އިރާނުގެ މިސައިލް ހަމަލާގައި އިޒްރޭލުގެ ތެލް އަވީވުން އަންހެނަކު މަރުވެ އެތައް ބަޔަކު ޒަޚަމްވެއްޖެ
މި ހަމަލާތަކުގައި އާންމުން ދިރިއުޅޭ އިމާރާތްތަކަށް ބޮޑެތި ގެއްލުންތަކެއް ލިބިފައިވާއިރު، އިޒްރޭލުގެ އެކި ސަރަހައްދުތަކުގައި ނުރައްކަލުގެ ސައިރަން އަޅައި ވައިގެ ދިފާއީ ނިޒާމުން ދަނީ މިސައިލްތައް ހުއްޓުވުމަށް މަސައްކަތް ކުރަމުން. އިޒްރޭލު ފުލުހުންނާއި ސަލާމަތީ ބާރުތަކުން މިހާރު ދަނީ ގެއްލުންލިބުނު ސަރަހައްދުތަކުގައި ހަރަކާތްތެރިވަމުން.
އިޒްރޭލާއި އެމެރިކާއިން އީރާނަށް ދިން ހަމަލާތަކަކާ ގުޅިގެން، ރައްދުގައި އީރާނުން އިޒްރޭލަށް ފޮނުވާލި މިސައިލްތަކެއް ތެލްއަވީވަށް އެރުމުގެ ސަބަބުން ކާރެއްގައި ރޯވި އަލިފާންގަނޑު ނިއްވުމަށް ފަޔަރ ފައިޓަރުން 2026 ފެބްރުއަރީ 28 ވަނަ ދުވަހު ހަރަކާތްތެރިވަނީ. | ރޮއިޓާސް
އިރާނުން އިޒްރޭލަށް ހޮނިހިރު ދުވަހު ދޭން ފެށި މިސައިލް ހަމަލާތަކުގައި، ތެލް އަވީވުން އަންހެނަކު މަރުވެފައިވާ ކަމަށް އިޒްރޭލުން ބުނެފިއެވެ. މިއީ ހޮނިހިރު ދުވަހުގެ ހެނދުނުން ފެށިގެން ދެމުންދާ ހަމަލާތަކުގައި އިޒްރޭލުން މީހަކު މަރުވިކަން ކަށަވަރުވި ފުރަތަމަ ފަހަރެވެ.
އިޒްރޭލުގެ ކުއްލި ހާލަތްތަކުގައި އެހީދޭ އިދާރާ، މޭގަން ޑޭވިޑް އެޑަމް އިން ބުނި ގޮތުގައި، ތެލް އަވީވްގެ މެދުތެރެއަށް އިރާނުން ފޮނުވާލި މިސައިލެއް އެރުމުގެ ސަބަބުން ލިބުނު ސީރިއަސް އަނިޔާތަކާ ގުޅިގެން، އުމުރުން 40 އަހަރުގެ އަންހެނަކު މަރުވެފައިވާކަން ޕެރަމެޑިކުން ވަނީ ކަށަވަރުކޮށްދީފައެވެ. މި ހާދިސާއާ ގުޅޭގޮތުން އިޒްރޭލު އަސްކަރިއްޔާއިން އާންމުކުރި ވީޑިއޯއެއްގައި އެ ގައުމުގެ އިސް އޮފިސަރަކު ވެސް ވަނީ މިކަން ކަށަވަރުކޮށްދީފައެވެ.
ހޮނިހިރު ދުވަހުގެ ހެނދުނުގެ ވަގުތެއްގައި އެމެރިކާ އާއި އިޒްރޭލު ގުޅިގެން އިރާނަށް ދިން ވަރުގަދަ ހަމަލާތަކުގެ ބަދަލުހިފުމުގެ ގޮތުން އިރާނުން މިސައިލް ފޮނުވަން ފެށި ފަހުން، މިއީ ހަމަލާއެއްގައި މީހަކު މަރުވިކަން ކަށަވަރުވި ފުރަތަމަ ފަހަރެވެ.
