ޕްރޯ މޯލްޑިވްސްގެ ނަމުގައި އައިސް މި ސަރުކާރުން ގާއިމް ކުރީ ތާރީޚުގައި ވެސް އެންމެ ގިނަ ކުދި ވިޔަފާރިތައް ފުނޑާލުމުގެ ރިކޯޑް: މެންބަރު ޝަމްހީދު
ވަޒީފާއާ ބެހޭ ގާނޫނަށް ހުށަހަޅާފައިވާ އިސްލާހުގެ ބަހުސްގައި ވާހަކަދައްކަވަމުން، މެންބަރު ޝަމްހީދު ވަނީ މި ސަރުކާރަކީ ރާއްޖޭގެ ތާރީޚުގައި ވެސް އެންމެ ގިނަ ކުދި ވިޔަފާރިތައް ހަލާކުކުރި ސަރުކާރުގެ ގޮތުގައި ސިފަކުރައްވާފަ. ސަރުކާރުގެ ކުންފުނިތައް މެދުވެރިކޮށް ބޭރުގެ ފަރާތްތަކަށް ފުރުސަތު ދީގެން އާންމުން ކުރާ ވިޔަފާރިތަކަށް ސަރުކާރުން ވަންނަމުންދަނީ ރޭވިގެން ރައްޔިތުންނަށް ޖެއްސުން ކުރުމަށް ކަމަށް އޭނާ ތުހުމަތު ކުރެއްވި. އެހެންކަމުން، ދިވެހި ވިޔަފާރިތަކަށް ސަރުކާރުން ދެމުންދާ މިފަދަ އަނިޔާތައް ވަގުތުން ހުއްޓާލުމަށް ޝަމްހީދު ގޮވާލެއްވި.
ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ހޯމަ ދުވަހުގެ ޖަލްސާގައި ވާހަކަދައްކަވަނީ | ރާއްޖެއެމްވީ
ރައީސް ޑރ. މުހައްމަދު މުއިއްޒު ގެ ސަރުކާރުން ޕްރޯ މޯލްޑިވްސްގެ ނަމުގައި އައިސް ރާއްޖޭގެ ކުދި ވިޔަފާރިތައް ފުނޑާލާފައިވާ ކަމަށް ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވެއްޖެ އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ސަރުކާރުގެ ފަރާތުން ވަޒީފާއާ ބެހޭ ގާނޫނަށް ހުށަހަޅާފައިވާ އިސްލާހުގެ ބަހުސް ވަނީ ކުރިއަށް ގެންގޮސްފަ އެވެ.
އެ ބިލަށް ބަހުސް ކުރައްވަމުން މެންބަރު ޝަމްހީދު ވިދާޅުވީ މި ސަރުކާރަކީ ދިވެހި ރާއްޖޭގެ ތާރީޚު ގައި ވެސް އެންމެ ގިނަ ކުދި ވިޔަފާރިތައް ފުނޑާލި ސަރުކާރު ކަމަށެވެ. މިކަމާ ދެބަސްވާނެ އެއްވެސް ދިވެހި ރައްޔިތަކު ނުހުންނާނެ ކަމަށް ވެސް މެންބަރު ވިދާޅުވި އެވެ.
ޝަމްހީދު ވިދާޅުވީ މިއީ ރޭވިގެން ކުރާ ކަމެއް ކަމަށާ ސަރުކާރުން އާންމުން ކުރާ ވިޔަފާރިތަކަށް ވަންނަމުންދަނީ ވެސް ރައްޔިތުންނަށް ޖެއްސުން ކުރަން ކަމަށެވެ.
މިހާރު ކަބަޑު ޖަހަނީ ޗައިނާއިން. މިފަދަ ކަންކަމަކީ ކުދި ވިޔަފާރިތަކުން ކުރަމުން އައި ކަންކަން ރަށްރަށުގައި. މިއަދު ސަރުކާރުގެ އެސްއޯއީތައް މެދުވެރިކޮށް ބޭރުގެ ފަރާތްތަކަށް ދީގެން މިކަންކަން ކުރަނީ. ޕްރޯ މޯލްޑިވްސްގެ ނަމުގައި އައިސް ދިވެހި ވިޔަފާރިތަކަށް މި ސަރުކާރުން ދޭ އަނިޔާ ހުއްޓާލަން ޖެހޭ،ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު
އިދިކޮޅު ފަރާތްތަކުގެ އިތުރުން ވިޔަފާރިވެރިންނާ އާންމު ރައްޔިތުން ވެސް ވަނީ ސަރުކާރުން އަމިއްލަ މީހުންގެ ވިޔަފާރިތަކަށް ވަދެ ވިޔަފާރިތައް ހަލާކު ކުރަމުންދާ ކަމަށް ބުނެފަ އެވެ.
އެގޮތުން އައިނު ހެއްދުމުގެ މަސައްކަތް ފާހަގަކޮށް ބައެއް ވިޔަފާރިވެރިން ވަނީ މީގެ ކުރިން އަމިއްލަ ވިޔަފާރިތަކުން ވެސް ނަންބަރު އައިނު ވިއްކަމުން ދިޔަ ކަން ފާހަގަ ކޮށްފަ އެވެ. އަދި ރާއްޖެއާއި ރާއްޖެއިން ބޭރުގެ މި ސަރަހައްދުގައި ގައުމުތަކުގައި ދެމުންދާ ސަރވިސް އެކޮލިޓީގައި ރާއްޖޭގައި އަމިއްލަ ވިޔަފާރިތަކުން އެކަން ކުރަމުން ދާއިރު މިއަދު ވެސް އެކަން ކުރަމުން އަންނަނީ އެގޮތަށް ކަމަށް ވެސް ބުނެފަ އެވެ.
ކަން އެހެން އޮތްނަމަވެސް ފެންނަނީ، އައިނު ކުންފުންޏެއް ހަދާފައި ސަރުކާރުން އެ ވިޔަފާރިތެރިއަށް ވަތްތަން ކަމަށް އެ ފަރާތްތަކުން ވަނީ ބުނެފަ އެވެ. އަދި މިއީ އެ ވިޔަފާރިތަކަށް ދޭ ބޮޑު ގެއްލުމެއް ކަމަށް ބުނެފައި ވެ އެވެ.
