މެދުއިރުމަތީގެ މަސްރަހު ނުރައްކާވެ، ދުބާއީ އެއާޕޯޓާއެކު އެ ސަރަހައްދުގެ މައި އެއާޕޯޓުތައް ބަންދު ކުރުމުން ދުނިޔޭގެ ވައިގެ ދަތުރުފަތުރަށް ބޮޑު ލޮޅުމެއް އަރައިފި

އިޒްރޭލާއި އެމެރިކާއިން އީރާނަށް ދިން ހަމަލާތަކާއި، އޭގެ ބަދަލުހިފުމުގެ ގޮތުން އީރާނުން ފޮނުވާލި މިސައިލް ހަމަލާތަކާ ގުޅިގެން މެދުއިރުމަތީގެ މަސްރަހު ގޯސްވެ، ދުނިޔޭގެ އެންމެ ބާރުބޮޑު ބައިނަލްއަގުވާމީ ވައިގެ ބަނދަރު ކަމަށްވާ ދުބާއީ އެއާޕޯޓާއެކު އެ ސަރަހައްދުގެ މައި އެއާޕޯޓުތައް ހޮނިހިރު ދުވަހު ބަންދުކޮށްފިއެވެ. މިއީ ފަހުގެ ތާރީޚެއްގައި ދުނިޔޭގެ ވައިގެ ދަތުރުފަތުރަށް ކުރިމަތިވި އެންމެ ބޮޑު އެއް ހުރަހެވެ.

ދުވާލަކު 1،000 އަށްވުރެ ގިނަ ފްލައިޓް އޮޕަރޭޓްކުރާ ދުބާއީ އިންޓަނޭޝަނަލް އެއާޕޯޓަށް، އަރަބި ގަލްފުގެ ގައުމުތަކަށް އަމާޒުކޮށް އީރާނުން ރޭގަނޑު ދިން ބަދަލުހިފުމުގެ ހަމަލާތަކުގައި ގެއްލުންތަކެއް ލިބިފައިވާއިރު، އަބޫދާބީ އާއި ކުވެއިތުގެ ބައިނަލްއަގުވާމީ އެއާޕޯޓުތަކަށްވެސް ވަނީ ހަމަލާތައް އަމާޒުވެފައެވެ. މި ހަމަލާތަކާ ގުޅިގެން މެދުއިރުމަތީގެ ގައުމުތަކުން އެ ގައުމުތަކުގެ ވައިގެ ސަރަހައްދު ބަންދުކުރުމުން، ދުބާއީ، ދޯހާ އަދި އަބޫދާބީ ފަދަ ސަރަހައްދީ މައި ދޮރާށިތައް ވަނީ ބަންދުވެފަ އެވެ.

ވައިގެ ދަތުރުފަތުރުގެ ޗާޓުތަކުން ފެންނަ ގޮތުގައި އީރާނު، އިރާގު، ކުވެއިތު، އިޒްރޭލު އަދި ބަހްރޭންގެ ވައިގެ ސަރަހައްދު މިހާރު އޮތީ މުޅިން ހުސްކޮށެވެ. މީގެ އިތުރުން ޔޫރަޕާއި މެދުއިރުމަތީގެ އެއާލައިންތަކުން ވަނީ ގިނަ އަދަދެއްގެ ދަތުރުތައް ކެންސަލްކުރިކަން އިއުލާންކޮށްފައެވެ.

ދުބާއީ އާއި އަވަށްޓެރި ދޯހާއަކީ އިރުމައްޗާއި ހުޅަނގުގެ ވައިގެ ދަތުރުފަތުރު ގުޅުވައިދޭ މައި މަރުކަޒުތަކެވެ. ޔޫރަޕާއި އޭޝިއާއާ ދެމެދު ކުރާ ދިގު ދަތުރުތައް ގުޅުވައިދެނީ މި އެއާޕޯޓުތަކުންނެވެ. އެހެންކަމުން، މި އެއާޕޯޓުތައް ގިނަ ވަގުތަކަށް ބަންދުކުރުމުގެ އަސަރު މުޅި ދުނިޔެއަށް ފޯރައި، އެއާލައިންތަކަށް ދަތުރުތަކުގެ މަގު ބަދަލުކުރަން ނުވަތަ ދަތުރުތައް ކެންސަލްކުރަން ވަނީ މަޖުބޫރުވެފައެވެ.

