ގާނޫނު އަސާސީ އަށް އިސްލާހު ގެނެސްގެން ތަފާތު އެކި ބަދަލުތައް ގެންނަނީ ސަރުކާރު އިތުރު ދައުރަކަށް ވިސްނާތީ: ކުރީގެ ނައިބު ރައީސް ފައިސަލް ނަސީމް
ގާނޫނުއަސާސީއަށް އިސްލާހު ގެނެސް އިންތިޚާބުތައް އެއްކޮށްލުމަކީ ޚަރަދު ކުޑަކުރުމަށްވުރެ ބޮޑަށް، ސަރުކާރުން ބާރުތައް ދެމެހެއްޓުމަށް ކުރާ ކަމެއް ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ. އެމަނިކުފާނު ވިދާޅުވީ ރައްޔިތުންނަށް ފައިދާހުރި ގޮތަކީ މަޖިލިސް މެންބަރުންގެ އަދަދު މަދުކުރުމާއި، ވިދިވިދިގެން މެންބަރުކަން ނުކުރެވޭ ގޮތަށް ހެދުން ކަމަށެވެ. އަދި އިންތިޚާބުތަކުގެ މުއްދަތަށް ބަދަލު ގެނައުމަކީ ރާއްޖޭގެ ޑިމޮކްރަސީ ފަހަތަށް ސަވާރުވުން ކަމަށްވެސް ފައިސަލް ފާހަގަކުރެއްވިއެވެ.
ކުރީގެ ނައިބު ރައީސް ފައިސަލް ނަސީމް. | ރާއްޖެ އެމްވީ
ގާނޫނު އަސާސީ އަށް އިސްލާހު ގެނެސްގެން ތަފާތު އެކި ބަދަލުތައް ގެންނަނީ ރައްޔިތުންނާއި މެދު ވިސްނާ ހަރަދު ކުޑަ ކުރުމަށްވުރެ ބޮޑަށް ސަރުކާރު އިތުރު ދައުރަކަށް ވިސްނާތީ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ނައިބު ރައީސް ފައިސަލް ވިދާޅުވީ ރައްޔިތުންގެ މަޖިލީހުގެ ސުޕަރ މެޖޯރިޓީ އޮތުމުން ސަރުކާރުން ބޭނުންގޮތަކަށް ގާނޫނު އިސްލާހު ކުރުމުން ގާނޫނަކަށްވާނެ ކަމަށެވެ. ރައްޔިތުންގެ މަޖިލީހުގެ މެންބަރުން ކޮންމެ ގޮތަކަށް އެއްޗެއް ޑްރާފްޓުކޮށްލިޔަސް، ރައީސުލްޖުމްހޫރިއްޔާ ތަސްދީގުކުރުމުން އެ ގާނޫނަކަށް ބަދަލުވާ ކަމަށާއި، ނަމަވެސް އެ ތަސްދީގުކުރެވޭ ގާނޫނަކީ ގަބޫލުކުރެވޭ އެއްޗަކަށް ވާން ޖެހޭ ކަމަށް ނައިބު ރައީސް ފައިސަލް ވިދާޅުވި އެވެ.
ފައިސަލް ވިދާޅުވީ ދެ އިންތިޚާބު އެއްކުރުން، ތިން އިންތިޚާބު އެއްކުރުން، ޓަރމް ލިމިޓެއް ނޯންނަ ގޮތަށް އުވާލުން، ދައުރު ދިގުދަންމާލުން، މިއީ މީހުން ކުރާ ޒާތުގެ ކަންތައްތަކެއް ނޫން ކަމަށެވެ. ފައިސަލް ވިދާޅުވީ ޤާނޫނުއަސާސީ އިން ތިން ބާރު ވަކިވެ, މުއްދަތުތަކެއް ދެވި ޓަރމް ލިމިޓުތަކެއް ވެސް އޮތީ ދެވިފައި ކަމަށެވެ.
