އީރާނު ބައިބައިކުރުމުގެ ފުރުސަތެއް ނުދޭނަން، އައު ވެރިއަކު ހޮވުމުގެ މަރުހަލާ އާދީއްތަ ދުވަހު ފަށާނެ: ލަރިޖާނީ
އީރާނުގެ ވެރިކަން ބަދަލުކުރުމުގެ މަރުހަލާ ކުރިއަށް ގެންދިއުމަށްޓަކައި ވަގުތީ ލީޑަޝިޕް ކައުންސިލެއް އެކުލަވާލުމުގެ މަސައްކަތް ފަށާފައިވާ ކަމަށް އެ ގައުމުގެ ސަލާމަތީ ކަންކަމާ ބެހޭ އިސްވެރިޔާ އަލީ ލާރިޖާނީ ވިދާޅުވި. އާ ލީޑަރަކު އިންތިޚާބު ކުރެވެންދެން ގައުމު ހިންގުމުގެ ޒިންމާ އުފުލާނީ ރައީސާއި، ފަނޑިޔާރުގެތަކުގެ އިސްވެރިޔާގެ އިތުރުން ގާނޫނީ މާހިރަކު ހިމެނޭ ކައުންސިލަކުން ކަމަށް އޭނާ ފާހަގަކުރެއްވި.
އިންޑިއާގެ ކަޝްމީރުގެ ސްރީނަގަރުގައި، އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން 2026 މާރިޗު 1 ވާ އާދީއްތަ ދުވަހު ގިނަ އަދަދެއްގެ ބަޔަކު މަގުތަކަށް ނުކުމެ މުޒާހަރާކޮށް އެމެރިކާއާއި އިޒްރޭލާ ދެކޮޅަށް އަޑުއުފުލައި ޝިއާރުތައް ވަނީ ގޮވާފައި. | ރޮއިޓާސް
އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން، އެ ގައުމުގެ ވެރިކަން ބަދަލުކުރުމުގެ މަރުހަލާ އާދީއްތަ ދުވަހުން ފެށިގެން ކުރިއަށްދާނެ ކަމަށް އެ ގައުމުގެ ސަލާމަތީ ކަންކަމާ ބެހޭ އިސްވެރިޔާ އަލީ ލާރިޖާނީ ވިދާޅުވެއްޖެއެވެ.
އީރާނުގެ އެންމެ މަތީ ސަލާމަތީ މަޖިލިސް، ސުޕްރީމް ނޭޝަނަލް ސެކިއުރިޓީ ކައުންސިލްގެ ވެރިޔާ އަދި ޚާމަނާއީގެ އެޑްވައިޒަރުކަން ވެސް ކުރެއްވި ލާރިޖާނީ ވިދާޅުވީ، ގައުމު ހިންގުމަށްޓަކައި ވަގުތީ ލީޑަޝިޕް ކައުންސިލެއް ވަރަށް އަވަހަށް އެކުލަވާލެވޭނެ ކަމަށެވެ. އަދި އާ ލީޑަރަކު އިންތިޚާބު ކުރެވެންދެން ގައުމުގެ ޒިންމާތަކާ ހަވާލުވާނީ ރައީސާއި، ފަނޑިޔާރުގެތަކުގެ އިސްވެރިޔާގެ އިތުރުން ގާޑިއަން ކައުންސިލްގެ ފަރާތުން ކަނޑައަޅާ ގާނޫނީ މާހިރެއް ކަމަށް އޭނާ ވިދާޅުވިއެވެ.
އީރާނުގެ ދައުލަތުގެ ޓީވީ މެދުވެރިކޮށް ދެއްވި އިންޓަވިއުއެއްގައި ލާރިޖާނީ ވިދާޅުވީ، މި ކައުންސިލް ވީ އެންމެ އަވަހަކަށް ގާއިމުކުރެވޭނެ ކަމަށާއި، މިއަދުގެ ވަގުތެއްގައި ވެސް އެ މަސައްކަތް ނިންމުމަށް މަސައްކަތް ކުރަމުންދާ ކަމަށެވެ.
މީގެ އިތުރުން، ޚާމަނާއީ އަވަހާރަކޮށްލުމާ ގުޅިގެން އީރާނު ބައިބައިކޮށްލުމަށް ކުރާ އެއްވެސް މަސައްކަތަކަށް ފުރުސަތު ނުދޭނެ ކަމުގެ އިންޒާރު ވެސް އާދީއްތަ ދުވަހު ލާރިޖާނީ ވަނީ ދެއްވާފައެވެ.
އީރާނުގެ ރައްޔިތުން އެކަތިގަނޑަކަށް ވުމަށް ގޮވާލައްވަމުން ލާރިޖާނީ ވިދާޅުވީ، އީރާނު ބައިބައިކުރަން އުޅޭ ގްރޫޕްތަކުން ކުރާ އެފަދަ ކަންކަމަށް ކެތްތެރި ނުވާނެކަން އެ ފަރާތްތަކުން ދަންނަންޖެހޭނެ ކަމަށެވެ.
މަސްދަރު: އޭއެފްޕީ