"ދަތުރު ކުރެވޭނެ ދުވަހެއްގެ ޔަގީންކަމެއް ނެތި، ދުނިޔޭގެ އެކި ކަންކޮޅުތަކުގައި އެތައް ލައްކަ ބަޔަކު ތާށިވާނެ،" އިނގިރޭސިވިލާތުގެ އޭވިއޭޝަން އެނަލިސްޓް ޖޯން ސްޓްރިކްލޭންޑް ވިދާޅުވިއެވެ.

ސްޓްރިކްލޭންޑް އިތުރަށް ފާހަގަކުރެއްވި ގޮތުގައި، މިއަދު ދިމާވެފައިވާ ކަންކަމުގެ އިތުރުން، މިކަން ދިގުލައިގެން ދިއުމުން ކުރާނެ ނޭދެވޭ އަސަރުތައް ވަރަށް ބޮޑެވެ. އަދި އެމިރޭޓްސް އާއި ގަތަރު އެއާވޭސް ފަދަ ގަލްފުގެ ބޮޑެތި އެއާލައިންތަކަކީ ދުނިޔޭގެ އެންމެ ބޮޑު ކާގޯ އޮޕަރޭޓަރުންގެ ތެރޭގައި ހިމެނޭ އެއާލައިންތައްކަންވެސް އޭނާ ފާހަގަކުރެއްވިއެވެ.

ދުބާއީ އެއާޕޯޓްސް އިން ވަނީ ދުބާއީ އިންޓަނޭޝަނަލް އެއާޕޯޓާއި އަލް މަޚްތޫމް އިންޓަނޭޝަނަލް އެއާޕޯޓުގެ ހުރިހާ ދަތުރުތަކެއް ވަކި އެއްޗެއް އަންގަންދެން މެދުކަނޑާލާފައެވެ. އަދި ފަސިންޖަރުން ދަތުރު ނުކުރުމަށްވެސް ވަނީ އިލްތިމާސްކޮށްފައެވެ.

ވައިގެ ސަރަހައްދު 'ގިނަ ދުވަސްތަކަކަށް' ބަންދުވެދާނެ

އެމެރިކާ އާއި އިޒްރޭލުން ހޮނިހިރު ދުވަހު އީރާނަށް ދިން ވަރުގަދަ ހަމަލާތަކުގައި އީރާނުގެ ރޫހާނީ ލީޑަރު އަލީ ޚާމަނާއީ ވަނީ އަވަހާރަކޮށްލާފައެވެ. މިއާއެކު އީރާނުން ވަނީ މިސައިލާއި ޑްރޯން ބޭނުންކޮށްގެން ބަދަލުހިފުމުގެ ހަމަލާތައް ދީފައެވެ. މީގެ ސަބަބުން މެދުއިރުމަތީގައި ބޮޑު ހަނގުރާމައެއް ފެށުމުގެ ބިރު ވަނީ ވަރަށް ބޮޑަށް އިތުރުވެފައެވެ.

"ވައިގެ ސަރަހައްދު ގިނަ ދުވަސްތަކަކަށް ބަންދުވެފައި އޮންނާނެ ކަމަށް ފަސިންޖަރުންނާއި އެއާލައިންތަކުން ބަލަންޖެހޭ،" އޭވިއޭޝަން ސެކިއުރިޓީ އެޑްވައިޒަރީ 'ޑަޔާމީ' ގެ ވެރިޔާ އެރިކް ޝައުޓެން ވިދާޅުވިއެވެ.

ސީރިއަމްގެ ތަފާސްހިސާބުތަކުން ދައްކާ ގޮތުގައި، އެމެރިކާ އާއި އިޒްރޭލުން އީރާނަށް ދިން ހަމަލާތަކާ ގުޅިގެން ހޮނިހިރު ދުވަހު ގަތަރާއި އިޒްރޭލަށް ކުރަން އޮތް ދަތުރުތަކުގެ ދެބައިކުޅަ އެއްބައި ވަނީ ކެންސަލްކޮށްފައެވެ. އަދި ކުވެއިތަށް ކުރަން އޮތް ދަތުރުތަކުގެ 28 އިންސައްތަ ކެންސަލްކޮށްފައިވާއިރު، މުޅި މެދުއިރުމަތީގެ ދަތުރުތަކުގެ 24 އިންސައްތަ ވަނީ ކެންސަލްކޮށްފައެވެ.

