ޒަޔަނިސްޓު މުޖުރިމުންނާއި ނުލަފާ އެމެރިކާ އިން ހިންގި އަމަލުތަކާ މެދު ހިތާމަކުރަން ޖެހޭވަރު ކުރާނެ ކަމަށް އީރާނުގެ ސަލާމަތީ އިސްވެރިޔާ ވިދާޅުވެއްޖެ
އިސްރާއީލާއި އެމެރިކާ ގުޅިގެން އީރާނުގެ އާންމުން ދިރިއުޅޭ ސަރަހައްދުތަކަށް ދިން ނުރައްކާތެރި ހަމަލާތަކުގައި 200 އަށްވުރެ ގިނަ މީހުން މަރުވުމާ ގުޅިގެން، އީރާނުގެ އަސްކަރިއްޔާއިން ވަނީ އިޒްރޭލުގެ ރަށްތަކަށާއި މެދުއިރުމަތީގައި ހުރި އެމެރިކާގެ މަރުކަޒުތަކަށް ވަރުގަދަ ރައްދު ހަމަލާތަކެއް ދީފައި. މި ހަމަލާތަކާ ގުޅިގެން އީރާނުގެ ޚާރިޖީ ވަޒީރު ވިދާޅުވީ އަމިއްލަ ނަފްސު ދިފާއުކުރުމުގެ ބާރު އީރާނަށް ލިބިގެންވާ ކަމަށާއި، އުދުވާނީ ހަމަލާތައް ހުއްޓާލުމުން ނޫނީ ރައްދު ދިނުން ހުއްޓާނުލާނެ ކަމަށް.
އީރާނުގެ ސަލާމަތީ ކަންކަމާ ބެހޭ އެންމެ އިސް އެއް މަސްއޫލުވެރިޔާ އަލީ ލަރިޖާނީ. | ރޮއިޓާސް
ޒަޔަނިސްޓު މުޖުރިމުންނާއި ނުލަފާ އެމެރިކާ އިން ހިންގި އަމަލުތަކާ މެދު ހިތާމަކުރަން ޖެހޭވަރު ކުރާނެ ކަމަށް އީރާނުގެ ސަލާމަތީ އިސްވެރިޔާ ވިދާޅުވެއްޖެއެވެ. ހޮނިހިރު ދުވަހު އިޒްރޭލާއި އެމެރިކާ ގުޅިގެން ދިން ނުރައްކާތެރި ހަމަލާތަކާ ގުޅިގެން، އެ ދެ ގައުމު އެކަމާ ހިތާމަކުރަން ޖެހޭވަރު ކުރާނެ ކަމަށް އީރާނުގެ ސަލާމަތީ އެންމެ އިސް އޮފިޝަލު ވަނީ ވައުދުވެވަޑައިގެންފައެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓަރީ އަލީ ލަރީޖާނީ މިހެން ވިދާޅުވީ، ތެލް އަވީވާއި ވޮޝިންޓަނުން އީރާނާ ދެކޮޅަށް ފެށި އުދުވާނީ ހަނގުރާމައާ ގުޅިގެން ހޮނިހިރު ދުވަހު އެކްސްގައި ކުރެއްވި ޕޯސްޓެއްގައެވެ.
އަދި ބައިނަލްއަގުވާމީ ނިޒާމު ހަލާކުކުރާ ނުބައި އަނިޔާވެރިންނަށް، އީރާނުގެ ކެރޭ ސިފައިންނާއި މަތިވެރި ރައްޔިތުން ދުވަހަކުވެސް ހަނދާން ނުނެތޭނެ ފަދަ ފިލާވަޅެއް ދަސްކޮށްދޭނެ ކަމަށްވެސް ލަރީޖާނީ ވިދާޅުވިއެވެ.
ލަރީޖާނީ މިފަދައިން ވިދާޅުވީ، ހޮނިހިރު ދުވަހުގެ ފަތިހު އިޒްރޭލާއި އެމެރިކާ ގުޅިގެން އީރާނުގެ އެކި ސިޓީތަކަށް ދޭން ފެށި ހަމަލާތަކާ ގުޅިގެންނެވެ. މި ހަމަލާތައް އަމާޒުކޮށްފައިވަނީ މައިގަނޑު ގޮތެއްގައި އާންމުން ދިރިއުޅޭ ސަރަހައްދުތަކަށެވެ.
