ޚާމަނާއީ އަވަހާރަވެއްޖެ ކަމަށް އީރާންގެ މީޑިއާ ތަކުން ބުނެފި

އީރާންގެ ރޫހާނީ ލީޑަރު އަދި އެ ގައުމުގެ އެންމެ މަތީ ވެރިޔާ އާޔަތުالله އަލީ ޚާމަނާއީ އަވަހާރަ ވެއްޖެ ކަމަށް އީރާންގެ މީޑިއާ ތަކުން ރިޕޯޓު ކޮށްފި އެވެ.

އެމެރިކާއާއި އިޒްރޭލުން ފާއިތުވި ދިހަވަރަކަށް އަހަރުގެ ތެރޭގައި އީރާނުގެ އަމާޒުތަކަށް ދިން އެންމެ ވަރުގަދަ ހަމަލާތަކުގައި، އެ ގައުމުގެ އެންމެ މަތީ ވެރިޔާ އާޔަތުﷲ އަލީ ޚާމަނައީ އަވަހާރަވެފައިވާކަން އެ ގައުމުގެ ދައުލަތުގެ މީޑިއާއިން  ކަށަވަރުކޮށްދީފިއެވެ.

އީރާނުގެ ދައުލަތުގެ މީޑިއާއިން ޚާމަނައީ އަވަހާރަވިކަން އާދިއްތަ ދުވަހުގެ ހެނދުނުގެ ވަގުތެއްގައި އިއުލާނުކޮށްފައިވާއިރު، އިޒްރޭލުގެ އިސް އޮފިޝަލަކު ރޮއިޓާސްއަށް މައުލޫމާތު ދެމުން ކުރިން ބުނެފައިވަނީ، ދިން ހަމަލާއަށްފަހު ޚާމަނައީގެ ހަށިކޮޅު ފެނިފައިވާ ކަމަށެވެ. އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، 1989 ވަނަ އަހަރުން ފެށިގެން އީރާނުގެ ލީޑަރުގެ ގޮތުގައި ހުންނެވި ޚާމަނައީއަށް އަމާޒުކޮށް ހަމަލާދިނުމުގައި އެމެރިކާއިން އިޒްރޭލާ އެކު ގާތުން މަސައްކަތް ކޮށްފައިވާ ކަމަށެވެ.

އީރާނުން ބުނެފައިވަނީ މި ހަމަލާތަކަކީ އެއްވެސް އުސޫލެއް ނެތް، ޣައިރު ގާނޫނީ ހަމަލާތަކެއް ކަމަށެވެ. އަދި މި ހަމަލާތަކުގެ ރައްދުގައި އީރާނުން ވަނީ އިޒްރޭލަށާއި، އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ގައުމުތައް ހިމެނޭހެން މަދުވެގެން އަށް ގައުމަކަށް މިސައިލް ހަމަލާތަކެއް ދީފައެވެ.

އިންތިޚާބުގައި "ސުލްހައިގެ ރައީސް" އެއްގެ ގޮތުގައި ކެމްޕޭން ކުރެއްވުމަށްފަހު، ވެރިކަމުގެ މި ދައުރުގައި ޚާރިޖީ ސިޔާސަތުގެ އެންމެ ބޮޑު ނިންމެވުން ނިންމަވަމުން ޓްރަމްޕް ވިދާޅުވީ، މި ހަމަލާތަކުގެ ބޭނުމަކީ އެތައް އަހަރެއް ވަންދެން އީރާނުގެ ފަރާތުން އޮތް ނުރައްކާ ނައްތާލުމާއި، އެ ގައުމަށް ނިއުކްލިއާ ހަތިޔާރު އުފެއްދުމުގެ ފުރުސަތު ނުދިނުން ކަމަށެވެ.

ޓްރަމްޕްގެ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ޖާސޫސީ އިދާރާތަކާއި ޓްރެކިން ސިސްޓަމްތަކުން ޚާމަނައީ އުޅުއްވާ ތަން ދެނެގަނެ މޮނިޓަރު ކުރަމުންދިޔަ ކަމަށެވެ. އަދި ޚާމަނައީއާއި އޭނާއާއެކު މަރާލެވުނު އެހެން ލީޑަރުންނަށްވެސް ސަލާމަތްވުމަށް ކުރެވޭނެ އެއްވެސް ކަމެއް ނެތް ކަމަށް ޓްރަމްޕް ވިދާޅުވިއެވެ.

އީރާނުގެ ސަރުކާރު ވައްޓާލުމަށް އެ ގައުމުގެ ރައްޔިތުންނަށް ޓްރަމްޕް އަނެއްކާވެސް ގޮވާލެއްވިއެވެ. ނަމަވެސް އޭނާ އިންޒާރު ދެއްވި ގޮތުގައި، މެދުއިރުމައްޗަށާއި މުޅި ދުނިޔެއަށް ސުލްހަ ގެނައުމުގެ މަގްސަދު ހާސިލުވަންދެން، މެދުކެނޑުމެއް ނެތި މުޅި ހަފުތާގައި ނުވަތަ ބޭނުންވާ މިންވަރަށް ވަރުގަދަ ބޮމުގެ ހަމަލާތައް ކުރިއަށްދާނެއެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ ޚާމަނައީ ދިރިއުޅުއްވާ އަދި މަސައްކަތް ކުރައްވާ އިމާރާތްތައް (ކޮމްޕައުންޑް) އެއްކޮށް ސުންނާފަތި ކޮށްލާފައިވާ ކަމަށެވެ.

