ޚާމަނާއީ އަވަހާރަ ކޮށްލުމުގެ ހިތާމައިގައި އެތައް ހާސް ބަޔަކު އީރާންގެ މަގު ތަކަށް ނިކުމެއްޖެ

އެމެރިކާ އިން ދިން ހަމަލާ ތަކެއްގައި އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލާފައިވާއިރު، އެކަމުގެ ހިތާމަފާޅު ކުރުމުގެ ގޮތުން އެތައް ހާސް ބަޔަކު އީރާންގެ މަގު ތަކަަށް ނިކުމެއްޖެ އެވެ. 

އީރާންގެ އިސްފަހާންގެ މަގު ތަކަށް އެތައް ހާސް ބަޔަކު ޖަމާވެފައިވާއިރު، އީރާން އަށް މިއީ މާޔޫސީ ވަގުތު ކޮޅެކެވެ. އިސްފަހާންގެ މަޝްހޫރު ނަގްޝޭ މައިދާނަށް އެއްވި ގިނަ އަދަދެއްގެ ރައްޔިތުން ދަނީ ޚާމަނާއީގެ ހަނދާން އައުކޮށް، އެމަނިކުފާނަށް އިޙުތިރާމް އަދާ ކުރަމުންނެވެ. 

އީރާންގެ ދައުލަތުގެ އިނގިރޭސި ޗެނަލެއް ކަަމަށްވާ ޕްރެސް ޓީީވީ އިން އާންމު ކޮށްފައިވާ ވީޑިއޯ ތަކުން ފެންނަ ގޮތުގައި، އިސްފަހާންގެ މައިދާނަށް ޖަމާވި ގިނަ އަދަދެއްގެ މީހުން ދަނީ ޝުއޫރު ފާޅު ކުރުމުގެ އިތުރުން، މުޒާހަރާ ވެސް ކުރަމުންނެވެ. މިއީ ޚާމަނާއީ އަވަހާރަ ކޮށްލުމުގެ ހިތާމައިގައި ބައިވެރިވުމަށާއި، އެމަނިކުފާނު އަވަހާރަވުމަށް ދިން ހަމަލާއާ ދެކޮޅަށް އަޑު އުފުލުމަށް ބޭއްވި އެއްވުމެކެވެ. 

އީރާންގެ ސަރުކާރުން އާދީއްތަ ދުވަހުގެ ހެނދުނު ވަނީ، އެ ޤައުމުގެ އެންމެ މަތީވެރިޔާ ޚާމަނާއީ އަވަހާރަވެފައިވާކަން ކަށަވަރު ކޮށްދީފަ އެވެ. އެމެރިކާގެ ހަމަލާ ތަކުގައި ޚާމަނާއީ އަވަހާރަ ކޮށްލާފައިވާއިރު، އީރާން އިން ވަނީ ހިތާމަ ފާޅު ކުރުމަށް 40 ދުވަހުގެ މުއްދަތެއް ކަނޑައަޅައިފަ އެވެ. އަދި އެ ހިތާމައިގައި ބައިވެރިވުމުގެ ގޮތުން ހަތް ދުވަހަށް ސަރުކާރު ބަންދު ކުރުމަށް ވެސް އީރާންގެ ސަރުކާރުން ވަނީ ނިންމައިފަ އެވެ. 

މި ހާދިސާއާ ގުޅިގެން އީރާން އަށް ބޮޑު ސިހުމެއް ލިބިފައިވާއިރު، އެ ޤައުމުގެ އެކި ހިސާބު ތަކުގައި ދަނީ ހިތާމަ ފާޅު ކުރަމުގެ ގޮތުން އެކި އެކި ޙަރަކާތްތައް ކުރިއަށް ގެންދަމުންނެވެ. އިސްފަހާން އަކީ އީރާންގެ ތާރީޚީ އަދި ސަގާފީ ގޮތުން މުހިންމު ސަރަހައްދަަކަށްވާއިރު، އެ ސަރަހައްދުގައި އެއްވެފައިވާ މީހުންގެ އަދަދު އިންތިހާ އަށް ގިނަ ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ.

އީރާންގެ ވެރިކަން ބަދަލު ކުރުމަކީ އެމެރިކާ އާއި އިޒްރޭލްގެ އިތުރުން، އެ ޤައުމުތަކުގެ ބައިވެރިން ވެސް ބޭނުންވާ ކަމެކެވެ. މީގެ ކުރިން ވެސް އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާންގެ ވެރިކަން ބަދަލުވުމަކީ އެންމެ ރަނގަޅު ގޮތް ކަމަށް ވިދާޅުވެފަ އެވެ. ޚާމަނާއީ ފާހަގަ ވެގެން ގޮސްފައި ވަނީ، އެމެރިކާ އާއި އިޒްރޭލްގެ ކުރިމަތީގައި ފަސް ޖެހުމެއް ނެތި ބަސް ވިދާޅުވާ، ޖެހިލުން ކުޑަ ވެރިއެއްގެ ގޮތުގަ އެވެ.