އޭއެފްޕީ ނިއުސް އެޖެންސީން ތެލް އަވީވުން ނަގާފައިވާ ފޮޓޯތަކުން ފެންނަ ގޮތުގައި، މިސައިލް އެރި ސަރަހައްދުގައި ފަޔަރ ފައިޓަރުންނާއި ފުލުހުން ދަނީ ހަރަކާތްތެރިވަމުންނެވެ. މި ހަމަލާ އަރާފައިވަނީ އާންމުން ދިރިއުޅޭ އިމާރާތްތަކެއް ހުރި މަގަކަށް ކަމަށްވާއިރު، ގޮވުމުގެ ސަބަބުން އެ ސަރަހައްދުގެ އިމާރާތްތަކުގެ ކުރިމަތީ ފަރާތްތަކަށް ވަނީ ބޮޑެތި ގެއްލުންތަކެއް ލިބިފައެވެ.
އެ ސަރަހައްދުގައި ރޯވި އަލިފާންގަނޑުތައް ނިއްވުމަށް ފަޔަރ ފައިޓަރުން މަސައްކަތް ކުރަމުންދާއިރު، އެހީދޭ ފަރާތްތަކުން ދަނީ އަނިޔާވި މީހުން އެ ސަރަހައްދުން ނެރުމުގެ މަސައްކަތް ކުރަމުންނެވެ. އިޒްރޭލުގެ ކުއްލި ހާލަތްތަކުގައި އެހީދޭ އިދާރާއިން ބުނި ގޮތުގައި، އަނިޔާވި 20 މީހަކު މިހާތަނަށް ވަނީ ހޮސްޕިޓަލަށް ގެންގޮސްފައެވެ.
މި ހަމަލާތަކަށް ފަހު މަދު ގަޑިއިރުތަކެއްގެ ތެރޭގައި، އިރާނުން ފޮނުވާލި އިތުރު މިސައިލްތަކަކާ ގުޅިގެން އިޒްރޭލުގެ އެކި ސަރަހައްދުތަކުގައި ނުރައްކަލުގެ ސައިރަން އަޅާފައިވާ ކަމަށް އެ ގައުމުގެ އަސްކަރިއްޔާއިން ބުނެފައިވެއެވެ. އަސްކަރިއްޔާގެ ބަޔާނެއްގައި ބުނެފައިވަނީ، އެ ގައުމުގެ ވައިގެ ސިފައިން ދަނީ މިސައިލްތައް ހުއްޓުވުމަށާއި ރައްދު ހަމަލާ ދިނުމަށް މަސައްކަތް ކުރަމުން ކަމަށެވެ.
ފުލުހުން މައުލޫމާތު ދޭ ގޮތުގައި، އިރާނުން ފޮނުވާލި މިސައިލެއްގެ ބައެއް ނުވަތަ އެ ހުއްޓުވުމަށް އިޒްރޭލުން ފޮނުވާލި މިސައިލެއްގެ ބައެއް ގުދުސް (ޖެރޫސަލަމް) ސަރަހައްދަށް ވަނީ ވެއްޓިފައެވެ. ނަމަވެސް އެ ސަރަހައްދުން މީހަކަށް އަނިޔާވި ކަމުގެ ރިޕޯޓެއް އަދި ލިބިފައެއް ނުވެއެވެ.
ހޮނިހިރު ދުވަހުގެ މުޅި ރޭގަނޑު ތެލް އަވީވް އާއި ގުދުސްގެ އިތުރުން އިޒްރޭލުން ހިފާފައިވާ ހުޅަނގު އައްސޭރީގެ ސަރަހައްދުތަކުން ބާރުގަދަ ގޮވުންތަކުގެ އަޑު އިވެމުންދިޔަ ކަމަށް އޭއެފްޕީގެ ނޫސްވެރިން ރިޕޯޓުކޮށްފައިވެއެވެ. މިއީ އިރާނުން ފޮނުވާލި ގިނަ އަދަދެއްގެ މިސައިލްތައް އިޒްރޭލުގެ ވައިގެ ދިފާއީ ނިޒާމުން ވައްޓާލުމުގެ ސަބަބުން އިވުނު އަޑުތަކެއް ކަމަށް ރިޕޯޓުކޮށްފައިވެއެވެ.
ހޮނިހިރު ދުވަހުގެ ރޭ އިޒްރޭލުގެ އަސްކަރިއްޔާއިން ބުނި ގޮތުގައި، އެ ގައުމުގެ އެކި ސަރަހައްދުތަކަށް މިސައިލްތައް އަރާފައިވާ ކަމުގެ ރިޕޯޓުތައް ވަނީ ލިބިފައެވެ.