މިކަމުގެ މައުލޫމާތު ހުރި ތިން މަސްދަރަކުން ބުނި ގޮތުގައި، މި ހަމަލާތަކުގައި އީރާނުގެ ޑިފެންސް މިނިސްޓަރު އާމިރު ނާސިރުޒާދޭއާއި ރިވޮލިއުޝަނަރީ ގާޑްސްގެ ކޮމާންޑަރު މުހައްމަދު ޕަކްޕޫރު ވެސް ވަނީ އަވަހާރަކޮށްލާފަ އެވެ.

އިޒްރޭލުގެ އަސްކަރިއްޔާއިން ބުނީ އީރާނުގެ އަސްކަރިއްޔާގެ އިސް ފަސް ކޮމާންޑަރަކު މަރުވެފައިވާކަން ކަށަވަރުވެފައިވާ ކަމަށެވެ. އޭގެ ތެރޭގައި ޚާމަނައީގެ މުޝީރު އަލީ ޝަމްޚާނީ ވެސް ހިމެނެއެވެ. އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި ޚާމަނައީގެ އަންހެން ދަރިފުޅާއި، ކާފަ ދަރިފުޅާއި، ދަނބިދަރިފުޅުގެ އިތުރުން ޅީދަރިފުޅު ވެސް ވަނީ މި ހަމަލާތަކުގައި މަރުވެފައެވެ.

މި ހަމަލާތަކުގެ ސަބަބުން މުޅި އީރާނުގައި ބޮޑު ނުތަނަވަސް ކަމެއް ވަނީ އުފެދިފައެވެ.

"އަހަރެމެން މިތިބީ ވަރަށް ބިރުން. އަހަރެންގެ ދަރިން ތިބީ ބިރުން ތުރުތުރު އަޅާ ހާލުގައި. ދާނެ އެއްވެސް ތަނެއް ނެތް، އަހަރެމެން މަރުވާނީ މިތިބި ތަނުގައި،" އީރާނުގެ އުތުރުގެ ސިޓީއެއް ކަމަށްވާ ތަބްރީޒުގައި ހުރި ދެ ކުދިންގެ މައެއް ކަމަށްވާ އުމުރުން 32 އަހަރުގެ މިނޫ، ރޮއިޓާސްއަށް ފޯނުން ދިން އިންޓަވިއުއެއްގައި ރޮމުން ބުންޏެވެ.

މި ހަމަލާތަކުގެ ރައްދުގައި އީރާނުން ސަތޭކައަށްވުރެ ގިނަ މިސައިލާއި ޑްރޯން ފޮނުވާލާފައިވީ ނަމަވެސް، އެމެރިކާގެ އެއްވެސް މީހަކު މަރުވެ ނުވަތަ އަނިޔާވެފައި ނުވާ ކަމަށް ޕެންޓަގަންއިން ބުނެއެވެ.

ދުނިޔޭގައި ބޭނުންކުރާ ތެލުގެ ފަސްބައިކުޅަ އެއްބައި އުފުލާ ހޮރްމޫޒް ކަނޑުއޮޅި ބަންދުކޮށްފައިވާ ކަމަށް އީރާނުން ވަނީ ބުނެފަ އެވެ. މިއާއެކު ތެލުގެ އަގު ވަރަށް ބޮޑަށް އުފުލޭނެ ކަމަށް ވިޔަފާރިވެރިން ލަފާކުރާއިރު، މެދުއިރުމަތީގެ ދަތުރުތައް އެއާލައިންތަކުން ވަނީ ކެންސަލް ކުރަން ފަށާފައެވެ.

އިޒްރޭލުގެ އަސްކަރިއްޔާއިން ބުނީ 200 އެއްހާ ހަނގުރާމަމަތީ ބޯޓު ބޭނުންކޮށްގެން އެ ގައުމުގެ ތާރީޚުގައި ހިންގި އެންމެ ބޮޑު އަސްކަރީ އޮޕަރޭޝަން ނިންމާލާފައިވާ ކަމަށެވެ. މި އޮޕަރޭޝަނުގައި އީރާނުގެ 500 އަމާޒަކަށް ހަމަލާދީފައިވާއިރު، އޭގެ ތެރޭގައި މިދިޔަ އަހަރުގެ ހަމަލާތަކުގައި ގެއްލުން ލިބިފައިވާ ދިފާއީ ނިޒާމުތައް ވެސް ހިމެނެއެވެ.

އީރާނުގެ ދެކުނުގެ ރަށެއް ކަމަށްވާ މިނާބުގައި ހުންނަ އަންހެން ކުދިންގެ ޕްރައިމަރީ ސްކޫލަކަށް ހަމަލާ އަރައި 85 މީހުން މަރުވެފައިވާ ކަމަށް އެ ސަރަހައްދުގެ ޕްރޮސިކިއުޓަރަކާ ހަވާލާދީ ދައުލަތުގެ މީޑިއާއިން ރިޕޯޓްކޮށްފައިވެއެވެ. 

އީރާނުގެ އެންމެ މަތީ ލީޑަރު އަވަހާރަވުމާ ގުޅިގެން އެ ގައުމުގައި ގައުމީ ހިތާމައިގެ 40 ދުވަސް އަދި ސަރުކާރު ބަންދު 7 ދުވަސް އިއުލާނު ކޮށްފި ކަމަށް އެ ގައުމުގެ ދައުލަތުގެ މީޑިއާ ޕްރެސް ޓީވީ އިން ރިޕޯޓު ކޮށްފި އެވެ.