އިންތިޚާބުތައް އެއްކޮށްލުމުގައި އޮތީ އެންމެ ބޭނުމެއް، އެއީ ރައްޔިތުންގެ ވޯޓުލުމުގެ ހައްގު ނިގުޅައިގަތުން: ނިޔާޒް
އިންތިޚާބުތައް އެއްކޮށްލުމަށް ސަރުކާރުން ކުރާ މަސައްކަތަކީ ރައްޔިތުންގެ ވޯޓުލުމުގެ ހައްގަށް އުނިކަން އަންނާނެ ކަމެއް ކަމަށް ބުނެ އެމްޑީޕީން އެކަމާ ދެކޮޅަށް ތެދުވުމަށް ވަނީ ނިންމާފައެވެ. މިކަމާ ގުޅިގެން އަލީ ނިޔާޒު ވިދާޅުވީ، އާންމުން ހޭލުންތެރިނުކޮށް މިފަދަ ވޯޓެއް ނެގުމަކީ އޮޅުވާލުމެއް ކަމަށާއި، މިއީ އިޚުލާސްތެރި ނިޔަތެއްގައި ކުރާ ކަމެއް ނޫން ކަމަށެވެ. އެހެންކަމުން، ސަރުކާރުގެ މި ނިންމުމާ ދެކޮޅަށް އަޑުއުފުލައި ރައްޔިތުންގެ މަސްލަހަތު ހިމާޔަތްކުރަން ޖެހޭ ކަމަށް އެ ޕާޓީން ގަބޫލުކުރެ އެވެ.
އެމްޑީޕީގެ ކުރީގެ ޑެޕިއުޓީ ޗެއާޕާސަން ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒު | ރާއްޖެ އެމްވީ
އިންތިޚާބުތައް އެއްކޮށްލުމުގައި އޮތީ އެންމެ ބޭނުމެއް ކަމަށާއި، އެ ބޭނުމަކީ ރައްޔިތުންގެ ވޯޓުލުމުގެ ހައްގު ނިގުޅައިގަތުން ކަމަށް އެމްޑީޕީގެ ކުރީގެ ޑެޕިއުޓީ ޗެއާޕާސަން ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ޕިކަޕް ޖަލްސާގައި ވާހަކަދައްކަވަމުންނެވެ.
ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓުގައި އެކަމަށް ނޫނެކޭ ބުނުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ގައުމީ މަޖިލީހުން ވަނީ ފާސްކޮށްފަ އެވެ. ނިޔާޒް ވިދާޅުވީ އެކަމާއި އެމްޑީޕީ އިން ދެކޮޅުވަނީ އާއްމުންގެ މަސްލަހަތު ގެއްލޭ ގޮތަށް ސަރުކާރުން ކަންކަން ކުރަމުންދާތީ ކަމަށެވެ.
އޭނާ ވިދާޅުވީ އެންމެ މަދުން މީހުން ވޯޓުލާން ނުކުންނަ ކައުންސިލް އިންތިޚާބާއި ދިމާކޮށް އިންތިޚާބުތައް އެއްކޮށްލުމާއި މެދު ފެންނަ ނުފެންނަ ގޮތުގެ ވޯޓު ނަގަނީ އޮޅުވާލުމާއި މަކަރުވެރިކަމުގެ ތެރެއިން ކަމަށެވެ. އެއީ ރަނގަޅު ނިޔަތެއްގައި ކުރާ ކަމެއް ނޫން ކަމަށް ނިޔާޒް ވަނީ ވިދާޅުވެފަ އެވެ. މިފަދަ ފެންނަ ނުފެންނަ ވޯޓެއް ނަގަން ވާނީ ވަރަށް ރަނގަޅަށް އާއްމުން ހޭލުންތެރިކޮށް އެ ކަމަށް އާއްމުން ތައްޔާރުވެގެން ކަމަށް ވެސް ނިޔާޒު ވިދާޅުވި އެވެ.
"މިއީ ހަރަދު ބޮޑުވެގެން ކުރާ ކަމެއް ނޫން. އެހެން ނޫން ނަމަ ހަރަދުން ސަލާމަތް ކުރަން ސިޔާސީ މަގާމުތައް މަދު ކުރާނީ. ސަލާމަތް ކުރެވޭނީ 30 ވަރަކަށް މިލިއަން ރުފިޔާ. ލޯކަލް ގަވަމަންޓް މިނިސްޓްރީ އާއި ޅެމުން ފަރުވާ ދޭ މިނިސްޓްރީތައް މި ތަންތަނަށް ކުރާ ޚަރަދުތަކަކީ ބޭކާރު ޚަރަދުތައް." އަލީ ނިޔާޒް ވިދާޅުވި އެވެ.
އިންތިޚާބުތައް އެއްކޮށްލުމަކީ މާބޮޑު ނަތީޖާ އެއް ނުކުންނާނެ ކަމެއް ވެސް ނޫން ކަމަށް ނިޔާޒް ވިދާޅުވި އެވެ. މީގެ އިތުރުން ނިޔާޒް ވަނީ ސަރުކާރުން ކަންކަން ހިންގާ ގޮތަށް ފާޑު ވިދާޅުވެފަ އެވެ. އެގޮތުން އެޗްޑީސީ އިން ހުޅުމާލޭގެ ކަންކަން ވިލަރެސްކުރަނީ ރަނގަޅަށް ނޫން ކަމަށް ނިޔާޒް ވިދާޅުވި އެވެ.
ލޯކަލް ކައުންސިލް އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބޭއްވުމަށް ސަރުކާރުން ކުރަމުންދާ މަސައްކަތްތަކާ ދެކޮޅަށް އެމްޑީޕީން މަގުމައްޗަށް ނުކުންނަން ޖެހޭ ކަމަށް އެމްޑީޕީގެ އިސް ފަރާތްތަކުން ދަނީ ބުނަމުންނެވެ. އަދި ސަރުކާރުން އާއްމުންނަށް އޮޅުވާލުމަށް ފުރުސަތު ދީގެން ނުތިބޭނެ ކަމަށް އެ ޕާޓީ އިން ދަނީ ބުނަމުންނެވެ.
