އެމެރިކާގެ މަނަވަރުތަކަށް ޚިދުމަތްދޭ ދުބާއީގެ ޖަބަލް އަލީ ބަނދަރުގައި ރޯވި އަލިފާންގަނޑު ނިއްވާލުމުގެ މަސައްކަތް ކުރަނީ
އީރާނުން ދިން ހަމަލާއެއް ހުއްޓުވުމަށް ފޮނުވާލި އިންޓަރސެޕްޓަރެއްގެ ބައިތައް ވެއްޓި، ދުބާއީގެ ޖަބަލް އަލީ ބަނދަރުގައި ރޯވި އަލިފާންގަނޑު ނިއްވާލުމުގެ މަސައްކަތް ސިވިލް ޑިފެންސްގެ ޓީމުތަކުން ފަށައިފި. ދުބާއީ މީޑިއާ އޮފީހުން ބުނި ގޮތުގައި މި ހާދިސާ ހިނގާފައިވަނީ ބަނދަރުގެ ބާރތެއްގައި. ޖަބަލް އަލީ ބަނދަރަކީ އެމެރިކާގެ މަނަވަރުތަކަށް ޚިދުމަތްދޭ ސަރަހައްދީ ގޮތުން މުހިންމު ބަނދަރެއް.
ދުބާއީގެ ޖަބަލް އަލީ ބަނދަރު. | ޚަލީޖް ޓައިމްސް
އީރާނުން ޔޫއޭއީ އާއި ގަލްފުގެ ގައުމުތަކަށް އަމާޒުކޮށް ދިން ވަރުގަދަ ހަމަލާތަކަކާ ގުޅިގެން، ވައިގެ މަގުން ދިން ހަމަލާއެއް ހުއްޓުވުމަށް ފޮނުވާލި އިންޓަރސެޕްޓަރެއްގެ ބައިތައް ވެއްޓި ޖަބަލް އަލީ ބަނދަރުގައި ރޯވި އަލިފާންގަނޑު ނިއްވާލުމުގެ މަސައްކަތް ދުބާއީގެ ކަމާބެހޭ އިދާރާތަކުން ކުރަމުންދާ ކަމަށް އާދިއްތަ ދުވަހު އޮފިޝަލުން ވިދާޅުވެއްޖެއެވެ.
ދުބާއީ މީޑިއާ އޮފީހުގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނެފައިވަނީ، ވައިގެ މަގުން އައި ހަމަލާއެއް ހުއްޓުވުމުގެ ތެރޭގައި އޭގެ ބައިތައް ވެއްޓުމުގެ ސަބަބުން ޖަބަލް އަލީ ބަނދަރުގެ ބާރތެއްގައި އަލިފާނުގެ ހާދިސާއެއް ހިނގާފައިވާކަން ދުބާއީގެ ކަމާބެހޭ އިދާރާތަކުން ކަށަވަރުކޮށްދޭ ކަމަށެވެ. އަދި ދުބާއީ ސިވިލް ޑިފެންސްގެ ޓީމުތަކުން ވަގުތުން އެ ސަރަހައްދަށް ގޮސް ހަރަކާތްތެރިވާން ފަށާފައިވާ ކަމަށާއި، އަލިފާންގަނޑު އެއްކޮށް ނިއްވާލުމަށްޓަކައި މެދުކެނޑުމެއްނެތި މަސައްކަތް ކުރަމުންދާ ކަމަށްވެސް އެ އޮފީހުން ބުނެފައިވެއެވެ.
ޖަބަލް އަލީ ބަނދަރަކީ އެމެރިކާގެ ހަނގުރާމަމަތީ މަނަވަރުތައް ބަނދަރުކުރުމުގެ އިތުރުން، މަތިންދާބޯޓު އުފުލާ ބޮޑެތި މަނަވަރުތަކަށްވެސް ޚިދުމަތް ދިނުމުގެ ގާބިލުކަން ލިބިފައިވާ މުހިންމު ބަނދަރެކެވެ.
މަސްދަރު: އޭއެފްޕީ
