އާޔަތުﷲ އަވަހާރަކޮށްލި ގާތިލުންނަށް ހަރުކަށި، އަދި ހިތާމަކުރަންޖެހޭ ފަދަ އަދަބެއް ދޭނެ ކަމަށް އީރާނުގެ އަސްކަރިއްޔާ އިން ބުނެފި

އީރާނަށް އަމާޒުކޮށް އެމެރިކާއާއި އިޒްރޭލުން ގުޅިގެން ދިން ހަމަލާތަކެއްގައި، އެ ގައުމުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ އަވަހާރަކޮށްލުމާ ގުޅިގެން އެމަނިކުފާނުގެ ގާތިލުންނަށް ހަރުކަށި، އަދި ހިތާމަކުރަންޖެހޭ ފަދަ އަދަބެއް ދޭނެ ކަމަށް އީރާނުގެ އަސްކަރިއްޔާ އިން ބުނެފި އެވެ.

ހޮނިހިރު ދުވަހުގެ ހެނދުނުގެ ވަގުތެއްގައި ތެހެރާންގައި ހުންނަ އާޔަތުﷲ ޚާމަނައީގެ ގެކޮޅަށް އަމާޒުކޮށް ދިން މި ހަމަލާގައި، އެމަނިކުފާނުގެ އާއިލާގެ ގިނަ މެންބަރުންތަކެއް ވެސް ވަނީ އަވަހާރަވެފައެވެ. އޭގެ ތެރޭގައި އެމަނިކުފާނުގެ ދަރިކަނބަލުންނާއި، ދަނބިދަރިކަލުންނާއި، ޅީދަރިކަލުންގެ އިތުރުން ކާފަދަރިކަލަކު ހިމެނެއެވެ.

އާޔަތުﷲ ޚާމަނައީ އަވަހާރަވިކަން އިއުލާންކުރުމާ ގުޅިގެން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ނެރުނު ބަޔާނެއްގައި ބުނެފައިވަނީ، އީރާނަށް ގެއްލިގެން ދިޔައީ ވަރަށް މަތިވެރި ލީޑަރެއް ކަމަށެވެ. އަދި އެމަނިކުފާނަކީ ސާފު ސީދާ ރޫހެއްގެ ވެރި، އީމާންތެރިކަން ވަރުގަދަ، ކަންކަމުގައި ދުރުވިސްނޭ، ބޮޑާވެގަނެގެން އުޅޭ ބާރުތަކާ ދެކޮޅަށް ކެރިގެން ކުރިމަތިލެއްވި އަދި މާތްﷲގެ މަގުގައި ޖިހާދުކުރެއްވުމުގައި މި ޒަމާނުގައި ދެވަނައެއް ނެތް ފަދަ ޝަޚްސިއްޔަތެއް ކަމަށް އެ ބަޔާނުގައިވެއެވެ.

ދުނިޔޭގައި ތިބި އެންމެ ނުލަފާ ޓެރަރިސްޓުންނާއި ގާތިލުންގެ އަތުން އެމަނިކުފާނު އަވަހާރަވުމަކީ، އެ މަތިވެރި ލީޑަރުގެ ހައްގުގޮތާއި، އެމަނިކުފާނު ކޮށްދެއްވި އިޚްލާސްތެރި ޚިދުމަތްތައް ގަބޫލުކުރެވިފައިވާ ކަމުގެ ހެކިލިބިގެންދާ ކަމެއް ކަމަށް ވެސް އެ ބަޔާނުގައި ބުނެފައިވެއެވެ.

އައި.އާރު.ޖީ.ސީ އިން ބުނި ގޮތުގައި އިސްލާމްދީނާއި އީރާނުގެ ހައްގުގައި ޝަހީދުވުމަކީ ނަސްރާއި ކާމިޔާބީއާ ގާތްވަމުންދާ ކަމުގެ ނިޝާނެކެވެ. އަދި އިމާމް ޚާމަނައީ އަވަހާރަވި ނަމަވެސް، އެމަނިކުފާނު ދެއްކެވި މަގާއި ދޫކުރެއްވި ތަރިކަ ހުއްޓުމެއް ނެތި، އިތުރު ވަރުގަދަކަމާއި ޝަރަފާއެކު ކުރިއަށްދާނެ ކަމަށް އެ އިދާރާއިން ބުނެފައިވެއެވެ.

އެމަނިކުފާނު އަވަހާރަވި ނަމަވެސް، އޭނާ ދެއްކެވި އަލިގަދަ މަގުގައި ކުރިއަށް ދިއުމަށް އީރާނުގެ ރައްޔިތުންގެ އަޒުމް އިތުރަށް ވަރުގަދަވެގެންދާނެ ކަމަށް ވެސް އެ ބަޔާނުގައި ފާހަގަކޮށްފައިވެއެވެ.

އެމެރިކާގެ ނުލަފާ ސަރުކާރާއި ޒަޔަނިސްޓް ދައުލަތުން ހިންގި މި ޖަރީމާއަކީ ދީނީ، އަޚްލާގީ، ގާނޫނީ އަދި ބައިނަލްއަގުވާމީ އުސޫލުތަކާ ކަނޑައެޅިގެން ޚިލާފު އަމަލެއް ކަމަށް އައި.އާރު.ޖީ.ސީ އިން ސިފަކުރެއެވެ. އެހެންކަމުން، އެމަނިކުފާނު އަވަހާރަކޮށްލި ގާތިލުންނަށް ހަރުކަށި، އަދި ހިތާމަކުރަންޖެހޭ ފަދަ އަދަބެއް ދިނުމަށް އީރާނުގެ ރައްޔިތުންގެ ބަދަލުހިފުމުގެ އަތުން އެމީހުންނަށް ސަލާމަތް ނުވެވޭނެ ކަމަށް ބަޔާނުގައިވެއެވެ.

އައި.އާރު.ޖީ.ސީ އިން ވަނީ އަވަހާރަވި ލީޑަރުގެ މަގުގައި ސާބިތުކަމާއެކު ދެމިތިބޭނެ ކަމަށް ވައުދުވެފައެވެ. އެގޮތުން އެމަނިކުފާނުގެ އަގުހުރި ތަރިކަ ދިފާއުކުރުމުގައާއި، އެތެރެއާއި ބޭރުގެ ރޭވުންތަކާ ދެކޮޅަށް ސާބިތުވެ ތިބުމުގެ އިތުރުން، އިސްލާމީ ވަތަނަށް އަރައިގަންނަ ފަރާތްތަކަށް އިބުރަތްތެރި އަދަބެއް ދިނުމުގައި ދެގޮތެއް ނުވެ ކުރިއަށްދާނެ ކަމަށް އެ އިދާރާއިން ބުނެފައިވެއެވެ.

ހޮނިހިރު ދުވަހު އިޒްރޭލާއި އެމެރިކާ އިން ދިން ވަރުގަދަ ހަމަލާތަކެއްގައި ޚާމަނައީ އަވަހާރަވިކަން އިއުލާންކޮށްފައިވަނީ އާދީއްތަ ދުވަހުގެ ފަތިހުގެ ވަގުތެއްގައެވެ.