ދުނިޔޭގެ ތެޔޮ ސަޕްލައި ކުރުމުގެ އެންމެ މުހިންމު މަގު ހޮރްމޫޒް ކަނޑުއޮޅި ބަންދުކުރިކަން އީރާނުން ރަސްމީކޮށް އިއުލާނު ކޮށްފި

އެމެރިކާއާއި އިޒްރޭލުން އީރާނަށް ދިން ހަމަލާތަކާ ގުޅިގެން، ހޮރްމޫޒް ކަނޑުއޮޅި ހުރަސްކޮށް އެއްވެސް އުޅަނދެއް ދަތުރުކުރުން އީރާނުން މަނާކޮށްފިއެވެ.

އެ ސަރަހައްދުގައި ހަރަކާތްތެރިވާ އުޅަނދުފަހަރަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ތަކުރާރުކޮށް ފޮނުވަމުންދާ މެސެޖުތަކުގައި ބުނެފައިވަނީ، އިސްތިރާތީޖީ ގޮތުން މުހިންމު އެ ކަނޑުއޮޅި ހުރަސްކުރުމުގެ ހުއްދަ އެއްވެސް އުޅަނދަކަށް މިހާރު ނެތް ކަމަށެވެ.

މި ފިޔަވަޅު އަޅާފައިވަނީ އެމެރިކާއާއި އިޒްރޭލުގެ އަމާޒުތަކަށް އީރާނުގެ ހަތިޔާރު އެޅި ފައުޖުތަކުން ބަދަލުހިފުމުގެ ހަމަލާތައް ދެމުންދާ ދަނޑިވަޅެއްގައެވެ.

އީރާނުގެ ތަސްނީމް ނިއުސް އެޖެންސީއަށް މައުލޫމާތު ދިން އިތުބާރު ހުރި މަސްދަރަކުން ބުނި ގޮތުގައި، އީރާނުން ދެމުންދާ ހަމަލާތަކުގައި އެމެރިކާގެ 14 އަސްކަރީ މަރުކަޒަކަށް މިހާތަނަށް ވަނީ ހަމަލާދީފައެވެ.

މީގެ އިތުރުން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ވަނީ އެ ޖަމާއަތުގެ ކަނޑުގެ ސިފައިން ފޮނުވާލި މިސައިލްތަކުން އެމެރިކާގެ 'އެމް.އެސް.ޓީ' ކޮމްބެޓް ސަޕޯޓް މަނަވަރަށް ވަރުގަދަ ހަމަލާތަކެއް ދީފައިވާކަން އިއުލާންކޮށްފައެވެ.

އައި.އާރް.ޖީ.ސީ އިން ބުނި ގޮތުގައި މިހާރު ކުރިއަށްދާ ހަމަލާތަކުގައި އެމެރިކާގެ ކަނޑުގެ ސިފައިންގެ އެހެނިހެން ވަސީލަތްތައް ވެސް ވަނީ އީރާނުގެ މިސައިލްތަކާއި ޑްރޯންތަކުގެ އަމާޒުފަތްގަނޑުގެ ތެރޭގައެވެ.