މެދު އިރުމަތީގައި ހުރި އެމެރިކާގެ 27 އަސްކަރީ މަރުކަޒަކަށް އީރާން އިން ހަމަލާ ދީފި

އެމެރިކާ އާއި އިޒްރޭލް އިން އީރާނަށް ދެމުން އަންނަ ހަމަލާ ތަކަށް ބަދަލު ހިފުމުގެ ގޮޮތުން، މެދު އިރުމަތީގައި ހުރި އެމެރިކާގެ 27 އަސްކަރީ މަރުކަޒަކަށް އަމާޒުކޮށް އީރާން އިން ވަރުގަދަ ހަމަލާ ތަކެއް ދީފި އެވެ.

މިކަން ހާމަ ކޮށްފައި ވަނީ އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިންނެވެ. އީރާނުގެ ދައުލަތުގެ މީޑިއާ އިން ބުނެފައިވާ ގޮތުގައި، މިއީ އެމެރިކާ އާއި އިޒްރޭލް އިން އީރާނަށް ދެމުން ގެންދާ ހަމަލާ ތަކަށް ރައްދު ދިނުމުގެ ގޮތުން، އީރާނުން ފެށި ބަދަލު ހިފުމުގެ ހަ ވަނަ މަރުހަލާ އެވެ. 

އައިއާރުޖީސީ އިން ނެރެފައިވާ ބަޔާނެއްގައި ބުނެފައި ވަނީ، އިޒްރޭލަށާއި، ސަރަހައްދުގައި ހުރި އެމެރިކާގެ އަސްކަރީ މަރުކަޒު ތަކަށް އަމާޒުކޮށް، ފުޅާ ދާއިރާއެއްގައި މިސައިލް އާއި، ޑްރޯން ބޭނުން ކޮށްގެން ހަމަލާ ތަކެއް ދީފައިވާ ކަމަށެވެ. މި ހަމަލާ ތަކުގައި އެމެރިކާގެ 27 އަސްކަރީ މަރުކަޒެއްގެ އިތުރުން، އިޒްރޭލްގެ ތެލް ނޮފް އެއާ ބޭސް އަށާއި، ތެލް އަވީވްގައި ހުންނަ އިޒްރޭލް ސިފައިންގެ ކޮމާންޑް ހެޑް ކުއާޓާސް އަށް ވެސް ހަމަލާ ދީފައިވާ ކަމަށެވެ. 

މީގެ އިތުރުން ތެލް އަވީވްގައި ހުންނަ ދިފާއީ ސިނާއަތުގެ ބޮޑު ކޮމްޕްލެކްސް އަކަށް ވެސް ހަމަލާ އަމާޒުވެފައިވާނެ ކަމަަށް އީރާނުން ވަނީ ބުނެފަ އެވެ. އީރާންގެ އަސްކަރިއްޔާ އިން ބުނި ގޮތުގައި މި ހަމަލާ ތަކަކީ، އެމެރިކާ އާއި އިޒްރޭލްގެ އުދުވާނަށް އެ ޤައުމުން ދޭ ހަރުކަށި ޖަވާބެކެވެ. އަދި ކުރިއަށް އޮތް ތަނުގައި، އީރާންގެ ސިފައިން ބަދަލު ހިފުމުގެ ތަފާތު އަދި މިއަށްވުރެ ވަރުގަދަ ފިޔަވަޅު ތަކެއް އަޅާނެ ކަަމަަށާއި، ޖެހި ޖެހިގެން ދެވޭ މި ހަމަލާ ތަކަކީ ދުޝްމަނުން ހިތާމަ ކުރާނެ ހަމަލާ ތަކެއް ކަމަށް ބުނެފައިވެ އެވެ. އަދި މިއީ "ހޫނު އެތި ފަހަރު ތަކެއް" ކަމަށް ވެސް އައިއާރުޖީސީ އިން ވަނީ ބުނެފަ އެވެ. 

މި ހަމަލާތަކާ ގުޅިގެން މެދު އިރުމަތީގެ މަސްރަހު ވަނީ ވަރަށް ބޮޑު ނުތަނަވަސްކަމެއްގެ ތެރޭގަ އެވެ. އީރާނުން މިފަދަ ވަރުގަދަ ހަމަލާ ތަކެއް ދީފައި ވަނީ، އެމެރިކާ އާއި އިޒްރޭލުން ދެމުންދާ ހަމަލާތައް ވަރުގަދަ ކޮށްފައި ވަނިކޮށެވެ. އެ ހަމަލާ ތަކުގައި އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ ވެސް ވަނީ އަވަހާރަ ކޮށްލައިފަ އެވެ.