ޚާމަނާއީ އަވަހާރަ ކޮށްލުމުން، އިޒްރޭލްގެ ޑިފެންސް މިނިސްޓަރު އުފާ ފާޅު ކޮށްފި

އެމެރިކާ އިން ދިން ހަމަލާ ތަކެއްގައި އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލުމާ ގުޅިގެން، އިޒްރޭލްގެ ޑިފެންސް މިނިސްޓަރު އިޒްރޭލް ކާޓްޒް އުފާ ފާޅު ކޮށްފި އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ކާޓްޒް ވިދާޅުވެފައި ވަނީ، އިޒްރޭލް އިން ނައްތާލަންް މަސައްކަތް ކުރި ފަރާތް ނައްތާލެވިފައިވާ ކަމަށާއި، އިންސާފު ޤާއިމު ކޮށްފައިވާ ކަމަށެވެ. އަދި ނުބައި ފަރާތް ތަކުގެ ގުޅުމަށް ވަރަށް ބޮޑު ހަމަލާއެއް ވެސް ލިބިފައިވާ ކަމަށް އޭނާ ވިދާޅުވި އެވެ. 

ޚާމަނާއީ އަވަހާރަ ކޮށްލާފައިވާއިރު، ކާޓްޒް ވިދާޅުވީ އިޒްރޭލް އިން ފުރިހަމަ ބާރާ އެކު މަސައްކަތް ކުރާނެ ކަމަށާއި، އެ މަސައްކަތް ކުރިއަށް ގެންދާނެ ކަމަށެވެ. ކާޓްޒްގެ ވާހަކަ އިން ދޭހަވަނީ އިޒްރޭލް އިން އަދި ވެސް ހަމަލާ ދިނުމާއި، އޮޕަރޭޝަންތައް ކުރިއަށް ގެންދާނެ ކަމަށް ބައިނަލްއަޤުވާމީ މާހިރުން ބުނެ އެވެ. 

އެމެރިކާ އާއި އިޒްރޭލް އެކުވެގެން ހޮނިހިރު ދުވަހު އީރާން އަށް ހަމަލާ ދޭން ފަށާފައިވާއިރު، އާދީއްތަ ދުވަހުގެ ހެނދުނު ވަނީ ޚާމަނާއީ އަވަހާރަ ވެފައިވާކަން ކަށަވަރުވެފަ އެވެ. އީރާންގެ ސަރުކާރުން ވެސް އެކަން ހާމަ ކޮށްފައިވާއިރު، ކާޓްޒް ވަނީ އެކަމާ މެދު އުފާާ ފާޅު ކޮށްފަ އެވެ. އެގޮތުން އޭނާ ވަނީ އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ އާއި، އެ ޤައުމުގެ އަސްކަރިއްޔާ އަށް ތަޙުނިޔާ ވެސް ފޮނުއްވައިފަ އެވެ. 

އެމެރިކާ އާއި އިޒްރޭލް އިން ހިންގި ހަނގުރާމައިގައި އީރާންގެ އެންމެ އިސް ލީޑަރު އަވަހާރަވެފައިވާއިރު، އެއީ މުޅި ސަރަަހައްދުގެ ހަަމަޖެހުން ގެއްލި، ސިޔާސީ ގޮތުން ވެސް ނުތަނަވަސްކަން ކުރިމަތި ވާނެ ކަމެކެވެ. އީރާން އިން މިހާރު ބުނަމުން އަންނަނީ، އެމެރިކާ އާއި އިޒްރޭލް އަށް އަމާޒުކޮށް އެ ޤައުމުން ވަރުގަދަ ހަމަލާ ތަކެއް ދޭނެ ކަމަށެވެ. 

ހަމަލާތައް ދިނުމުގެ ކުރިން ވެެސް، އިޒްރޭލްގެ ބޮޑު ވަޒީރު ނަތަންޔާހޫ ވިދާޅުވެފައި ވަނީ އީރާންއާ ދެކޮޅަށް ހަރުކަށި ފިޔަވަޅު ތަކެއް އަޅުއްވާނެ ކަމަށެވެ. އަދި އީރާންގައި އޮތް ވެރިކަން ބަދަލު ކުރުމާއި، ޚާމަނައީ އަވަހާރަ ކޮށްލުމަކީ އެމެރިކާއާ އެއްވަރަށް، އިޒްރޭލް އިން ވެސް ބޭނުންވެފައި އޮތް ކަމެކެވެ.