އީރާންގެ މިސައިލް ނިޒާމަށް އިޒްރޭލުން ހަމަލާ ދީފި

އީރާންގެ މެދު ތެރޭގައި ހުންނަ މިސައިލް އަދި ވައިގެ ދިފާއީ ނިޒާމު ތަކަށް އަމާޒުކޮށް ހަަމަލާ ދީފައިވާ ކަމަށް އިޒްރޭލް އިން ބުނެފި އެވެ. 

އިޒްރޭލްގެ އަސްކަރިއްޔާ އިން މިކަން ހާމަ ކޮށްފައި ވަނީ އެކްސްގައި ކުރި ޕޯސްޓެއްގަ އެވެ. 

އިޒްރޭލްގެ އަސްކަރިއްޔާގެ ބަޔާނުގައި ބުނެފައި ވަނީ، އީރާނުގެ މެދު ތެރޭގައި ދިން މި ހަމަލާ ތަކުގެ ސަބަބުން، އިޒްރޭލަށް ދޭންއުޅުނު  އެތައް މިސައިލް ހަމަލާ ތަކެއް ހުއްޓުވާފައިވާ ކަމަށެވެ.

އިޒްރޭލުން ބުނީ އެ ޤައުމުން ދިން ހަމަލާ ތަކުގެ ސަބަބުން، އީރާނުގެ ވެރިކަމުގެ އެންމެ މުހިންމު ބާރު ތަކަށް، އަދި ހަމަލާދޭ ނިޒާމަށް ވަރަށް ބޮޑެތި ގެއްލުން ތަކެއް ދީފައިވާ ކަމަށެވެ.

އިޒްރޭލްގެ ސިފައިންގެ ބަޔާނުގައި ބުނެފައިވާ ގޮތުގައި، މި ހަމަލާ ތަކުގެ މަގުސަދަކީ އީރާނުގެ މިސައިލް ހަރުތަކާއި، ވައިގެ ދިފާއީ ނިޒާމުތައް ނައްތާލުމެވެ. އަދި މި ހަމަލާ ތަކުގެ ސަބަބުން، އިޒްރޭލަށް ހަމަލާ ދިނުމުގައި އީރާނުގެ ޤާބިލުކަން ވަރަށް ބޮޑަށް ދަށްވެފައިވާ ކަމަށް އިޒްރޭލުން ބުނެފައިވެ އެވެ.

މި ހަމަލާ ތަކުގައި އީރާނުގެ މެދުތެރޭގައި ހުންނަ ސްޓްރެޓީޖިކް ލަނޑު ދަނޑިތަކަށް ވަރަށް ބޮޑެތި ގެއްލުންތަކެއް ދެވިފައިވާ ކަމަށް އިޒްރޭލްގެ އަސްކަރިއްޔާ އިން ދަޢުވާކުރެ އެވެ. އަދި އީރާނުގެ ވައިގެ ދިފާއީ ނިޒާމަށް ވެސް ގެއްލުން ތަކެއް ދީފައިވާ ކަމަށް ފާހަގަ ކޮށްފައިވެ އެވެ. 

އިޒްރޭލްގެ ހަމަލާ ތަކުގެ ރައްދުގައި އީރާނުން ވެސް ވަރުގަދަ ހަމަލާ ތަކެއް ދެމުން އަންނައިރު، އިޒްރޭލުން އެކަމުގެ މައުލޫމާތު ހާމަ ކޮށްފައި ނުވެ އެވެ.