އެމެރިކާގެ "މެރިޓައިމް ސްޓްރައިކް ޓޮމަހޯކް" ސަޕޯޓް އުޅަނދަކަށް އީރާނުން މިސައިލް ހަމަލާދީފި

އިޒްރޭލާއި އެމެރިކާއިން އީރާނަށް ދިން އުދުވާނީ ހަމަލާތަކުގެ ބަދަލުހިފުމުގެ ގޮތުން ހިންގާ އޮޕަރޭޝަންތަކުގެ ދަށުން، އެމެރިކާގެ "މެރިޓައިމް ސްޓްރައިކް ޓޮމަހޯކް" (އެމް.އެސް.ޓީ) ސަޕޯޓް އުޅަނދަކަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ހޮނިހިރު ދުވަހު ގިނަ އަދަދެއްގެ މިސައިލް ހަމަލާތަކެއް ފޮނުވާލައިފިއެވެ.

އިސްލާމިކް ރިޕަބްލިކް އޮފް އީރާން ބްރޯޑްކާސްޓިންގް (އައި.އާރު.އައި.ބީ) މެދުވެރިކޮށް އައި.އާރު.ޖީ.ސީގެ ކަނޑުގެ ސިފައިންގެ ޕަބްލިކް ރިލޭޝަންސް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، އެމެރިކާގެ އެމް.އެސް.ޓީ ޕްލެޓްފޯމަށް ގިނަ އަދަދެއްގެ މިސައިލް ހަމަލާތައް އަމާޒުކޮށްފައިވަނީ ދިން ހަމަލާއާ އެކަށީގެންވާ ފަދަ ވަރުގަދަ ރައްދެއް ދިނުމުގެ ގޮތުން ކަމަށެވެ.

މި ފިޔަވަޅު އަޅާފައިވަނީ ހޮނިހިރު ދުވަހުގެ ފަތިހުގެ ވަގުތެއްގައި އިޒްރޭލާއި އެމެރިކާ ގުޅިގެން އީރާނުގެ ވެރިރަށް ތެހެރާނާއެކު އެކި ސިޓީތަކަށް އަމާޒުކޮށް ދިން އާ އުދުވާނީ ހަމަލާތަކާ ގުޅިގެންނެވެ.

މި ހަމަލާތަކުގައި ގިނަ އަދަދެއްގެ ބަޔަކު މަރުވެފައިވާނެ ކަމަށް ބެލެވޭއިރު، އޭގެ ތެރޭގައި ގިނައީ އާންމު ރައްޔިތުންނާއި، އަންހެނުންނާއި ކުޑަކުދިން ކަމަށް ރިޕޯޓްތައް ބުނެއެވެ.

މި ހަމަލާތަކުގެ ރައްދުގައި އީރާނުގެ ހަތިޔާރު އެޅި ސިފައިން ވަނީ ކޯޑިނޭޓް ކުރެވިފައިވާ ބަދަލުހިފުމުގެ އޮޕަރޭޝަންތަކެއް ފަށައި، އިޒްރޭލުން ހިފާފައިވާ ސަރަހައްދުތަކުގައި ހުރި އަސްކަރީ އަދި ޖާސޫސީ މަރުކަޒުތަކުގެ އިތުރުން، ޕާޝިއަން ގަލްފް ސަރަހައްދުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް ހަމަލާދީފައެވެ.

އިޒްރޭލާއި އެމެރިކާ ގުޅިގެން މި އުދުވާނީ ހަމަލާތައް ދީފައިވަނީ، އޮމާން ސަރުކާރު މެދުވެރިވެގެން ތެހެރާނާއި ވޮޝިންގޓަނާ ދެމެދު ނިއުކްލިއާ މައްސަލައިގައި ނުސީދާ މަޝްވަރާތަކެއް ކުރިއަށްދަނިކޮށެވެ.

އެމެރިކާގެ ސަޕޯޓް އުޅަނދަށް ދިން ހަމަލާއަށްފަހު، އައި.އާރު.ޖީ.ސީގެ ކަނޑުގެ ސިފައިން ވަނީ، ކުރިއަށްދާ ބަދަލުހިފުމުގެ އޮޕަރޭޝަންތަކުގެ ދަށުން އެމެރިކާގެ ކަނޑުގެ ސިފައިންގެ އެހެން އުޅަނދުފަހަރުވެސް އީރާނުގެ މިސައިލާއި ޑްރޯންތަކުގެ ރޭންޖުގެ ތެރޭގައިވާ ކަމަށް ބުނެ އިންޒާރު ދީފައެވެ.

އެމެރިކާގެ ކަނޑުގެ ސިފައިން މީގެ ކުރިން ބުނެފައިވަނީ "މެރިޓައިމް ސްޓްރައިކް ޓޮމަހޯކް" (އެމް.އެސް.ޓީ) އަކީ ކަނޑުގެ މަގުން ދޭ ހަމަލާތަކުގައި މުޅި މަންޒަރު ބަދަލުކޮށްލާނެ ފަދަ ވަރުގަދަ ހަތިޔާރެއް ކަމަށެވެ. އަދި އަސްކަރީ މާހިރުން ސިފަކުރާ ގޮތުގައި މިއީ ކަނޑުމަތީގައި ދުޝްމަނުންނަށް ބޮޑެތި ނުރައްކާތަކެއް ކުރިމަތިކުރުވުމަށް ފަރުމާކޮށްފައިވާ ހަތިޔާރެކެވެ.

މަލްޓި-މޯޑް ސީކަރ އެއް ހަރުކޮށްފައިވާ މި ސިސްޓަމަކީ ދަތުރުކުރަމުންދާ ހަނގުރާމަމަތީ އުޅަނދުފަހަރު ދެނެގަނެ، ދަތުރުމަތީގައި އަމާޒުތަކުގެ މައުލޫމާތު އާކުރަމުންދާ، އަދި ކަނޑުމަތީގައި ހަރަކާތްތެރިވާ އަމާޒުތަކަށް އިންތިހާއަށް ސައްހަކަމާއެކު ހަމަލާދިނުމުގެ ގާބިލުކަން ލިބިފައިވާ ސިސްޓަމެއް ކަމަށް ބުނެވެއެވެ.