ޚާމަނާއީ އަވަހާރަ ކޮށްލުމަކީ ޖަރީމާއެއް، ދޫ ނުދީ ބަދަލު ހިފާނަން: އީރާންގެ ރައީސް

އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލުމަކީ ބޮޑު ޖަރީމާއެއް ކަމަށާއި، އެކަމުގައި ދޫ ނުދީ، ބަދަލު ހިފާނެ ކަމުގެ އިންޒާރު އީރާންގެ ރައީސް މަސްއޫދު ޕެޒެޝްކިއާން ދެއްވައިފި އެވެ. 

އީރާންގެ ރައީސްގެ އޮފީހުން ނެރުނު ބަޔާނެއްގައި ބުނެފައި ވަނީ، ޚާމަނާއީ އަވާހަރަ ކޮށްލި އަމަލަކީ އިސްލާމީ އުންމަތާއި، ޝީއީ ތާރީޚުގައި ވެސް އައު ސަފުހާ ތަކެއް ހުޅުވިގެންދާނެ ކަމެއް ކަމަށާއި، އެ ޖަރީމާ އަށް ރައްދު ދޭނެ ކަމަށެވެ. އަދި އެކަމުގައި އެއްވެސް ދޫ ދިނުމެއް ނޯންނާނެ ކަމަށް ބުނެފައިވެ އެވެ. 

އީރާންގެ ރައީސް ޕެޒެޝްކިއާންގެ ބަޔާނުގައި ވިދާޅުވީ، ޚާމަނާއީގެ މަތިވެރި ލޭ ފޮދު އޮހޮރާލުމަކީ އެމެރިކާ އާއި، ޒަޔަނިސްޓުންގެ އަނިޔާވެރިކަމާއި ޖަރީމާތައް ނައްތާލުމަށް ލިބުނު އައު ހިތްވަރަކަށް ވާނެ ކަމަށެވެ. ޚާމަނާއީ އަވަހާރަ ކޮށްލި ހަމަލާ އަށް އިޝާރާތް ކުރައްވައި ޕެޒެޝްކިއާން ވިދާޅުވީ، އަނިޔާވެރި ކަމުގައި ހިންގާ އުދުވާންތައް މުލުން ލުހެލާނެ ކަމަށެވެ. 

މީގެ އިތުރުން އިސްލާމީ އުންމަތާއި ދުނިޔޭގެ މިނިވަން ކަމަށް ލޯބި ކުރާ ރައްޔިތުންގެ އެހީތެރިކަމާ އެކު، މި ބޮޑު ޖަރީމާ ހިންގުމުގައި ބައިވެރިވި މީހުންނާއި، އެކަމަށް އަމުރު ކުރި ފަރާތް ތަކުން ހިތާމަ ކުރަން ޖެހޭ ފަދަ ވަރުގަދަ ރައްދެއް ދޭނެެ ކަމަށް ވެސް ޕެޒެޝްކިއާން ވިދާޅުވި އެވެ. އެއާ އެކު ޕެޒެޝްކިއާން ވިދާޅުވީ، އެކަމުގައި އީރާން ދެމި އޮންނާނީ ފަސް ޖެހުމެއް ނެތް ވަރުގަދަ ޢަޒުމެއްގައި ކަމަށެވެ. 

އީރާންގެ އެންމެ މަތީ ވެރިޔާ ޚާމަނައީ އަވަހާރަ ކޮށްލުމާ ގުޅިގެން، އީރާންގެ ސަރުކާރުން ވަނީ 40 ދުވަހަށް ހިތާމަ ފާޅު ކުރުން އިއުލާން ކޮށްފަ އެވެ. އަދި އެ ހިތާމައިގައި ބައިވެރިވުމަށް، ހަތް ދުވަހަަށް ސަރުކާރު ބަންދު ކުރުމަށް ވެސް ރައީސް ވަނީ ނިންމަވައިފަ އެވެ.