އީރާން އިން، ޔޫއޭއީ އަށް 346 މިސައިލް އަދި ޑްރޯން ހަމަލާ ދީފި

އީރާން އިން ޔޫއޭއީ އަށް ގިނަ އަދަދެއްގެ މިސައިލް އާއި ޑްރޯން އިން ހަމަލާ ދީފައިވާ ކަމަށް، ޔޫއޭއީގެ ޑިފެންސް މިނިސްޓްރީ އިން ހާމަ ކޮށްފި އެވެ. 

ޔޫއޭއީގެ ޑިފެންސް މިނިސްޓްރީ އިން ހާމަ ކޮށްފައިވާ ގޮތުގައި، ހޮނިހިރު ދުވަހު އީރާން އިން ވަނީ އެ ޤައުމަށް 137 މިސައިލް އާއި، 209 ޑްރޯން ހަމަލާ ދީފަ އެވެ. މި ހަމަލާގައި އެކަކު މަރުވެފައިވާއިރު، އިތުރު ހަތް މީހަކަށް އެކި ވަރުގެ އަނިޔާތައް ލިބިފައިވާ ކަމަށް އިދާރާ ތަކުން ވަނީ ހާމަ ކޮށްފަ އެވެ. 

ޔޫއޭއީގެ ވެރި ރަށް އަބޫދާބީގެ ބައިނަލްއަޤުވާމީ ވައިގެ ބަނދަރަށް ހަމަލާއެއް އަމާޒުވެފައިވާއިރު، އިދާރާ ތަކުން އެ ހާދިސާ ބަޔާން ކޮށްފައި ވަނީ "އިންސިޑެންޓެއް"ގެ ގޮތުގަ އެވެ. މި ހަމަލާގެ ސަބަބުން ދުނިޔޭގެ އެންމެ ބާރު ބޮޑު ދުބާއީގެ ވައިގެ ބަނދަރުގެ ޙަރަކާތް ތަކަށް ވެސް ބުރޫ އަރާފައިވާ ކަމަށް ވަނީ ހާމަ ކޮށްފަ އެވެ. 

ޔޫއޭއީގެ ޑިފެންސް މިނިސްޓްރީ އިން ބުނީ، އީރާން އިން ދަތުރު ކުރި މިސައިލް އާއި ޑްރޮން ތަކުގެ ބޮޑު ބައެއް ވައިގެ ތެރޭގައި ވަނިކޮށް ނައްތާލެވިފައިވާ ކަމަށެވެ. ނަމަވެސް، ބައެއް މިސައިލް ތަކާއި ޑްރޯންތައް، ޔޫއޭއީގެ އެކި ސަރަހައްދު ތަަކަށް އަމާޒުވެފައިވާ ކަމަށް، ޑިފެންސް މިނިސްޓްރީ އިން ބުނެފައިވެ އެވެ. މި ހަމަލާގެ ސަބަބުން ޔޫއޭއީގެ އާންމު ރައްޔިތުންނަށް ވެސް ވަނީ ބިރުވެރި ޙާލަތެއް ކުރިމަތިވެފަ އެވެ. 

ބައިނަލްއަޤުވާމީ މުޖުތަމައުން އަންނަނީ މިހާރު ބަދަލު ކުރަމުން އަންނަ ހަމަލާތަކާ މެދު ކަންބޮޑުވުން ފާޅުކޮށް، މި ހަމަލާ ބަދަލު ކުރުން ހުއްޓާލުމަށް ގޮވާލަމުންނެވެ. އދ.ގެ ސަލާމަތީ މަޖިލީހުން ވެސް ވަނީ މި މައްސަލަ ބަލަން ފަށައިފަ އެވެ. 

މީގެ އިތުރުން ޔޫއޭއީގެ އިދާރާ ތަކުން ބުނެފައި ވަނީ، މިހާރު ޙާލަތު ކޮންޓްރޯލް ކުރެވިފައިވާ ކަމަށާއި، ރައްޔިތުންގެ ސަލާމަތަށް ބޭނުންވާ ހުރިހާ ފިޔަވަޅު ތަކެއް އަޅާފައިވާ ކަމަށެވެ. އަބޫދާބީ އާއި ދުބާއީގެ ވައިގެ ބަނދަރު ތަކުގައި ސަލާމަތީ ފިޔަވަޅުތައް ވެސް ވަރުގަދަ ކޮށްފައިވާ ކަމަށް ބުނެފައިވެ އެވެ. 

މި ހަމަލާ ތަކުގައި މަރުވެފައިވާ މީހާ އާއި، ޒަޚަމުވެފައިވާ މީހުންގެ ތަފްސީލެއް މިހާތަނަށް ހާމަ ކޮށްފައި ނުވެ އެވެ. ހަމަލާގައި ޒަޚަމުވެފައިވާ މީހުންނަށް އިތުރު ފަރުވާ ދިނުމަށް ހޮސްޕިޓަލް ތަަކަށް ގެންގޮސްފައިވާ ކަމަށް ވެސް ވަނީ ބުނެފަ އެވެ.