މީގައި ބަދަލު ގެންނަ ކަމަށް ވަންޏާ ހިނގާށޭ ރައްޔިތުންގެ މަޖިލީހުގެ އަދަދު މަދުކުރަން. 100 އެއްހާ މެންބަރުން ތިބެގެން ކޮން ކަމެއްހެއްޔޭ ވަކި ކުރެވޭނީ، 50 މެންބަރުން ތިބެގެން ނުވާ ކޮންކަމެއް. މަޤާމުގައި ހުންނަ ބޭފުޅަކަށް، އެ މަޤާމުގައި ހުރެފައި ދެން ވިދިގެން އަންނަ، ދެން ޖެހިގެން އަންނަ ދައުރަކަށް ކުރިމަތިނުލެވޭ ގޮތަށް ހަދަންވީ ނޫންތޯ. އޭރުން ވަރަށް ޤައުމަށް ރަނގަޅުވާނެ. ވަރަށް ރައްޔިތުންނަށް ރަނގަޅުވާނެ. އެ ކޮންމެ ގޮތެއްވިޔަސް އިންސާނުންނަށް ވީތީ އެ މަޤާމުގައި ހުރެގެން، އެ މަޤާމު ދިފާޢުކުރަން އަޅުގަނޑުމެންނަށް މިއަދު މި ފެންނަނީ، އޭގެ މަންޒަރުތައް، އެކި ކަންތައްތައް، އެކި ބަދަލުތައް، އިތުރު ވަޒީފާތައް ދިނުން. ހިތުހުރިހާ ގޮތަކަށް އެކިއެކި ޚަރަދުތައް ކުރުން. ބޭނުންހާ އިޞްލާޙުތަކެއް، މި ބަދަލުތަކެއް ގާނޫނުތަކަށް ގެނައުން. އެއީ، ރައްޔިތުންނަށް ރަނގަޅު ކަމެއް ކަމަށް އަޅުގަނޑަކަށް ހަމަ އެއްގޮތަކަށްވެސް ނޭނގޭ. ރައްޔިތުންނަކަށް ރަނގަޅެއް ނުވާނެ އެގޮތެއް.ކުރީގެ ނައިބު ރައީސް ފައިސަލް ނަސީމް
ފައިސަލް ވިދާޅުވީ ރައްޔިތުންނަށް ކަމެއް ކުރާ ކަމުގައިވާނަމަ، ވިދިވިދިގެން މެންބަރުކަން ނުކުރެވޭ ގޮތަށް ހެދިދާނެ ކަމަށެވެ. އަދި ޤައުމާ ދޭތެރޭގައި ވިސްނައިގެން، ވެރިކަމަށް އައުމުގެ ވިސްނުން ނުގެންގުޅެ ރައްޔިތުންނާއި ގައުމަށް ރަނގަޅުގޮތް ހެދިދާނެ ކަމަށެވެ. ނަމަވެސް މިހާރު މި ވިސްނަނީ އިތުރު ދައުރަކަށް ކަމަށާއި، ރައްޔިތުންނާއި މެދު ސަރުކާރުން ނުވިސްނާ ކަމަށެވެ.
ފައިސަލް ވިދާޅުވީ ރައްޔިތުންގެ މަޖިލީހުގެ އިންތިޚާބު ބާއްވާ ކަމަށް ވާ ނަމަ ބާއްވަންވީ ރިޔާސީ އިންތިޚާބާ ތަންކޮޅެއް ދުރުގައި ކަމަށެވެ. މިހާރު ލިބެނީ ގާތްގަނޑަކަށް 6 ވަރަކަށް މަސް ކަމަށާއި، އެއަށްވުރެ ވެސް ލަސްކުރުން ރަނގަޅުވާނެ ކަމަށް ފައިސަލް ވިދާޅުވި އެވެ. އަދި ވިސްނަންޖެހޭނީ، އެ ވަގުތަކު ވެރިކަންކުރާ ފަރާތަށް، ނޫނީ ރައްޔިތުންގެ މަޖިލީހަށް ކަމަށް ކުރިމަތިލާ ފަރާތްތަކަށް ފައިދާ ހުންނަ ގޮތްތަކަކަށް ނޫން ކަމަށާއި، ބަލަންވީ ރައްޔިތުންނަށް މީގައި އެންމެ ރަނގަޅުވާނެ ގޮތްތަކެއް ކަމަށް ފައިސަލް ވިދާޅުވި އެވެ.
