އިންތިޚާބު އެއްކޮށްލުމަކީ 2028 ނުފޫޒާއި ބާރުގެ ތެރެއިން ހޯދުމަށް ކުރަމުންދާ މަސައްކަތްތަކެއް: ޝަމްހީދު
އިންތިޚާބުތައް އެއްކޮށްލުމަށް ސަރުކާރުން ކުރާ މަސައްކަތަކީ ޚަރަދު ކުޑަކުރުމުގެ ބަދަލުގައި 2028 ވަނަ އަހަރުގެ އިންތިޚާބަށް ނުފޫޒު ފޯރުވުމަށް ކުރާ ކަމެއް ކަމަށް މެމްބަރު ޑރ. އަހުމަދު ޝަމްހީދު ތުހުމަތު ކުރައްވާފައިވޭ.
އެމްޑީޕީ ހަރުގެ ޖަލްސާގައި ޝަމްހީދު ވާހަދައްކަވަނީ | ރާއްޖެއެމްވީ
އިންތިޚާބު އެއްކޮށްލުމަކީ 2028 ނުފޫޒާއި ބާރުގެ ތެރެއިން ހޯދުމަށް ކުރަމުންދާ މަސައްކަތްތަކެއް ކަމަށް ހުޅުމާލެ ދެކުނު ދާއިރާގެ މެމްބަރު ޑރ.އަހުމަދު ޝަމްހީދު ވިދާޅުވެއްޖެ އެވެ.
ޝަމްހީދު އެފަދައިން ވިދާޅުވީ އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަދައްކަވަމުންނެވެ.
2008 ގައި އެމްޑީޕީ އިން ދިވެހިންނަށް ހޯދައިދިން އެންމެ ބޮޑު ހައްގަކީ ވޯޓުލުމުގެ ހައްގު ކަމަށާއި މި ސަރުކާރުން މަސައްކަތް ކުރަނީ އެ ހައްގު ނިގުޅައިގަންނަން ކަމަށް ޝަމްހީދު ވިދާޅުވި އެވެ. ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމަށް ސަރުކާރުން މަސައްކަތް ކުރަނީ ޚަރަދު ކުޑަ ކުރުމަށް ކަމަށް ބުނި ނަމަވެސް ހަގީގަތަކީ އެއީ ނޫން ކަމަށް އޭނާ ވިދާޅުވި އެވެ.
"ރައްޔިތުން ކައިރިއަށް ދާން ނުޖެހި ކޮންމެ 5 އަހަރަކުން އެއް ފަހަރު ނޫނީ ޕީއެސްއައިޕީ މަޝްރޫޢުތައް ނުހިންގާ ބޭއްވި ދާނެ. އެހެން ޚަރަދު ކުޑަ ވާނެ. އެ ނޫން ގޮތަކަށް ޚަރަދު ކުޑަ އެއް ނުވާނެ." ޝަމްހީދު ވިދާޅުވި އެވެ.
ޝަމްހީދު ވިދާޅުވީ 2028ގައި ރިޔާސީ އިންތިޚާބާއި މަޖިލިސް އިންތިޚާބު އެކުގައި ބާއްވާ ނަމަ މިހާރު ތިބި މެމްބަރުންގެ މަޖިލީސް ދައުރު ކުރުވާކަމަށެވެ. އެއީ ވެސް ހަމަޖެހޭ އުސޫލެއް ނޫން ކަމަށް ޝަމްހީދު ފާހަގަކުރެއްވި އެވެ. ޝަމްހީދު ވަނީ މި ވެރިކަމުގައި ޤާނޫނުއަސާސީ އަށް ބަދަލު ގެންނަމުންދާ ގޮތަށް ފާޑު ވިދާޅުވެފަ އެވެ. އަދި އިންތިޚާބުތައް އެއްކޮށްލުމުގައި އިޚުލާސްތެރިކަމެއް ނެތް ކަަމަށް ވެސް ޝަމްހީދު ވިދާޅުވި އެވެ.
