ވަގުތީ ގޮތުން ވެރިކަން ހިންގާނެ ކައުންސިލެއް އީރާން އިން އެކުލަވާލަނީ

އީޜާންގެ އެންމެ މަތީ ވެރިޔާ، އަދި ރޫހާނީ ލީޑަރު އާޔަތުﷲ އަލީ ޚާމަނާއި އަވަހާރަ ކޮށްލުމާ ގުޅިގެން، ވަގުތީ ގޮތުން ވެރިކަން ހިންގާނެ ކައުންސިލެއް އެކުލަވާލަން އީރާން އިން ނިންމައިފި އެވެ. 

އާދީއްތަ ދުވަހުގެ ހެނދުނުގެ ވަގުތެއްގައި އީރާންގެ ރޫހާނީ ލީޑަރު ޚާމަނާއީ އަވަހާރަ ކޮށްލާފައިވާކަން ކަށަވަރު ވެފައިވާއިރު، އީރާންގެ ނެޝަނަލް ސެކިއުރިޓީ ކައުންސިލްގެ ސެކްރެޓަރީ ޖެނަރަލް އަލީ ލަރިޖާނީ ވިދާޅުވީ، ދެން ވެރިކަން ހިންގާނެ ވަގުތީ ކައުންސިލެއް އާދީއްތަ ދުވަހު އެކުލަވާލާނެ ކަމަށެވެ. 

އަލީ ލަރިޖާނީ މިކަން ހާމަ ކުރައްވާފައި ވަނީ، އީރާންގެ ދައުލަތުގެ މީޑިއާ މެދުވެރިކޮށް ދެއްވި ބަޔާނެއްގަ އެވެ. އެނާ ވިދާޅުވީ، އާދީއްތަ ދުވަހު އެކުލަވާލާ ވަގުތީ ލީޑާޝިޕް ކައުންސިލް އަކީ، ޚާމަނާއީ އަވަހާރަ ކޮށްލުމާ ގުޅިގެން އެ ޤައުމުގެ އެންމެ މަތީ ވެރިޔާގެ މަގާމަށް ބޭފުޅަކު އައްޔަން ކުރެވެންދެން ޤައުމުގެ ކަންކަން ބެލެހެއްޓުމަށްޓަކައި އެޅި ވަގުތީ ފިޔަވަޅެއް ކަމަށެވެ. 

މި ކައުންސިލް އެކުލަވާލުމުގެ މައިގަނޑު މަޤުސަދަކީ، ޤައުމުގެ އެންމެ މަތީ ވެރިޔާ އަވަހާރަވުމާ ގުޅިގެން އުފެދިފައިވާ ހުސްކަން ފޫބައްދައި، މެދު ކެނޑުމެއް ނެތި ދައުލަތުގެ ކަންކަން ކުރިއަށް ގެންދިޔުމެވެ. އީރާންގެ ޤާނޫނު އަސާސީގައިވާ ގޮތުގެ މަތިން، އައު ލީޑަރަކު އިންތިޚާބު ކުރުމުގެ މަސައްކަތް ކުރިއަށްދާއިރު، ޤައުމުގެ ސިޔާސީ އަދި އިދާރީ ހިންގުން ކުރިއަށް ގެންދާނީ މި ކައުންސިލްގެ ދަށުންނެވެ.

އީރާންގެ ރޫހާނީ ލީޑަރުގެ މަގާމުގައި ގިނަ އަހަރު ތަކެއް ވަންދެން ހުންނެވި ޚާމަނާއީ އަވަހާރަ ކޮށްލުމަކީ އީރާން އާއި، މުޅި ޤައުމު އަދި ސަރަހައްދުގެ މަސްރަހަށް ބޮޑެތި ބަދަލު ތަކެއް އަތުވެދާނެ ކަމެއް ކަމަށް މަސްރަހު ދިރާސާ ކުރާ ފަރާތް ތަކުން ދެކެ އެވެ. އެހެންކަމުން، މި ދަނޑިވަޅުގައި ޤައުމުގެ ހަމަޖެހުން ޤާއިމު ކުރުމަށްޓަކައި، ވަގުތީ ކައުންސިލެއް އެކުލަވާލުމަކީ ނުހަނު މުހިންމު ކަމެއްގެ ގޮތުގައި އީރާންގެ ސަރުކާރުން ވަނީ ފާހަގަ ކޮށްފަ އެވެ.

އާދީއްތަ ދުވަހު އިއުލާން ކުރާނެ ކަމަށް ބެލެވޭ މި ކައުންސިލްގައި ހިމެނޭނީ ކޮން ބޭފުޅުންނެއް ކަމެއް އަދި ރަސްމީކޮށް ހާމަ ކޮށްފައި ނުވެ އެވެ. ނަމަވެސް، އީރާންގެ ސިޔާސީ ނިޒާމު ރޭވިފައި އޮންނަ ގޮތުން، މިފަދަ ކައުންސިލެއްގައި ދީނީ އިލްމުވރިންނާއި، ދައުލަތުގެ އިސް ބޭފުޅުން ވެސް ހިމެނި ވަޑައިގަންނަވާނެ އެވެ. އައު ލީޑަރަކު ހޮވުމުގެ މަސައްކަތް ކުރިއަށް ދާނީ އީރާންގެ "އެސެމްބްލީ އޮފް އެކްސްޕާޓް" މެދުވެރިކޮށެވެ.