އީރާންގެ ޑިފެންސް މިނިސްޓަރާއި، އަސްކަރިއްޔާގެ ޗީފް ވެސް އަވަހާރަ ކޮށްލައިފި

އެމެރިކާ އާއި އިޒްރޭލް އެކުވެގެން ދެމުން އައި ހަމަލާ ތަކުގައި އީރާންގެ ޑިފެންސް މިނިސްޓަރު އަޒީޒް ނާސިރުޒާދޭ އާއި، އެ ޤައުމުގެ އަސްކަރިއްޔާގެ ޗީފް އޮފް ސްޓާފް ޢަބްދުއްރަހީމް މޫސަވީ ވެސް އަވަހާރަ ކޮށްލައިފި އެވެ.

މިކަން ކަށަވަރު ކޮށްދީފައި ވަނީ އީރާންގެ ރަސްމީ ނިއުސް އެޖެންސީ، އިރްނާ އިންނެވެ. އިރްނާ އިން ބުނެފައިވާ ގޮތުގައި ހޮނިހިރު ދުވަހު ދޭން ފެށި ހަމަލާ ތަކުގައި އީރާންގެ އަސްކަރިއްޔާގެ އިތުރު އިސް ކޮމާންޑަރުން ތަކެއް ވެސް ވަނީ އަވަހާރަވެފަ އެވެ. އަދި އަވަހާރަ ވެފައިވާ އެެހެން ކޮމާންޑަރުންގެ ނަންތައް ކުރިއަށް އޮތް ވަގުތު ތަކުގެ ތެރޭގައި ރަސްމީކޮށް އިއުލާން ކުރާނެ ކަމަށް ވެސް ބުނެފައިވެ އެވެ.

އެމެރިކާގެ ހަމަލާ ތަކުގައި އީރާންގެ ޑިފެންސް މިނިސްޓަރާއި، އަސްކަރިއްޔާގެ ޗީފް އޮފް ސްޓާފް އަވަހާރަ ވެފައިވާ ކަމަށް އިއުލާން ކޮށްފައިވާއިރު، އާދީއްތަ ދުވަހުގެ ހެނދުނު އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ވެފައިވާ ކަމަށް ވެސް ވަނީ އިއުލާން ކޮށްފަ އެވެ. މީގެ އިތުރުން ޚާމަނާއީގެ ސެކިއުރިޓީ އެޑްވައިޒަރު އަލީ ޝަމްޚާނީ އާއި، އިސްލާމިކް ރިވޮލިއުޝަނަރީ ގާޑް ކޯޕްސް (އައިއަރުޖީސީ)ގެ ކޮމާންޑާ އިން ޗީފް މުޙައްމަދު ޕަކްޕޫރު ވެސް ވަނީ އަވަހާރަވެފަ އެވެ. 

މި ހަމަލާ ތަކަކީ ފަހުގެ ތާރީޚެއްގައި އީރާންގެ އަސްކަރީ އަދި ސިޔާސީ އިސްވެރިންނަށް އަމާޒުކޮށް ދެވުނު އެންމެ ވަރުގަދަ އަދި އެންމެ ނުރައްކާތެރި ހަމަލާ ތަކެވެ. މި ހަމަލާތަކާ ގުޅިގެން މެދު އިރުމަތީގެ މަސްރަހު ވަނީ ވަރަށް ބޮޑު ނުތަނަވަސްކަމެއްގެ ތެރޭގަ އެވެ. އީރާންގެ އިސްވެރިން ތަކެއް އަވަހާރަވުމާ ގުޅިގެން އެ ޤައުމުގެ ރައްޔިތުން އަންނަނީ އެކަމުގެ ހިތާމަ ފާޅު ކުރަމުންނެވެ.