އީރާނުގެ ރެޑް ކްރެސެންޓް ސޮސައިޓީން މައުލޫމާތު ދޭ ގޮތުގައި، މި ހަމަލާތަކުގައި މިހާތަނަށް 200 އަށްވުރެ ގިނަ މީހުން އީރާނުން ވަނީ މަރުވެފައެވެ. މީގެ ތެރޭގައި އީރާނުގެ ދެކުނު ޕްރޮވިންސެއް ކަމަށްވާ ހޯރްމުޒްގާންގެ ފަށާ ތައުލީމުދޭ ސުކޫލަކަށް ދިން ހަމަލާގައި މަރުވި 100 އަށްވުރެ ގިނަ ކުޑަކުދިން ހިމެނެއެވެ.
މި ހަމަލާތަކުގެ ރައްދުގައި، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވަނީ އިޒްރޭލުން ހިފާފައިވާ ބިންތަކުގެ އަސްކަރީ އަމާޒުތަކަށް ތިން ފަހަރެއްގެ މަތިން ބޮޑެތި ހަމަލާތަކެއް ދީފައެވެ. ތެލް އަވީވާއި ހައިފާ ހިމެނޭ ގޮތަށް އެކި ސިޓީތަކަށް ދިން މި ހަމަލާތަކުގެ ސަބަބުން، އެ ސަރަހައްދުތަކުގައި ވަޒަންވެރިވެފައިވާ މީހުންނަށް ވަނީ ބިންގަރާސްތަކަށް ވަންނަން މަޖުބޫރުވެފައެވެ.
މީގެ އިތުރުން، އީރާނާ ދެކޮޅަށް ހިންގި އުދުވާނުގައި ބައިވެރިވުމުގެ ސަބަބުން، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށްވެސް އައި.އާރު.ޖީ.ސީ އިން ވަނީ ހަމަލާދީފައެވެ. މީގެ ތެރޭގައި ބަހުރޭންގައި އޮންނަ އެމެރިކާގެ ފިފްތް ފްލީޓާއި، ގަތަރާއި ޔުނައިޓެޑް އަރަބް އެމިރޭޓްސްގައި ހުރި އެމެރިކާގެ މުހިންމު އަސްކަރީ މަރުކަޒުތައް ހިމެނެއެވެ.
މި އުދުވާނީ ހަމަލާތައް ދީފައިވަނީ، އޮމާން ސަރުކާރު މެދުވެރިވެގެން ތެހެރާނާއި ވޮޝިންޓަނާ ދެމެދު ނިއުކްލިއާ މައްސަލައިގައި ނުސީދާ މަޝްވަރާތަކެއް ކުރިއަށްދަނިކޮށެވެ. މި މަޝްވަރާތަކުގެ އެންމެ ފަހު ބުރު ބުރާސްފަތި ދުވަހު ޖެނީވާގައި ބާއްވާފައިވާއިރު، ދެ ފަރާތުންވެސް ވަނީ މަޝްވަރާތަކުގައި ބޮޑެތި ކުރިއެރުންތަކެއް ލިބިފައިވާކަން ފާހަގަކޮށްފައެވެ.
ހޮނިހިރު ދުވަހުގެ ކުރީކޮޅު އެމެރިކާގެ މީޑިއާއަކަށް ދެއްވި އިންޓަވިއުއެއްގައި، އީރާނުގެ މަޝްވަރާ ޓީމުގެ އިސްވެރިޔާ އަދި ޚާރިޖީ ވަޒީރު އައްބާސް އަރާގްޗީ ވިދާޅުވީ، އީރާނަކީ އެތައް ހާސް އަހަރެއްވީ މަތިވެރި ތަމައްދުނެއް އޮތް "ބޮޑު ގައުމެއް" ކަމަށެވެ.
އަރާގްޗީ ވިދާޅުވީ، އަމިއްލަ ނަފްސު ދިފާއުކުރާނެ ގޮތް އީރާނަށް އެނގޭ ކަމަށާއި، އީރާނު ދެމިއޮންނާނެ ކަމަށެވެ. އަދި އުދުވާނީ ހަމަލާތައް ހުއްޓާލި ހިނދަކުން، އީރާނުން އަމިއްލަ ދިފާއުގައި ދޭ ހަމަލާތައްވެސް ހުއްޓާލާނެ ކަމަށް އޭނާ ވިދާޅުވިއެވެ.
"އަޅުގަނޑުމެންނަކަށް ހަމަހިމޭނުން ބަލާކަށް ނުތިބެވޭނެ،" އީރާނުގެ ޚާރިޖީ ވަޒީރު ވިދާޅުވިއެވެ.
އީރާނާ ދެކޮޅަށް ހިންގާ އެއްވެސް އުދުވާނީ އަމަލެއްގައި، ގަލްފުގެ ގައުމުތަކުގެ ބިން ބޭނުންކުރުމުގެ ފުރުސަތު ނުދިނުމަށް އީރާނުން މީގެ ކުރިން ވަނީ އެ ގައުމުތަކަށް އިންޒާރު ދީފައެވެ.