މަޖިލީހުގެ މެންބަރަކީ ވެސް ހަމަ ރައްޔިތެއްގެ ގޮތުގައި ތާ ހުންނާނީ. އަބަދަކު ރައްޔިތުންގެ މަޖިލީހުގެ މެންބަރެއްގެ ގޮތުގައި އަދި ރައީސުލްޖުމްހޫރިއްޔާ ގޮތަށް ވެސް ހޮވޭ މީހަކު ނުހުންނާނެ. އަޅުގަނޑުމެން މި ގަބޫލުކުރަނީ، މީގެ ސަބަބުން ސަރުކާރު، އޭގައި އޮންނަ ބާރުގެ ތެރެއިން ގޮސް އެ މީހުން ބޭނުންވާ ކަންތައްތަކެއް ކުރުން. މިހާރުވެސް އަޅުގަނޑުމެންނަށް އެބަ ފެނޭ ނޫންތޯ؟ އެހެންވީމާ، މީކީ ޚަރަދު ކުޑަކުރުމަށްޓަކައި ކުރާ ކަމެއް ނޫނޭ. ރައްޔިތުންގެ ގާތަށް ގިނައިން ދިއުމޭ ރަނގަޅީ އިންތިޚާބުތަކުގައި ރައްޔިތުންގެ ބަސް ހޯދަން. ރައްޔިތުންނަށް ފެންނަ ގޮތެއް ހޯދުމަށްޓަކައި ގިނަގިނައިން ދިއުމޭ އިންތިޚާބުގައި ވެސް. އަވަސް އަވަހަށް ބޭއްވުން މީ ރަނގަޅު ގޮތަކީ. ރިޔާސީ ދައުރުތަކަކީ ވެސް ދުނިޔޭގެ އެހެން ޤައުމުތަކުގައި އެކި ވަރުވަރަށް މި ހުންނަނީ. ނުވަތަ 5 އަހަރާހާ، 4 އަހަރަށް. އެކަހަލަ ގޮތަކަށް އަދި ރައްޔިތުންގެ މަޖިލީހުގެ މެންބަރުން ވެސް އެކަހަލަ ގޮތަކަށް މި އޮންނަނީ. އެކި ޤައުމުތަކުގައި އޮންނަނީ އެކި މުއްދަތުތައް ދީފައި. އޮތްއިރު، މީގައި ރަނގަޅީ ރައްޔިތުންނާ ހަމައަށް ދިޔުން. އޭރުން ރައްޔިތުންނަށް ކަމުދާ ގޮތަކަށް އެ މީހުން ގޮތް ނިންމުމުގެ ފުރުޞަތު އެ މީހުންނަށް ލިބެންޖެހޭނެ.ކުރީގެ ނައިބު ރައީސް ފައިސަލް ނަސީމް
ފައިސަލް ވިދާޅުވީ މިހާރު ވާ ގޮތުން ރައްޔިތުން ބޭނުންވާ ގޮތަށް ރައްޔިތުންނަށް ގޮތް ނިންމުމުގެ ފުރުޞަތު ރައްޔިތުންނަށް ގެއްލިގެންދާ ކަމަށެވެ. މިއީ ކޮށްގެންވާނެ ކަންތައްތަކެއް ނޫން ކަމަށާއި، ޤައުމު މިއަދު މި އޮތީކީ މިކަހަލަ މިއީ ތާކުންތާކުނުޖެހޭ ކަންތައްތައް ކުރާ ހިސާބެއްގައި ނޫން ކަމަށެވެ.
ފައިސަލް ވިދާޅުވީ ޤާނޫނުއަސާސީން އިޞްލާޙުކޮށް، ރާއްޖެއަށް 2008 އިން ފެށިގެން މިއަދާ ހަމައަށް 17، 18 އަހަރުގެ ތެރޭގައި މިއައި ބަދަލުތަކާއި، ޙައްޤުތަކާއި، މިނިވަން ކަމާ، ރާއްޖެއަށް ލިބުނު ތަރައްޤީއާއި، މީހުންނަށް ފުދުންތެރިކަމަށް އިތުރުވީ މިންވަރާއި، އަޅުގަނޑުމެންނަށް ދުނިޔޭގެ ޤައުމުތަކަށް ގުޅިފައި ހުރި މިންވަރާ، މި ހުރިހާ ކަމަކަށް ބަލައިގެން ތަހުޒީބު ޤައުމެއްގެ ގޮތުގައި ތިބިއިރު އިންތިހާބު އެއްކޮށްލުމަކީ ކުރާވަރުގެ ކަންކަން ނޫން ކަމަށެވެ. އަދި މިއީ ކުރީ ޒަމާނެއްގެ ތެރެއަށް ވެއްޓުން ކަމަށް ފައިސަލް ސިފަ ކުރެއްވި އެވެ.
