަނަ އަހަރުގެ ފުރަތަމަ ދައުރުގެ 2 ވަނަ ޖަލްސާއިންނެވެ.
ނަމަވެސް ބިލު ތަސްދީގުކުރުމުގެ ކުރިން ރައްޔިތުންގެ ޚިޔާލު ހޯދުމުގެ އާންމު ވޯޓެއް ނެގުމަށް ވަނީ ނިންމާފަ އެވެ. މިކަމާއި ގުޅިގެން ރައީސް އޮފީހުން ބުނެފައިވަނީ ރައީސުލްޖުމްހޫރިއްޔާގެ ގަރާރު ނަންބަރު 2/2026 (ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް 8 ވަނަ އިސްލާހު ގެނައުމުގެ ބިލަށް ރައްޔިތުންގެ ޚިޔާލު ހޯދުމުގެ އާންމު ވޯޓު ނެގުން) ގައި ބަޔާންކޮށްފައިވާ ގޮތުން، ރައްޔިތުންގެ ހިޔާލު ހޯދުމަށް އެދި ހުށަހަޅާ ސުވާލަކީ: "ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށާއި، ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށް ޓަކައި، ރައްޔިތުންގެ މަޖިލީހުން ފާސްކުރައްވައިފައިވާ "ގާނޫނުއަސާސީއަށް 8 ވަނަ އިސްލާހު ގެނައުމުގެ ބިލު" ރައީސުލްޖުމްހޫރިއްޔާ ތަސްދީގުކުރެއްވުމަށް ފެނޭ ހެއްޔެވެ؟"
ރައީސުލްޖުމްހޫރިއްޔާގެ ގާރާރުގައި ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމަށް ކަނޑައަޅައިފައިވާ ތާރީހަކީ ކުރިޔަށް އޮތް "ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު 2026" ބޭއްވުމަށް އިލެކްޝަންސް ކޮމިޝަނުން އިއުލާނު ކޮށްފައިވާ 2026 އެޕްރީލް 4 ވާ ހޮނިހިރު ދުވަހެވެ.
މިއާއެކު އިލެކްޝަންސް ކޮމިޝަނުން ވަނީ ހިޔާލު ހޯދުމުގެ ވޯޓު އިއުލާނުކޮށް ރިރަޖިސްޓްރީވުމުގެ ފުރުސަތު ވެސް ހުޅުވާލާފަ އެވެ.