ރަޝިއާ-ޔޫކްރޭން ހަނގުރާމައާ ގުޅިގެން އެ ދެ ގައުމުގެ ވައިގެ ސަރަހައްދު ބޭނުންކުރުން ހުއްޓާލުމާ ގުޅިގެން، މެދުއިރުމަތީގެ ވައިގެ ސަރަހައްދަކީ ދުނިޔޭގެ ވައިގެ ދަތުރުފަތުރަށް މިހާރު ވަރަށް މުހިންމު ސަރަހައްދެކެވެ.

ހަނގުރާމަ ހިނގާ ސަރަހައްދުތަކުގެ މަތިން ދަތުރުކުރުމަކީ ނުރައްކާތެރި ކަމަކަށްވާއިރު، އޮޅުމަކުން ބޯޓުތަކަށް ހަމަލާދީ ވައްޓާލުމުގެ ބިރު އޮވެއެވެ. އަދި ދަތުރުގެ މަގު ދިގުވުމުގެ ސަބަބުން ތެލަށް ކުރާ ހޭދަވެސް ބޮޑުވެގެންދެއެވެ.

ޔޫރަޕްގެ އެކި ހިސާބުތަކުގައި ފަސިންޖަރުން ތާށިވެފައި

ޕެރިހުން ދުބާއީއަށް ދަތުރުކުރަން އުޅުނު ދަރިވަރުން ބުނި ގޮތުގައި އެކުދިންގެ ކޮލެޖް ދަތުރު ވަނީ ހުއްޓާލަން ޖެހިފައެވެ. "އަހަރެމެންގެ ބައެއް ދަރިވަރުން މާ ކުރިން އެކޮޅަށް ގޮސް އެބަތިބި. އެކުދިން މިހާރު ތިބީ ދުބާއީގައި ތާށިވެފައި. އެނބުރި އާދެވޭނެ ދުވަހެއް ނޭނގޭ،" ބެންޖަމިން ގްނަޓެކް ބުންޏެވެ.

ޕެރިހުގެ ޗާލްސް ޑި ގޯލް އެއާޕޯޓުގައި ހުރި ރޯމަން ސައިމަން ބުނީ، ދޯހާ މަގުން ތައިލެންޑަށް ދާން އޮތް އޭނާގެ ފްލައިޓް ކެންސަލްވެފައިވާ ކަމަށެވެ.

"މިހާރު އަހަރެމެން މި ބަލަނީ ތައިލެންޑަށް ދެވޭނެ އެހެން ގޮތެއް ފެނޭތޯ،" ރޮއިޓާސްއާ ވާހަކަދައްކަމުން އޭނާ ބުންޏެވެ.

ދޯހާގެ ހަމަދު އިންޓަނޭޝަނަލް އެއާޕޯޓުގައި ތާށިވެފައި ތިބި ފަސިންޖަރުން ހޮޓާ ހަމަޖެއްސުމަށް ކިއޫ ހަދާފައިވާއިރު، އެއާޕޯޓުގެ ގޭޓުތައް ހުރީ މުޅިން ހުސްކޮށް ކަމަށް ރޮއިޓާސްގެ ރިޕޯޓަރުން ބުނެއެވެ.

ސަރަހައްދުގެ ގައުމުތަކުން ވައިގެ ސަރަހައްދު ބަންދުކުރުމާ ގުޅިގެން، ބޯޓުތަކުގެ މިސްރާބު ވަނީ ލާނަކާ، ޖިއްދާ، ގާހިރާ އަދި ރިޔާޒަށް ބަދަލުކޮށްފައެވެ. މީގެ އިތުރުން، މައުލޫމާތު ހޯދާ މީހުން ގިނަވުމުގެ ސަބަބުން ފްލައިޓްރޭޑާ24 ވެބްސައިޓްވެސް ވަނީ ވަގުތީ ގޮތުން މެދުކެނޑިފައެވެ.

ޔޫރަޕިއަން ޔޫނިއަންގެ އޭވިއޭޝަން ރެގިއުލޭޓަރު "އީސާ" އިން ހޮނިހިރު ދުވަހު ވަނީ، ހަނގުރާމައިގެ އަސަރުކޮށްފައިވާ ވައިގެ ސަރަހައްދުތަކަށް އެ އިއްތިހާދުގެ އެއާލައިންތަކުން ދަތުރު ނުކުރުމަށް އިރުޝާދު ދީފައެވެ.